【野餐隨行】前馬頭圍大廈朝聖193 Cafe!香港花見小路/日系粉紅橋打卡 土瓜灣牛棚藝術公園探索牲口棚遺跡

【野餐隨行】前馬頭圍大廈朝聖193 Cafe!香港花見小路/日系粉紅橋打卡 土瓜灣牛棚藝術公園探索牲口棚遺跡

走到土瓜灣,唔少人都只會諗到拍拖兩個人去牛棚藝術村行一行,但事實上區內又豈止一個地方?於剛剛過去嘅4月,土瓜灣前馬頭圍大廈內一cafe單靠明星效應吸引唔少人流,小店更設有外賣區,方便需要外賣嘅客人,食飽之後可以找尋香港花見小路同粉紅橋打卡,再前往離牛棚藝術村不遠嘅小公園,無需提供針紙,可以更了解過往牲口棚遺跡歷史。

第一站﹕Tanuki Coffee

土瓜灣半日遊首先前往位處啟岸商場地下、由人氣男團Error成員193(郭嘉駿)與3位舊同學合資開設嘅Cafe,除咗編輯揀選嘅Latte $45、Matcha Latte $55,亦有得獎咖啡師炮製嘅精品咖啡,咖啡豆由本地自家烘焙,如House Blend。熱飲既有拉花,外賣杯造型亦好別緻,打卡一流!普通一杯Latte似乎都係採用獨特咖啡豆,有少少偏酸同Fruity感覺,唔算係平常烘焙味好重嘅咖啡豆,狀似便宜版精品咖啡,因為通常精品咖啡先會特別注意咖啡豆,而非咖啡類就比較遜色,抹茶回甘味唔太重。咖啡店甫開張就吸引一眾「老婆」大排長龍打卡,雖然自稱「市民郭先生」嘅193曾稱因疫情蝕足幾個月先可以開張,但相信可以極速回本。

咖啡店以日韓式設計,既有室內加上圓形天花狀似純白太空艙嘅座位,亦外連花園模樣嘅大平台外賣區,店內設有周邊產品專區,售賣T-Shirt、Tote Bag、水杯等。不過,編輯最欣賞嘅地方係小店特別設有外賣區,即使唔堂食都可以選擇於外賣區等候,其後於外面用餐,可惜精品咖啡比較難外賣。咖啡店外有白色瓷磚舖砌嘅樓梯形梳化,亦有印有店名嘅鏡子打卡位,加上黃色狸貓作吉祥物,原來店名Tanuki就係日本狸貓嘅意思,充滿日本風格,好似外星生物,但用色Sharp醒又搶眼!

有傳聞指店內麵包供應商為享樂烘焙,當中店內除咗能夠飽肚又選擇不少嘅Egg Drop吐司三文治,Signiture則為挪威Brunost芝士Croffle $98,為限量發售,而且每日只有20份,193曾老實承認呢款小食模式係參考日韓Cafe。雖然以入貨有限嘅挪威傳統Brown Cheese炮製,但價錢同普通Croffle相差無幾,以一個客人嚟講,的確有種抵食咗嘅心態。

Croffle其實係牛角包配窩夫餅嘅一種小食,簡單嚟講,就係叫做「牛角包窩夫」。只係將牛角包壓成窩夫狀,一咬入口,啖啖外脆內軟,有別於傳統窩夫,頂端加上忌廉、芝士等材料,牛角包表面脆口,滲出牛油香,但窩夫芯位鬆軟,內餡又有種煙韌感覺,口感似麻糬。手打忌廉質感幼滑,略帶微甜,灑上份量唔少嘅Brown Cheese配搭新鮮,芝士味濃郁,滲出少少奶香甜味,有指係全港唯一採用挪威Brunost 芝士嘅食店。

小編講吓嘢﹕

咖啡店位於內街小巷,採開放式設計,室內外都有Chill嘅感覺,裝潢簡潔,有獨特風格,喺紅磡、土瓜灣之間舊區內提供一個休息地,只係店外有時會有車輛駛過,拎住嘢食用餐時自己執生啦!至於以食物、咖啡嚟講,價錢合理,的確唔算貴。編輯曾經去過其他咖啡店,每位無二、三百蚊都落唔到樓,而食物只係簡單一碟意粉或麵包,再加一杯嘢飲,良心店都係咁話。反而,呢間以為靠名氣食糊嘅食店,發現似乎唔係一間單靠明星效應而出位嘅食店,咖啡用心,選料有誠意,加上設有外賣區,如果保持水準,相信係可以生存落去。

第二站﹕香港花見小路

位於Tanuki Coffee旁邊嘅就係一道港版花見小路,同樣置於紅磡、土瓜灣之間嘅啟岸(The Vantage)商場地下,玩味十足。不過,所謂狀似京都花見小路嘅巷子,只係隔離一間日本餐廳延伸出店外嘅裝飾,同時配合商場日本風設計,唔好問編輯係邊間,明就會明,唔講重要問Details?

