長假期後人氣熱點頓變空蕩蕩零人流 30分鐘從炮台山日式庭園登北角後山新手路線紅香爐峰

長假期後人氣熱點頓變空蕩蕩零人流 30分鐘從炮台山日式庭園登北角後山新手路線紅香爐峰

紅香爐峰向來係相當具人氣嘅北角後山,15分鐘已經能夠登頂,而且景觀遼闊,360度風景盡收腳底,結合快靚正條件,長假期時山頂人滿為患,但原來長假期後係可以拍攝山頂無人畫面。而紅香爐峰山下有一個近年瞬間大受歡迎嘅小公園,兩個地方編輯都曾經帶大家去過,只不過想做一個綜合,最大分別係砌出一道更仔細、更完整嘅路線,兩個人氣景點都同時出現杳無人煙嘅情況,不過唔想睇多次嘅話,可以撳下一篇繼續睇吓拍拖兩個人嘅好去處。

由北角炮台山電車站起步,依循英皇道旁Z字形樓梯上行,然後經扶手電梯繼續上行至富澤花園、金文泰中學,直到炮台山道轉右,再上行至天后廟道,呢個時候就會發現對面就係天后廟道三號花園,位置喺上行至雲景道嘅樓梯級左邊。

近一年,呢個小公園內躲藏一個迷你影相位,以竹棚塔出一間日式小屋,竹棚屋頂加上仿製紙門、木製燈籠,加上連有小橋、竹籬笆、石燈籠裝飾,甚至植有日本參樹,畫面古雅,擁有獨特和式風格,如同一秒穿越日本京都,如同偽日式庭園。編輯當日寫完一次之後,覺得似京都只係純粹一個感覺,無諗過呢個小地方竟然變成人氣影相打卡景點。

延伸閱讀﹕秒遊京都! 炮台山配水庫旁秘藏日式公園 30分鐘直上紅香爐峰山頂

從小公園折返樓梯級,可上行至山腰雲景道配水庫遊樂場,其實一直依循雲景道走,就可以轉出寶馬山道,不過雲景道中途有唔少捷徑,比如係香港樹仁大學旁邊嘅小樓梯,先前往慧翠道,然後可以直達寶馬山道,路線比雲景道正路短,但樓梯可能比斜路需要花氣力。

到達寶馬山道之後,轉右就可以前往紅香爐峰入口處,一直上行就能夠抵達聖貞德中學旁邊山路入口,對面為寶馬山巴士總站,當然對面都有一個小路口可以上行紅香爐峰。從聖貞德中學入口進入,既然係人氣路線,路況已經極明顯,毋須要絲帶引路,經兩個分岔路口就可以上行至紅香爐峰山頂,從入口到山頂亦只係15至30分鐘步程。第一個分岔路口為寶馬山、渣甸山,選後者;第二個分岔路口為渣甸山及小馬山、紅香爐峰,轉右再上行右邊山路就可以。

延伸閱讀﹕15分鐘直上寶馬山紅香爐峰 無遮擋望維港靚景

紅香爐峰山頂風景依舊優美,雖然海拔僅高約220米,但畫面比大電視更遼闊,巨石陣上更可360度觀景,視野廣闊,完係無遮擋,維多利亞港靚景亦映入眼簾,黃昏時可同時觀賞黃昏夕陽靚景。

而紅香爐峰山徑對比上一次遊覽,山路已經明顯寬闊,而沙泥路亦愈趨滑順,故山路比之前更容易跣腳。長假期時,新手路線紅香爐峰山頂人滿為患,人頭湧湧,但長假期後方才發現,山頂上標高柱附近竟然能夠拍攝巨石上空蕩蕩嘅畫面,實在難得。

事實上,紅香爐峰本身只係背靠紅香爐嘅一座山,靠近大坑至掃桿埔以東,亦即係寶馬山附近。而紅香爐歷史可追塑至1819年清代時期,為香港島軍事駐地,而紅香爐於1841年英國佔領香港時,只係一個容納約50居民嘅小村落。紅香爐本身其實只係位處銅鑼灣天后廟正門,前身為鹽船灣紅香爐廟,而峰又等同山,所以先叫紅香爐峰。

延伸閱讀﹕【維城界碑】港島十界石!帶你尋找維多利亞城界碑 三界石躲藏山坡近月接連曝光

離開紅香爐峰之後,可以選擇繼續前往其他山徑,比如係小馬山、畢拿山,甚至前往大潭方向,亦可以經金督馳馬徑轉向下方跑馬地、銅鑼灣方向落山。即使只係金督馳馬徑,沿途一樣滿佈風景,而且景色開揚。先轉出畢拉山道,然後轉向金文泰道,中途可見廢棄地聖公會幼稚園,一直下行可以連接大坑道。

E.A.Tips :

❶ 巴士路線603A、新巴路線2A,8H,10,18,19,19P, 23,25,63,65,81, 102,106,112,116 可到達炮台山。

❷ 紅香爐峰山頂遍佈巨石,攀上巨石有危險度,謹記注意安全。

❸ 記得愛護環境,自己垃圾自己帶走。

❹ 上山分岔路口多,容易迷路,所以最好都係睇清楚路線先好行。

❺ 雖然只係一個小山丘,同樣有山路,比較崎嶇不平,部份山路較窄,而近乎到達山頂時,需要好似攀石場咁攀上好多舊巨石,著運動鞋比較方便,另著牛仔褲或causal wear都還可以。

❻ 有唔少人都會攀上山頂巨石打卡,不過攀上去危險度甚高,失足即跌落山,一定要量力而為,事實上攀上去睇到嘅景觀同唔攀上去係相差無幾,所以其實無咩必要將自己放到危險地方。

❼ 若要等候日落,建議帶備頭燈或電筒,上山容易落山難,天黑時落山會較危險。

❽ 小巴路線25,49M、巴士路線23B,25,25A,27, 81A,85,85P,108 都可以到達寶馬山巴士總站。

❾ 寶馬山巴士總站對面就係聖貞德中學,入口喺學校隔離,學校左邊就係。

❿ 由Z字形樓梯直上天后廟道三號花園後,一直沿雲景道上行,轉出寶馬山道,就可以到達近盡頭入口,中途有唔少樓梯捷徑,但其實斜路比較易行。

⓫ 第一個分岔路口為寶馬山、渣甸山,只需選渣甸山方向,就可以前往紅香爐峰。

⓬ 現時紅香爐峰山路已經被完全開發,可以輕鬆圍繞一圈而走,但沙泥愈來愈平滑,比之前跣腳,要特別小心。

⓭ 於紅香爐峰落山,折返原路第二個分岔路口,前行可以通往金督馳馬徑,連接其他山路。

⓮ 向銅鑼灣、跑馬地方向落山,只需於分岔路口轉右,之後會接上畢拉山道,下行轉出金文泰道,中途可見廢棄地聖公會幼稚園,此後一直下行就可以走出大坑方向。

EATWO
Miss A

天后廟道三號花園

天后廟道70號
24hours

紅香爐峰

寶馬山道55號聖貞德中學
24hours