觀塘海濱長廊野餐好地方！牛頭角日式居酒屋晚市自取丼飯壽司便當

2022-03-30 2023-02-09 / 公園野餐、和之幸、外賣、安心野餐、步行野餐、海景野餐、牛頭角一日遊、牛頭角好去處、牛頭角打卡、牛頭角景點、牛頭角美食、牛頭角路線、牛頭角野餐、牛頭角黃店、良心食店、觀塘打卡、觀塘海濱、觀塘野餐、觀塘黃店、郊外野餐、野餐2022、野餐地點、野餐好去處、野餐推介、野餐隨行、隨時野餐、露營野餐、香港人野餐、香港野餐 / 作者: 撰文﹕Miss A ；攝影﹕Mr E, Miss A；設計﹕Mr E

牛頭角食肆基本同觀塘相近，大多匿藏工業大廈內，而離觀塘海濱公園只有5分鐘步程就有一間日式居酒屋，靠近巴士站，平常較少人留意，適逢近月晚市只有外賣自取，小店亦有特別餐牌，每份都適合拍拖兩個人野餐外賣，可以帶到海濱長廊開枱野餐㗎！

毗鄰觀塘道巴士站嘅和之幸，一直都好低調，本來係一直以串燒、刺身、清酒為主嘅日式居酒屋，店內設計亦以居酒屋為藍本，小店地方唔大，但樓底夠高，有落地玻璃窗，無侷促感。最近因停晚市而於晚市只能提供外賣自取餐單，當然餐牌內都可以點選。以日式料理嚟講，價錢算吸引，包括丼飯、壽司套餐，有熱葷亦有冷盤。

4款丼飯$78至$158，另外6款定食、生熟丼飯，當中海鮮丼$88 內有幾款刺身，包含三文魚、魷魚、八爪魚、蟹籽、紫菜碎，重有隱藏喺底嘅油甘魚，每款刺身都有2至3塊，份量適中。刺身都算新鮮，壽司飯微黏，壽司醋與米飯比例恰好，不過不失。蟹籽份量充足，魷魚、八爪魚偏薄身，三文魚、油甘魚則厚度適中，而且較肥美、有油香。

壽司3個Set$88至$138，每份7款，Set C有三文魚、熟蝦、玉子、芥辣八爪魚軍艦、明太子軍艦、拖羅蓉軍艦、蟹柳細卷一條，三文魚壽司、熟蝦、玉子、蟹柳卷皆不過不失，比較特別嘅係芥辣八爪魚軍艦、明太子軍艦、拖羅蓉軍艦，芥辣八爪魚有輕微刺激，拖羅蓉則腍滑、肥美，而明太子軍艦則似鮟鱇魚肝加明太子，魚肝狀似魚春質感，鍾意嘅會鍾意，唔鍾意就點都唔會鍾意。

坐於觀塘海濱公園長廊用餐，正對無敵大海景，對面為啟德郵輪碼頭、跑道公園草地，同樣為野餐選擇，海中心停泊多艘豪華郵輪。而海濱長廊長逾千米，一直由順業街延伸至駿業街，近觀塘碼頭，長廊可以眺望對岸香港島、鯉魚門、維港海景，適合邊野餐邊吹吓海風。

「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。

E.A.Tips :

❶ 店舖毗鄰觀塘道巴士站，近巴士站最盡頭位置。

❷ 晚市外賣自取17:30-21:30，無加一服務費。

❸ 由店舖步行到觀塘海濱，步程只係5分鐘。

❹ 觀塘海濱巴士路線11D, 15A , 15P , 23, 74X, 80, 80P, 80X, 83X, 93A, 215X, 268C, 269C可達，小巴路線22A, 68, 103可達，亦可於觀塘碼頭乘搭渡輪來往觀塘至西灣河或北角至觀塘。

❺ 由觀塘海濱花園步行，經香港兒童醫院，可以去到啟德郵輪碼頭同跑道公園，腳程大概係15至30mins。