eatwo 兩個人醫吓肚

【#360度風景】清水灣郊野公園係熱門郊遊選擇，而清水灣又分為南北山脊，最出名嘅要數龍蝦灣、釣魚翁，兩道郊遊徑基本上都唔算太困難，適合拍拖兩個人輕鬆遊覽，今次就由坑口出發，經上洋山前往廟仔墩，再征服被稱為「香港三尖」之一嘅釣魚翁，已經係清水灣半島內最高嘅山，2至3小時可以到達相思灣、大坳門方向。

【#馬拉叻沙】大角嘴美食眾多，編輯幾乎已經掃勻全區，當中重有一間只做晚市外賣嘅微舖，易拉架置於大角嘴道，眼見宣傳中以馬來西亞叻沙作招徠，以為係一間星馬菜式嘅小店，殊不知原來另一樣菜式更出色，確實值得拍拖兩個人一試。

【#穿越墾丁】龍脊同鶴咀係一早吸引唔少人前往遊覽嘅郊外路線，編輯純粹記起未寫過呢兩條人氣路線，所以先特別再去一趟。的而且確，龍脊、鶴咀都係難度極低而風景優美嘅路線，無論係拍拖兩個人散吓步，抑或係一家大細合家歡行山都非常適合，當中鶴咀則恍如穿越台灣墾丁！

【#日式丼飯】平時兩個人食日式丼飯，通常都係餐牌有咩配搭就食邊款，旺角就有一間丼飯專門店容許客人自選魚生刺身配搭，搖身變成3餸丼飯，情況恍如港式車仔麵，自選刺身後，一碗丼飯價錢同平時拍拖去食正常丼飯差唔多，CP值都算高，更特別之處係蟹膏似足一坨糞便，到底味道係好係壞？

【#LocalTour】週末拍拖兩個人去邊好？好多人想去離島一日遊，只會諗到坪洲、長洲、南丫島等著名島嶼，以致幾個小島經常被擠得水洩不通，但事實上想登小島遊覽，亦有其他選擇。今次編輯就帶大家到兩個真正嘅香港小島，吉澳、鴨洲係香港最北端嘅小島，比東平洲更近邊境，一個有天然地質公園風土地貌，另一個有2021年9月先開通嘅文化徑，而船班次亦係週末限定，只有指定時間先會來往兩個小島，十足真正嘅香港「Local Tour」！

【#越式碟頭飯】中環有一道巷弄隱藏於鬧市之中，走到最末端會發現一間越南餐廳，尤如一間港式快餐店，由價錢到質素都係講求平靚正，相當經濟實惠，而且唔只有越南河Pho，更有越式碟頭飯，可以算係中環糧尾救星，值得拍拖兩個人去試吓！

【#無污染水塘】大嶼山南岸山徑眾多，亦有唔少靚景沙灘，當中貝澳就係其中之一，從貝澳起步，一條路線可以輕鬆直達十塱村內一個澄澈而無雜質嘅小水塘，水塘位於芝麻灣半島，即使拍拖兩個人唔走山路，亦可以經全瀝青路到達水塘。

【#海濱步道】牛頭角食肆基本同觀塘相近，大多匿藏工業大廈內，而離觀塘海濱公園只有5分鐘步程就有一間日式居酒屋，靠近巴士站，平常較少人留意，適逢近月晚市只有外賣自取，小店亦有特別餐牌，每份都適合拍拖兩個人野餐外賣，可以帶到海濱長廊開枱野餐㗎！