錦田石崗軍營近雷公田位置於春季會有一道木棉大道，秋冬時節竟然亦有楓葉觀看，而雷公田內有一道百年歷史嘅古道，穿梭其中亦有另一棵楓樹，盡頭處可以連接另一道郊遊徑，路段屬拍拖兩個人閒遊之選。
由錦田上村球場起步，於錦田公路轉入荃錦公路，一直上行至石崗軍營位置，每年3月春季時會出現一道木棉大道，而現時秋冬時份則有一棵巨型楓樹，片片楓葉散落一地，路邊構成少量紅葉遍地畫面。楓樹位處石崗近雷公田方向，相對其他楓香地帶，石崗楓香比較高大，甚至比大埔烏蛟騰更巨型，需要仰頭觀望，而紅葉就較分散，基本上俯首先見到路邊有一地楓葉。
步入雷公田村，5分鐘後即會見到左邊為甲龍古道郊遊徑，古道全程約1.7公里，終點高逾400公尺，可接駁甲龍林徑、荃錦自然教育徑，甚至荃錦公路。雖然需攀登近400呎，但基本上係短途山路，山路明顯，全段路程唔太辛苦，而且沿途遍佈樹蔭，即使夏天亦可以步行，上行需時約1小時。
甲龍古道於地理上屬荃灣區，其實係早年石崗、雷公田、八鄉等村民合力興建嘅小路，用作通往荃灣市集，村民以務農人士為主，可以攜上農作物經古道前往市集販賣。細心留意吓，古道內係採用花崗石舖砌，而石塊舖砌出嚟嘅小路遠望其實都幾似恐龍脊椎骨。
不過，甲龍古道並非因為路段似龍骨，而係因為附近嘅甲龍村而得名，甲龍村則有逾200年歷史，故此甲龍古道亦歷史悠久。古道林蔭茂盛，路段清涼舒適，而石級皆保存良好，山徑只算暗斜，唔算太花體力，總算一道簡易路線，如果反方向由大帽山至荃錦公路下行至雷公田，路段全程為下行路段則更輕鬆。
整道古道全程並無景觀，僅為大帽山西面近荃錦坳一處小山坡，古道中途只有甲龍可澗，可以稍作休息，位置清涼，前後皆為密林山徑，只有一條路線。於甲龍古道末端，係同甲龍林徑重疊，而甲龍林徑只係圍繞一圈而走，繼續前行則可接駁荃錦自然教育徑，而荃錦公路入口另一端則有越野單車徑。若然意猶未盡，可以繼續前往川龍村方向，經扶輪公園前往川龍家樂徑。
川龍村近荃錦公路，村口有一間已經廢棄嘅川龍公立貫文學校，為一間古老村校，已經被鎖上，未能進入。由門外窺視，校舍內雜草叢生，純白小屋帶有頹廢感覺，據悉以往曾是拍戲場地。而川龍村最有名嘅係彩龍茶樓、端記茶樓，唔少人都會專程前往飲茶，不過……大家自行選擇啦。
經過茶樓，可以前往燒烤場地，而燒烤場內則有一道川龍家樂徑，全程只係圍繞燒烤場背後小山路而走，終點同樣為燒烤場，係一道晨運路線。事實上，川龍家樂徑係全港最短嘅家樂徑，10至15分鐘可以走完全程，而步行至川龍家樂徑頂端位置亦可觀景。
川龍家樂徑觀景台可俯首荃灣至青衣一帶，亦可眺望青衣大橋、昂船洲大橋，甚至坪洲、交椅洲、南丫島三支煙囪，天朗氣清時亦可遠眺西環、西高山、扯旗山。
E.A.Tips :
❷ 需於荃灣或錦田先作補給。
❸ 甲龍古道可連接大帽山郊野公園路線。
❹ 如果由錦田方向循甲龍古道走，基本都係上山路段，而從荃灣方向步行錦田，整段甲龍古道基本都係下行山路，比較容易，不過其實即使係上行方向亦唔算難行。
❺ 整段甲龍古道都有樹蔭，即使夏天步行亦算舒服。
❻ 甲龍古道兩邊入口分別係雷公田村八鄉郊遊徑、荃錦公路。
❼ 謹記自己垃圾自己帶走。
❽ 雷公田村入口近石崗軍營，但軍營守衛森嚴，禁止進入，記得小心步行，唔好亂講嘢喧鬧嘈吵。
❾ 楓葉位置有兩處，一個係石崗軍營對出，等同3月木棉位置，而另一個係甲龍古道近荃灣方向，不過兩者都係比較高大嘅楓香，離地面頗遠，只有一堆散落楓葉。
❿ 郊野公園先有洗手間。
甲龍古道郊遊徑
大欖
川龍家樂徑
大帽山川龍家樂徑