中環真巷弄越僑快餐點只賣Pho 最深角落兼賣平靚正越式碟頭飯

中環有一道巷弄隱藏於鬧市之中，走到最末端會發現一間越南餐廳，尤如一間港式快餐店，由價錢到質素都係講求平靚正，相當經濟實惠，而且唔只有越南河Pho，更有越式碟頭飯，可以算係中環糧尾救星，值得拍拖兩個人去試吓！

位於中環嘅越僑快餐店，躲藏於鐵行里呢道真巷弄最深角落，所謂高手在民間，美食亦通常唔喺大街上，要瓹窿瓹罅先會搵到。越僑本身意思就係指越南移民，可以係海外嘅越南人或者有越南血統嘅人，據悉店主就係越南人。

呢間越南菜館嘅招牌係秘製撈檬同越南粉，更有越式碟頭飯，餐牌內一般以碟頭飯、粉麵為主，午市大多約$50就有交易。另由於越南曾經係法國殖民地，所以部份菜式都帶有法式風格，例如係法式牛柳粒紅飯，似乎同蒜蓉牛油雞翼一樣都好受客人歡迎。

越南Phở字即係廣東話嘅河粉，本身都係由廣東移民帶到位於東南亞地區嘅越南，越式四牛湯河$59 包含生牛、熟牛、牛柏葉、牛丸，份量唔少，湯底以牛骨熬煮，同地道越南粉一樣受法國菜影響，湯頭顏色偏深，味道濃郁，加上炸蒜、洋蔥、魚露等味道更甘甜香濃。

越南粉亦包括牛、芽菜、薄荷、羅勒、芫荽，另佐以青檸、紅辣椒粒，令整體更清新開胃。而生牛肉以熱湯燜熱，熟牛肉嘅肉質似牛腩，生牛入口比熟牛軟嫩，牛肉脂肪唔多，牛柏葉唔韌，而牛丸亦好彈牙，可惜得一粒。4款牛再加上軟嫩嘅蘿蔔點綴就更清甜可口，至於河粉亦唔係變成糊口狀態，軟硬度適中，口感略帶爽滑。

至於香茅豬扒飯$53 就恍如港式碟頭飯，大大碟而平靚正，飯量、肉量都夠多，可以飽肚，白飯軟熟，豬扒厚身，略帶焦香，而香茅味亦幾濃，好香口惹味，豬扒唔會太乾身，亦唔算油膩，更唔會黐牙。

既可配搭透心涼嘅凍檸茶，亦可以選擇溫暖微甜嘅熱菜蜜，加上裝潢恍如茶餐廳，唔太起眼，似足港式快餐店，搖身一變成為越式快餐店，的確係幾出色，有啲臥虎藏龍嘅感覺。