牛頭角配水庫旁建全新遊樂場！頂層平台設超特別遊樂設施連野餐大草地

香港有好多個配水庫，通常靠近配水庫嘅遊樂場都係市區後花園，而近月牛頭角配水庫附近就有一個全新遊樂場，場內有別於一般配水庫遊樂場，並非只有大草地，更有一個超特別遊樂設施，同坊間公園大有分別，無論刺激度定造型上都別具一格，而設施同野餐大草地剛分成兩個區域，拍拖兩個人野餐都相當方便。

通常配水庫附近都會被稱為水塘山，皆因係屬於用作供水嘅設施，而每個配水庫海拔高度都唔低，離民居不遠，但又有一定距離。而牛頭角食水配水庫則靠近鱷魚山，附近有俗稱沈雲山嘅觀塘上配水庫、安達臣道配水庫，每個配水庫都會開闢一道車路，而配水庫通常都有欄杆、鐵絲網圍住，禁止進入。不過，有時候配水庫附近或頂端會設有一個遊樂場，通常係綠油油大草坪，供遊人休憩或賞景。

而牛頭角食水配水庫附近嘅遊樂場雖然係貌似配水庫遊樂場，但其實係隸屬樓下嘅康寧道公園。據2007年嘅立法會發展事務委員會文件顯示，原來早年已經有建議將觀塘駿業街遊樂場嘅獨特遊樂設施重置於牛頭角食水配水庫、康寧道公園，本來預料2020年底完成工程，不過最終喺2021年底先至正式建成，容許公眾進入。

現時，該遊樂場只能經康寧道公園旁升降機塔或樓梯進入通往遊樂場嘅天橋，而配水庫入口係唔能夠進入遊樂場範圍內。康寧道公園本身以中式庭園設計，內有小型瀑布同人工湖，經過康寧道公園二期之後，經小樓梯能前往康寧道公園一期，一直上行就能夠到達配水庫旁邊嘅全新遊樂場。

牛頭角食水配水庫、康寧道公園頂端嘅平台花園最特別嘅地方並非擁有野餐大草地，而係草地旁邊嘅遊樂設施，編輯見到都好想玩，不過當日有唔少街童，加上附近嘅建築物，為免麻煩都係略為避開，未有近距離觀察。

除咗鞦韆架、小型氹氹轉、迷你彈床，更有一個巨型鵝蛋形嘅攀爬設施，有如小隧道，更連有攀爬繩網，恍如編輯小時候玩過嘅鋼架。另外更有一道螺旋狀長滑梯，對比現時只有幾級樓梯長度嘅膠樓梯，明顯較為特別，雖然始終未及舊時嘅超長而焫肉嘅舊式直長鐵滑梯。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 遊樂場位於康寧道公園一期，係平台花園嚟，靠近配水庫。

❷ 巴士路線1C,11X,13D,13X,15P, 23,23M,26M,28B,95M 可到達基督教聯合醫院，於協和街轉入康寧道公園第二期，然反直上康寧道公園一期，平台花園遊樂場近康寧道。

❸ 通往牛頭角食水配水庫嘅小路唔可以上行至平台花園，只有康寧道公園一期部Lift同樓梯先可以登上平台花園遊樂場。