新蒲崗有一間藏於清靜商場嘅日式便當小店，上年於逆市開業，而且非常有骨氣，講明唔會採用中國製食材，用料有心思，選用北海道白米，值得兩個人拍拖去食個飯吖！
小店以日式便當為主打，除咗採北海道白米，亦配合歐美肉、菜，連外賣盒都特別揀日本製造貨色，相當有心，加上便當即叫即做，的確係值得撐吓場。
便當款式選擇眾多，包括內含炸雞、鱈魚柳、蝦餅嘅重光招牌便當、牛肉壽喜燒便當、自家製吉列豬扒便當、醬燒牛小排便當、豚肉生薑便當、滑蛋鰻魚丼、最啱素食者嘅日式炒雜菜便當等，今次挑選親子丼 $58，選用雞上髀肉，先經拌炒過後，再加入洋蔥、沖繩蛋、醬汁，而滑蛋蛋黃同蛋白層次分明。
外賣盒嘅親子丼賣相比其他便當稍遜色，飯餸分隔，一拎起上層，下層白飯黏住上層底部。不過拎返去仍然暖笠笠，味道都唔輸蝕，飯粒軟硬度適中，雞肉同滑蛋、醬油拌勻後，好香口，加上洋蔥更香，醬汁濃稠，雞肉嫩滑，無雪味，份量唔少。紫菜另上，可自己將紫菜碎灑於飯面，保持紫菜脆度同香口感覺。
延伸閱讀﹕新蒲崗時光倒流價定食 香蔥豚肉卷肉汁豐腴大驚喜 仲有Yell Card抽！
延伸閱讀﹕泰亞箂海南雞進駐新蒲崗工業區 $50雞飯包1:1超滑雞肉
E.A.Tips﹕
(1) 觀塘新分店位於觀塘觀塘道396號毅力工業中心5樓V室。
(2) 小店同黑金堂聯乘，買便當加$12可以買杯熱帶果紅茶、蜜桃烏龍或荔枝紅茶，原價$18至21/杯。
(3) 位置於新蒲崗廣場上扶手電梯，上一層轉左行到尾就見到。
(4) 店內有座位，可堂食可外賣。
重光弁当
新蒲崗崇齡街33號新蒲崗廣場1樓B05-07號舖
星期一至六 11:30 – 20:00；星期日全日休息 
2613 0013
在〈堅持日本食材！ 新蒲崗廣場藏心思小店 重光弁当款款便當精緻有特色〉中有 4 則留言
留言功能已關閉。