大嶼山貝澳沙灘起步 輕鬆遊芝麻灣半島徒步十塱村無雜質小水塘

大嶼山南岸山徑眾多，亦有唔少靚景沙灘，當中貝澳就係其中之一，從貝澳起步，一條路線可以輕鬆直達十塱村內一個澄澈而無雜質嘅小水塘，水塘位於芝麻灣半島，即使拍拖兩個人唔走山路，亦可以經全瀝青路到達水塘。

前往貝澳沙灘，通常會於新圍落車，但如果於羅屋村或老圍村落車，就可以穿過鹹田新村小路直達芝麻灣道，既可以望貝灣沙灘，亦可以直搗芝麻灣半島十塱水塘。

貝澳本名杯澳，沙灘地形狀似螺，為一個沙咀，位處大嶼山南端，內含多條村落，露營車營地外亦有多隻大水牛，位置為貝澳露營車JK Club所在地。具澳沙灘正對貝澳灣，背靠南大嶼郊野公園，青山環繞，山巒起伏，可眺長沙下村，亦可望東面芝麻灣，同時適合黃昏睇日落。

不過，貝澳營地幾乎已經被玩殘，連私人土地都曾被地主投訴被人強行入侵紮營，又或者大玩車中泊，嚴重者更遺留大量垃圾，而現場所見唔少人都選擇於沙灘擇地露營。貝澳曾為電影《旺角卡門》取景拍攝地，沙灘海水水質被評為良好至一般，沙粒幼細，而盡頭一角距離對岸芝麻灣僅約50米，芝麻灣道上可見天后廟，皆因昔日村民以務農及打漁為生。

芝麻灣道其實即係鳳凰徑12段，一直沿路走到盡頭，可以前往芝麻灣公眾碼頭、芝麻灣半島內嘅十塱水塘，路段全程為瀝青路，而芝麻灣公眾碼頭嘅渡輪可來往長洲、梅窩。芝麻灣道中途可以連接芝麻灣郊遊徑，十字路口北端可連接鳳凰徑，上行可登老人山及副峰廟仔墩，左右兩邊山路分別可通往十塱營地、老人山，而芝麻灣郊遊徑係全港一道最長嘅郊遊徑，今次就先選擇走右邊小山路通往十塱營地，然後前往十塱水塘。

十塱營地本身地方不大，營位空間極細小，經過營地之後可轉往小山徑，為一道通往水塘嘅捷徑。小山路人流極少，會經過竹林通道，而盡頭可以轉出芝麻灣道瀝青路，轉右繼續上行即可通往十塱水塘。

事實上，十塱水塘位處芝麻灣十塱村，亦叫芝麻灣水塘，靠近芝麻灣懲教所，本來為附近離島區居民提供水源，改善供水問題，例如坪洲、長洲、喜靈洲，故此於芝麻灣興建十塱水塘。

由於十塱水塘於地理上位處芝麻灣半島，非常偏遠，加上綠樹成蔭，河谷環抱，經幾十條無污染支流匯集，令水塘水質澄澈，未有被雜質污染。十塱水塘為一個灌溉水塘，水位甚高，而前往十塱水塘嘅人流唔多，所以未有如同貝澳被玩爛嘅情況，愛好大自然嘅讀者可以盡情感受水塘堤壩風景，感受水塘清靜環境，盡情放空。

水塘末端可連接芝麻灣郊遊徑，通往龍尾、老人山，而從水塘折返芝麻灣道，會經過懲教所，轉入海旁小路會途經暫時已封閉嘅芝麻灣懲教所、芝新懲教所，以及芝麻灣碼頭，可遠眺喜靈洲、南丫島、坪洲。依循芝麻灣道走，會折返芝麻灣郊遊徑路口，亦可返回貝澳沙灘，一直走回頭路就可以返回嶼南道。