元朗花甲粉

元朗巷弄Sailormoon主題食店 大碗花甲粉蜆肉繁多湯底有咩問題?

感謝瀏覽我們的網站,很抱歉,由於網站發生故障,本頁文章部分內容暫時未能顯示,我們現正搶修當中,不便之處敬請原諒。

相關內容亦可到我們facebookMEWEYOUTUBE或IG專頁找到。

元朗國美食向來眾多,踏入該國度,要拍拖兩個人搵食都有排揀,今次前往一間處於小巷之間嘅食店,舖位唔大,位置其實離來往白泥嘅小巴站不遠,店方由門面到室內都以美少女戰士為主題,一望而知店主係Sailormoon死忠,不過賣嘅食物與美少女戰士全無關係。

 

踏入水車館街,粉紅色招牌的確吸引眼球,招牌雖然寫有中文字「元朗花甲粉」,但字體明顯仿照動畫設計,而且係恍如人氣動畫美少女戰士嘅名稱,故可以估計店主必然係女人。店舖原來於2020年已經開業,除咗招牌搶眼,門口其實都唔突出,而且放有雜物,若然經過唔抬頭一看,應該未必會察覺小店存在。翻查舊聞始發現,原來店舖數個月前曾經被一對男女疑似食霸王餐,多次以種種原因疑似搞事及投訴,甚至要求退款,事件曾經被網民帶出討論。



對於「花甲粉」一詞,編輯有所懷疑,到底正寫係咪應該寫作「花蛤粉」定係「蛤蜊粉」呢?據悉,「花甲粉」本身係一個誤寫嘅詞語,所謂「花甲」其實即係「蛤蜊」,亦即係「花蛤」,係一種貝殼類海產,營養價值高,簡單少少即係蜆肉一種。翻查有關「花甲粉」嘅資料,大多數都係同中國大陸有關,而「花蛤粉」或「蛤蜊」則同「中華民國」台灣有關,而「花甲粉」本身係流行於大陸城市。

 

門口點餐紙寫花甲粉$59、百搭粉$49,兩者基本只係相距$10,到底有咩分別呢?可以點選粉絲、米線$3、烏冬$3、米粉$3、粗米線$5,重有芫荽、蔥、炸蒜,加上餸菜自行勾選,其實就似足港式車仔麵,一般餸菜款式唔太特別,但整體價錢卻又比車仔麵貴近一倍,既然餸菜同車仔麵相似,編輯就只點選較車仔麵特別少少嘅台灣腸、芝士魚腐、帶子、竹笙,只係帶子只有雪藏帶子包裝嗰種超細粒嘅帶子,竹笙則為比較吸收湯汁嘅餸菜款式。至於湯底方面,辣度由清湯到BB辣,以致大、中、小辣,甚至魔鬼辣都有,而麻度亦有一樣程度可擇,起碼BB辣真係微辣。

 

踏入店舖,最先映入眼簾嘅必定係兩面牆身嘅美少女戰士裝飾,一望而知店主係Sailormoon忠實擁躉,一件件珍藏全都推出嚟作展示品。不過,店舖甚小,就只有一排3至4個座位,堂食空間有限,而且甚為狹窄,但可以觀望每一碗招牌花甲粉都以大碗盛載。室內有建議食法,外賣先將一半麵條同材料倒入湯內,食到一半再加入剩低一半麵條同食材,先算係正式食法。

 

原來,花甲粉同百搭粉湯底完全一式一樣,後者既無蜆肉、亦無花蛤,若然係咁嘅話,編輯認為百搭粉確實太貴啦!至於招牌花甲粉,內有約8至10隻蜆肉,而蜆肉質感薄,並唔係大粒飽滿,唔係厚肉,但帶有鮮甜,入口無沙。編輯唔太識分花蛤、蜆、沙白,3樣的確係截然不同嘅貝殼類,只有細微分別,但以紋理嚟講,係似花蛤。



驟眼睇嚟,湯底應該會有重蜆肉味,頭啖湯的確可以感受濃郁味道,甚至係覺得惹味,的確係濃味選擇。無可否認,小店係有用少少蜆肉嘅水熬煮湯底,有少少鮮甜味,不過當繼續食落去嘅時候,會發現愈食愈口渴,入口似Monosodium Glutamate,又或者即溶嘅調味材料。

E.A.Tips :

❶ 店舖只接受現金支付。

❷ 購買粉麵有時加錢可以有多一款小食,詳情要睇返官方Facebook或IG。

❸ 落場時間為14:00至18:00,凌晨1點截單,星期日休息。

❹ 加花甲$25,加底$5。

❺ 小食有糖醋皮蛋$20、涼拌青瓜$18、涼拌蓮藕$18。

❻ 最好先打電話落單,因為等候時間至少有15至20分鐘。

EATWO
Miss A
元朗花甲粉

元朗花甲粉

元朗水車館街2號東輝閣地下10號舖
星期一至六12:00 – 17:00
、18:00 – 00:00;
星期日全日休息
6177 4317