大角嘴高水準台式手工芋圓店月底將結業滿$100送2件芒果糯米糍

糖水向來係Gathering主食，甜品係另一個胃，飽餐一頓後通常都會拍拖兩個人去食碗糖水Sweet Sweet，為一日結束之前帶上一點甜蜜，不過就算幾甜，要結束都會結束，最近大角嘴一間人氣台式甜品於今年1月底即將結業，臨別秋波更推出特別優惠，凡滿$100皆會送出2件芒果愛心糯米糍，每日送完即止！

據了解，大角嘴芋圓一於1月31日會結束營業，凡滿$100更會送出2件原價$36嘅芒果愛心糯米糍，而菜單上款式不少，梳乎厘班戟$68至$78、雪花冰$65至$68、芋圓$36至$43。當中，最著名嘅係自家製台式芋圓、梳乎厘班戟，口味有原味、楊枝甘露、椰汁海燕窩、芒果、桂花糖、芋香等，一碗芋圓甜品同時包含香芋圓、蕃薯圓、紫薯圓，甚至係栗子圓。

桂花糖芋圓$36 內有海量香芋圓、蕃薯圓、紫薯圓，啖啖煙韌，紮實而唔會太腍身，無煮成糊狀，粒粒有咬口。而香芋圓芋味十足，而紫薯圓嘅紫薯香亦濃，唯獨蕃薯圓比較淡味，3色圓都唔會食到膩，一碗芋圓甜品內亦有蒟蒻、白玉，而白玉即小丸子啲Friend。桂花糖芋圓其他配料有桂花、薏米、紅豆、仙草等，部份芋圓甜品更有黑糖珍珠，打開碗蓋傳出陣陣桂花糖香氣，清幽桂花香伴隨紅豆甜意，加上溫和嘅薏米，入口舒服，仙草亦順滑可口，相當清爽。

台式飲品中有四圍都有嘅黑糖珍珠厚鮮奶，亦有以芒果為主嘅芒不了$37，取其諧音忘不了，以芒果汁作底，芒果汁香甜，芒果肉甜中帶酸，即使由黑糖珍珠換成蒟蒻、白玉，亦無礙煙韌口感。

除咗甜品，更有少量小食，包含棒棒雞$36/4件、章魚燒$28/4件、麵包槺鯖魚$25、咖哩薯餅$28/2件、炸豆腐$32/4件、煎餃子$28/4件，當中棒棒雞配搭泰式辣醬，有Crossover之感。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 店舖位於角祥街，由奧海城對出直行就會見到。

❷ 芋圓一旁邊水果店亦為同路人。

❸ 小店將於2021年1月31日結業，即日起滿$100送2件芒果愛心糯米糍，原價$36。

❹ 現時不時會4至5點先開舖，而6點又禁堂食，所以基本上只有外賣。

❺ 留意每人最低消貴$30。

❻ 甜品可以追加配料。