港島鮮為人知配水庫大草地 20分鐘直達120年黃泥涌水塘堤壩

香港有好多擁有大草地嘅野餐地方，一般人都會揀九龍區，貪九龍交通方便，不過同時人流亦多，今次講吓港島區一個鮮為人知嘅配水庫，係大多係附近居民嘅休憩地，人流唔多，最啱兩個人拍拖去野餐！

今次呢個配水庫遊樂場靠近灣仔，由灣仔利東街向灣仔自然徑方向行，沿斜路直上，直至去到蘭谷分岔路口，向姻緣石方向行，沿寶雲道健身徑行，途中會見到古色古香嘅景賢里、綠色尖頂嘅香港賽馬會跑馬地會所，更有無數豪宅，例如高聳嘅曉廬。繼續直行到尾會去到司徒拔道，右邊係香港港安醫院，對面係東區濾水廠，再向前行1分鐘可到達箕璉坊配水庫休憩處入口處。

沿樓梯小徑下行方向走，左邊一直為鐵絲網，只需行約5至10分鐘即可到達箕璉坊配水庫休憩處。位置上，箕璉坊配水庫休憩處靠近跑緊地箕璉坊，不過灣仔行過去就比較方便。箕璉坊配水庫休憩處內有長約255米嘅緩跑徑、健身徑，大草地，既可踢波、放電，亦可野餐，都算係港島區比較少外人知道嘅配水庫遊樂場。

箕璉坊英文名為Green Lane，由1940年2月7日憲報公佈街道名稱，從箕璉坊配水庫休憩處可望銅鑼灣方向，不過隔住鐵絲網又被樓宇遮擋，景觀就唔算好遼闊，而背面有聶高信山作遮蔭，前面、左右都被樓宇遮擋，雖然可見陽光，但位置陰涼，唔會太曬，舖張野餐墊或開個帳幕野餐就會好舒服，唔會遇上西斜問題，只係日落會被遮擋。另一個出口喺對面，可停泊車輛，尚算方便，都可算係城市中一個綠洲。

如果唔夠喉，可以而從箕璉坊配水庫休憩處一口氣走上黃泥涌水塘，腳程只係約20分鐘。沿途可見黃泥涌水塘花園健身徑，前行5分鐘可到達黃泥涌水塘。

黃泥涌水塘位於黃泥涌峽，水塘建於1899年，規模唔大，儲水量低，但係本地第三個興建嘅水塘，只係規模的確唔及薄扶林水塘、大潭水塘，但同屬古老水務建築。黃泥涌水塘於1994年已被列為三級歷史建築，後來2009年水壩、水掣房、溢流口都被列為香港法定古蹟。事實上，水壩由大花崗石鋪成，頂部有通道，水掣房就由粗琢石頭築起，門窗為磨光琢石。

而黃泥涌水塘旁邊有一個黃泥涌水塘花園，靠近陽明山莊，於1986年開幕，曾於1987年獲得香港建築署年度大獎，內有粉紅、粉藍相間嘅欄杆位，曾改建成划艇公園，原本可玩水上單車，或租用小艇，但2017年後已荒廢，只屬人工湖，僅適合作為休憩處。公園本來有天鵝、鴛鴦等棲息，不過後來因禽流感而被政府捉走。

如果有興趣，可以經黃泥涌水塘旁邊山路上紫羅蘭山或大潭水塘，30分鐘內可到達紫羅蘭山。

延伸閱讀﹕【2021賞花地圖】1.5小時從黃泥涌行到淺水灣紫羅蘭山賞吊鐘花眺大潭水塘石橋

E.A.Tips :

(1) 巴士路線1, 15, 19, 24M, 6, 63, A17 都可到達箕璉坊配水庫；而巴士路線6,41A,63,66,76、綠色小巴5號亦上到黃泥涌水塘公園。

(2) 箕璉坊配水庫休憩處一邊入口為馬路，唔少人會停泊車輛於此處。

(3) 箕璉坊配水庫休憩處雖然位置比較偏僻，但其實都有保安員看守。

(4) 謹記愛護環境，自己垃圾自己帶走。

(5) 箕璉坊配水庫休憩處9月至4月開放時間為每日07:00 – 18:00，而5月至8月開放時間則為每日06:45 – 18:45。

(6) 箕璉坊配水庫休憩處內係唔可以攜帶寵物，需要留意。

(7) 黃泥涌水塘花園內有洗手間、已結業嘅小食亭、汽水機、涼亭，可作休憩處。