白泥 
泥涌
玻利維亞鹽湖係令人嚮往嘅著名天空之鏡景點，海天一色嘅天空之鏡向來極吸引人影相，但其實香港都有好多可以拍攝天空之鏡嘅地方，任何水面、積水、雲石都可以輕鬆拍攝天空之鏡，所謂天空之鏡就係天空嘅倒影。香港中文大學雖然亦出名天空之鏡景觀超靚，但始終係大學地方，一般人唔應該隨便騷擾學生，非學生同教職員絕對唔應該闖入校園範圍。而西環碼頭亦係著名景點，雖然空間寬廣，但往往人流極多，每個位置幾乎躋滿人，都要排隊等候影相。今次就推介8個既可以影天空之鏡，又唔需要點排隊兼唔騷擾人嘅好地方啦！
【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】
（1）白泥
位處屯門嘅白泥係出名睇日落嘅好地方，不過好多人搞錯睇日落嘅位置，誤信下白泥係最佳地方，而上白泥其實先係真正靚景位置，既有靚日落，又有紅樹林，空間十足，唔會需要特別排隊影相，可以自己隨意搵一個位置都得。水面波平如鏡，只要你夠膽行出少少、企定少少，忍受泥濘隨時啜住雙腳，馬上輕易影出天空之鏡絕美相片。
白泥 
白泥
（2）泥涌
泥涌位置比較偏僻，只係一個淺水泥灘，人煙稀少，即使天陰陰都可以拍攝天空之鏡，同樣只要夠膽行過少少，都可以影出靚相，不過泥涌就較白泥危險，未必睇到邊個位置淺水同安全。
泥涌 
泥涌
延伸閱讀﹕泥涌影天空之鏡 天陰陰影吓靚相
（3）迪欣湖
靠近欣澳嘅迪欣湖中央有一個小湖，平常人流唔多，同樣可以拍攝天空之鏡，人工湖嘅湖面清澈，藍天白雲下可以清晰俯視湖面上嘅天空倒影，企於狹隘小路更加可以拍攝人像倒影，不過就要量力而為，注意安全。
迪欣湖 
迪欣湖
延伸閱讀﹕藍色小屋打卡 迪欣湖影天空之鏡超靚
（4）橋咀島
以為橋咀島只係影連島沙洲？島上有一個又一個水窪，一樣可以拍攝天空之鏡，只要無人亂丟垃圾，水面基本上清澈得可望到人像，甚至天空景。
橋咀島 
橋咀島
延伸閱讀﹕西貢最美連島沙州 小島風景勁Chill
（5）烏溪沙石灘
同樣道理，靠近馬鞍山嘅烏溪沙石灘，一般人都係為咗影心形石灘，但石灘上下雨造成嘅水窪反而更特別，可以反映天上太陽。
烏溪沙石灘 
烏溪沙石灘
延伸閱讀﹕馬鞍山石灘 最啱影婚照
（6）石澳
早前石澳著名嘅藍色情人橋同《喜劇之王》棵樹都被十號風球山竹吹爛，令唔少人少咗拍攝景點，但其實識影相一樣可以發掘到靚景之地，石灘下嘅小湖水都係拍攝天空之鏡嘅地方，不過似乎比較適合拍攝人像。
石澳 
石澳
延伸閱讀﹕石澳絕美歐陸小鎮 情人橋+天空之鏡打卡
（7）添馬公園
而金鐘添馬公園嘅雲石櫈係唔少人都知道嘅香港天空之鏡拍攝地，雲石面可以清晰反映櫈上嘅景象或人像倒影，仲有中環摩天輪作背景，添上幾分浪漫感，比較適合兩個人拍拖前往打卡。
添馬公園 
添馬公園雲石櫈
延伸閱讀﹕添馬公園最啱拍拖野餐 雲石櫈影天空之鏡
（8）流水響水塘
有「香港小桂林」之稱嘅流水響水塘，環境舒適，可以清楚拍攝對岸風景嘅天空之鏡，拍攝人像天空之鏡較困難，比較適合鍾意拍攝風景嘅朋友。
流水響水塘 
流水響水塘
延伸閱讀﹕綠意盎然 流水潺潺 「香港小桂林」流水響水塘最啱野餐露營
在〈8個絕美本土打卡點 不擾人不排隊輕鬆拍攝天空之鏡〉中有 1 則留言
留言功能已關閉。