西貢純白村屋咖啡店小鍋年糕班戟啖啖煙韌最新消息﹕錦田有新店！

香港咖啡店向來唔止飲咖啡，重要有出色嘅食物先可以留得住客人，西貢市場街少有5間同路人咖啡店，值得拍拖兩個人前往，每一間都不單有咖啡，而且包含主食，其中一間村屋地舖就以日系咖啡店設計，純白色主調設計簡約，陽光照射下更搶眼，最近錦田更開設分店。

該村屋咖啡店既充滿日式風格，連名稱都為日文，據知店名Kachimushi嘅日文為食べログ，意指Tabelog，代表日本一個非常出名嘅日本食評網站，即日本版Openrice，內裏臥虎藏龍，匯集眾多高水準嘅Blogger。

咖啡店外圍以L形設計，位處樓高兩層嘅村屋地舖，一邊為柚木趟門，另一邊為大窗，裝潢以木系為主調，木門框加木櫈，門口有迷你榻榻米空間，配搭純白亮麗色調，低調極簡設計為典型日式風格，帶出咖啡店嘅閒適感。

雖然裝潢陳設以日式風格為主，但食物上卻又偏向西式風格，雖然款式上只有多士、吐司、沙律、蛋糕、班戟。當中，有SRF Beef Open Toast即極黑和牛多士$120，牛肉、Emmental Cheese、火箭菜、焦糖洋蔥，以法式麵包作多士底，帶有澱粉質，烤得香脆，但份量唔多。麵包頂端有軟嫩牛肉，約7成生熟度，能夠保持肉味，柔軟易入口，有少少油脂香，而牛肉既以洋蔥伴勻，亦有燻香味，牛肉之上又有大量火箭菜作沙律菜，火箭菜加入黑醋，無乜臭青味同苦澀味，醒胃亦可解去牛肉油膩感。

最有人氣嘅係Pancake，Kinako Mochi 黃豆扮年糕$68 就係其中一款班戟，包含日本年糕、黃豆粉、黑糖蜜，加$20更有一個雪糕球，可選Vanilla或Black Balsam Browine，令班戟冷熱交融，加入雪糕球會令班戟口感更刺激，但唔加雪糕球就較可以品嚐班戟原味。

熱辣辣班戟連同小型鑄鐵鍋上枱，即叫即烔，班戟外皮燻得焦黑，咬落輕脆，但餅底偏薄身，質感香軟，配搭年糕好軟糯，煙煙韌韌好Chewy，蓋過蛋香味，班戟上淋上蜜糖，而蜜糖份量唔少，令整體帶有香甜味。事實上，班戟係改良自德國班戟，有啲似美式，只不過傳到日本去，再帶嚟香港，至於呢款班戟材料同一般班戟相近，只不過係被放入焗爐當中，最後受熱膨脹起來。

店內飲品以黑白咖啡、手沖咖啡、茶品為主，Genmaicha Latte$38至$42 為玄米茶拿鐵，熱飲有拉花，奶泡浮面，茶粉適中，奶泡明顯地厚身；而Matcha Latte$38至$42 則為抹茶拿鐵，凍飲則以玻璃杯盛載，可見抹茶鮮奶紋理，鮮奶順滑，抹茶味略有回甘，只係挑選凍飲加冰後變得淡咗，整體不過不失。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 西貢店位處市場街，即西貢碼頭向海鮮街方向步行。

❷ 錦田分店位處錦田公路，地址為元朗錦田永隆圍77號地舖，電話為2721 0275。

❸ 留意西貢店同錦田店營業時間唔同，錦田店每日營業時間為10:00 – 18:00，而西貢店營業時間則為星期一至五08:30 – 18:00、星期六至日08:30 – 18:30。

❹ 注意店內有收加一服務費，接受Cash、Credit Card、Apple Pay等付款方式。

❺ 平日會比較少人，假日會需要排隊。

❻ 留意只有Walk in，無得Book枱。