【野餐隨行】塘福泳灘抓緊夏天尾巴！大嶼山沙灘歎潮州雲吞麵 識揀頹食都可以變美食

雲吞麵、魚蛋麵、牛腩麵等潮州粉麵通常都係平價食品，有啲人會定義為頹食，通常係想慳錢，又或者一個人唔知食乜好，就會選擇求其食碗粉麵。但若然拍拖兩個人想食飯有啲質素，可以在地點上入手，只要選擇一個靚景地，再加上自備少量餐具，甚至用餐架生，都一樣可以變成一個屬於自己嘅街邊食堂。而編輯今次就選擇從東涌買兩碗粉麵，到大嶼山塘福泳灘，沙灘多數為外藉人士，環境清靜而舒服，係一個能好好享受嘅用餐同迆嘅地方。

位於東涌逸東邨嘅「金銘潮州粉麵」，門面又金又紅，相當搶眼，位置離香港街市及紅色皇冠郵筒不遠，係區內4間同路人小店中其中一間。店舖由2016年左右開業至今，主打正宗潮州粉麵美食，比如係牛腩、牛筋、手打魚蛋，於其他區都有分店，全港合共有7間分店。

潮州粉麵不單價錢平，而且可以醫吓肚，雖然價錢上同旺角低至$20嘅潮州粉都店相比係貴一倍，但水準上同時係出色一倍。

乘搭一程巴士路線，即可以前往大嶼山內嘅沙灘野餐，大嶼山區內嘅康文署正式泳灘有3個，除咗一早俾人玩爛嘅貝澳，亦有編輯好早期發現嘅上下長沙泳灘，但後者目前人流愈來愈多，倒不如搭多個站去第3個沙灘，目的地係塘福泳灘。

塘福泳灘係相對人流較少嘅沙灘，沙灘內多數係外藉人士，不過背後私人營地開設之後，本地人數目稍有增加，但都算可以接受水平。

鮮蝦雲吞撈麵$47，湯麵$33，麵條爽滑彈牙，湯汁清甜，內有鹼水味。雲吞大隻而飽滿，皮薄餡靚，內餡鮮蝦足料，蝦肉爽口，豬肉鮮味，一碗有4隻雲吞。

而紫菜魚三寶麵$51，分湯加$1，麵條一樣，湯汁本身算清，相對前者係多咗一重紫菜鹹香。魚三寶亦即係手打魚蛋、魚片頭、魚餃，2粒魚蛋加3件魚片頭，再加2舊魚皮餃，魚蛋、魚片頭本身有鹹香，質感都夠彈牙，魚皮餃內餡蝦肉，都算足料。

塘福泳灘位於大嶼山一角，離上長沙泳灘末端只有好短嘅距離，故沙灘水質基本同上下長沙相近。沙灘上沙粒幼滑，近海邊更出現黜黑沙粒，俗稱黑沙，充滿礦物質，水質澄澈，水清沙幼，整體環境舒適，吸引唔少人到塘福游水、曬太陽。

據環保署環境保護互動中心資料顯示，塘福泳灘長度僅約150米，而水質從1988年至今長期維持於一級良好水平，而今年5至9月都一直保持良好至一般水平，大多數情況都係良好水平，而大腸杆菌含量亦一宜屬良好水平。

從沙灘處眺望，可以見到幾個小島嶼，包括有茶果洲、石鼓洲，沙灘內不時有流浪牛出沒，雖然好大隻，但都算善良。

相對於大嶼山另外2個泳灘，塘福泳灘海床較淺，行出去較遠都仍算淺水，但又唔夠貝澳咁淺水，而塘福風浪及海浪較其餘2個沙灘大而急速，需要特別小心安全，比較適合沖浪，都算係一個迷你滑浪勝地。

塘福泳灘座向東南，同上下長沙泳灘嘅共通點係一個日落勝地，黃昏時份，沙灘一隅可以觀賞夕陽餘暉，風景優美，於沙灘Relax完之後，不妨留低平靜觀賞日落景啦！