夏天氣溫上升，天氣悶熱，覺得燥熱又上火？對於生活作息唔定時嘅香港人嚟講，涼茶都係需要嘅產物，但要去藥房買材料自己煲，就未必個個識，亦唔一定有時間，故有啲人會選擇直接去涼茶舖買。只不過，要拍拖兩個人找尋合適嘅涼茶舖唔容易，編輯推介元朗國一間新式涼茶舖，望落雖然似茶飲店，但餐牌內囓都係中式涼茶，反而有種中西合璧嘅感覺。
店舖正對元朗河畔，離鳳琴街體育館不遠，從外面觀察，只係見到係一間「茶坊」，經過亦係難以發現呢間原來係一間涼茶舖。店舖裝潢新簇，與以往所認知嘅舊式涼茶舖截然不同，並無古董銅壺，只係恍若一間市場接近飽和嘅台式茶飲店。望向餐牌，就只有竹蔗茅根、靈芝龜苓茶、雞骨草茵陳茶、夏柏㐂花茶、山楂蘋果茶5款飲品，加上限定推介陳皮小豆袪濕茶 500ml($25)/ 650ml($30)，就只有步行入內先會發現，原來主打手作涼茶，並唔係一間台式茶飲店。
對於年輕人嚟講，可能未必會點選舊式涼茶舖嘅涼茶，反而編輯呢啲「老餅」先會光顧，大多數人都會挑選茶飲。驟眼睇嚟，呢間新式涼茶舖似乎就看準年輕人嘅習慣同貪新鮮刺激嘅特質，以新式茶飲店與舊式涼茶自然融合，令年輕人都能夠隨時保肝降火。
比較常見嘅涼茶款式係雞骨草茵陳茶 500ml($25)/ 650ml($30)，可以自選少糖或無糖，能夠預防及舒緩牙肉腫痛，雖則可以袪濕清熱，但體虛寒涼者就需要酌量飲用。涼茶包含雞骨草之餘，亦有茵陳、生地、熟地，生地清熱涼血，而熟地滋陰補血，苦味變甘，整體容易入口，兩者皆有難道取其平衡？涼茶點少甜的確係少甜，既能解渴，亦能清熱。每一款涼茶都寫有功效，雞骨草就有助保肝養肝兼解肝毒，可以袪濕清熱，調理腸胃，改善排泄系統，而且健脾消滯，比較適合經常熬夜之人，甚至燥熱、嗜辣、生痱滋、常喝啤酒嘅人，又或者身體出現疲乏水腫，食欲下降，腸胃不適之人。
夏柏㐂花茶 500ml($25) / 650ml($30)，所謂㐂花茶就係由七種花合成，包含白菊花、木棉花、金銀花、雞蛋花、槐米、夏枯草、茵陳，當中金銀花含蓄而溫和，略帶苦澀味，菊花則有獨特香味，加上木棉花，槐米花亦能夠清熱下火。涼茶整體味道帶有甜味，唔會太單寡，滲出陣陣花香，低調而出位，僅蘊含微微藥味。㐂花茶既有七花混合，功效亦大，有助清熱下火、平肝明目、解毒止血，夏天能夠預防中暑、風熱感冒，亦可以抗炎抗菌、降火利尿，比較適合燥熱上火，又或者係經常眼睛乾澀，甚至肝熱肺熱，頭痛眩暈之人。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 小店位置係正對元朗大坑渠，近壽富街好順福商場。
❸ 店舖不時有限定款式，詳情要睇官方Facebook或IG。
四季茶坊
元朗元朗安寧路79號福安樓地下C號舖
10:30 – 20:30