事實上,啟岸前身係馬頭圍大廈,現時已經被地產商恒基兆業改建成29層嘅單幢住宅連商場、會所,上年8月先落成,商場地下就叫做「啟岸巷子」,日本風走廊感覺似無天花設計,就只有一個個日式燈籠懸掛起嚟,構成香港版本嘅花見小路,當然唔會有舞妓或藝妓走過啦,見到嘅頂龍只係大媽。

第三站﹕海心公園

然後可以前往靠近海旁嘅海心公園,土瓜灣雖然係小小舊區,但都有出名嘅十三街,住宅密度高,樓齡多逾半百,而海心公園亦係一個至今已經有50年歷史嘅臨海小公園,園內本來重有一間海心廟。

要了解海心公園,就先要了解土瓜灣,其實土瓜灣本名土瓜環,皆因環字喺客家口音上狀似灣字,所以逐漸被統稱為土家灣或土瓜灣,附近村落則被稱為土家村。而土瓜灣本身位處海灣之上,該海灣原為海心島,狀似蕃薯狀,而土瓜又有蕃薯之意,所以最初被稱為土瓜環。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

海心公園內有一個延伸出海嘅海心亭,海旁位置靠近九龍城,可眺望啟德機場跑道,觀賞海濱風景。小橋至海心亭一帶被髹上粉紅色,少女感頓時大升,充滿浪漫感,馬上可變成一個少女打卡位。

延伸閱讀﹕【3低本地遊】土瓜灣舊區內有歷史悠久十三街 書店Cafe藝術文化半日遊

第四站﹕牛棚藝術公園

最後,我哋前往離牛棚藝術村非常接近、近年先興建嘅小公園,位於土瓜灣至啟德發展區地段。眾所週知,牛棚藝術村前身係一個牛隻中央屠宰中心,現活化成藝術村,亦於2009年被古物諮詢委員會評為香港二級歷史建築物,牛棚藝術村由殖民時代紅磚建築砌成,加上舊式鐵鏈、鐵環、水井、長水泥槽、牲口棚等充滿歲月痕跡都係甚為吸引。不過,牛棚藝術村目前需要針紙及安心出行先可以進入,編輯就帶大家前往隔離嘅公園,同樣可以探索牲口棚遺跡。

事實上,牛棚藝術村隔離係隱藏咗一個牛棚藝術公園(Cattle Depot Art Park),同樣靠近馬頭圍,於2019年尾先活化建成,大概喺2020年開放,康文署資料上聲稱為一個公共休憩空間,同時揉合文化與藝術元素。公園位置原為馬頭角牲畜檢疫站其中一部份,地方廢棄多年之後,最終以1億元興建成目前嘅牛棚藝術公園,保留牲口棚遺跡,到底小公園值唔值1億元?

公園內有草坪、座椅、避雨亭,可作野餐點,由於以牛棚歷史為主題,面積比藝術村更大,所以都保留咗牛棚元素,包括牲口棚、牆垣遺跡,甚至豬欄、水井,遊走當中可更真實感受昔日牛棚畫面。

E.A.Tips :

❶ Tanuki Coffee位於啟岸地下,為香港花見小路旁邊,崇志街或庇利街進入會比較近,馬頭圍道進入就需要穿過商場日本風小街道。

❷ Tanuki Coffee接受Cash、八達通、Payme作付款方式。

❸ 所謂香港花見小路,只係一間日本餐廳延伸出嚟嘅裝飾,同時配合商場嘅日本風設計。

❹ 海心公園內有公廁、海心亭。

❺ 牛棚藝術公園為免費進入且無需針紙及安心出行嘅地方,因為只係一個公園,而牛棚藝術村則必須遵守防疫規例。

❻ 巴士路線2E,6C,6F,11B,41, 45,61X,75X,85, 85A,85B,115 可到達九龍城碼頭巴士總站,而3B,5C,5D,11B,11K,12A, 21,61X,85A,85X,106,106P 則可抵達中華煤氣公司,至於小巴路線28M,49 亦可直達土瓜灣道。

❼ 牛棚藝術公園內有洗手間。

❽ 牛棚藝術村同牛棚藝術公園連接入口已經鎖上。

EATWO
Miss A

Tanuki Coffee

土瓜灣馬頭圍道63號啟岸地下18號地舖
11:00 – 18:00

啟岸巷子

香港九龍紅磡鶴園馬頭圍道63號啟岸The Vantage巷子
07:00 – 23:00

海心公園

土瓜灣旭日街
05:30–23:30
2334 3576

牛棚藝術公園

土瓜灣新山道39號
07:00–22:00