石崗 雷公田村 火紅木棉花

【2021賞花地圖】紅棉列隊石崗軍營兩側 雷公田村賞火紅木棉花極清靜

[sig_post_pv label=””] 個人瀏覽過





春天來臨,又係賞花季節,木棉花已經週街都係,到底重有咩特別?要數最值得睇木棉花嘅地方,一定係位於錦田石崗嘅石崗軍營同雷公田村,前者左右兩排高大嘅木棉樹一棵棵列隊歡迎群眾,木棉花數量極多,異常壯觀!而走入雷公田村,更加係少有車輛嘅燒烤區 (疫情期間暫停開放),係比較清靜嘅地方賞木棉花,值得兩個人拍拖去行一行。

全球暖化引致唔少問題,寒冷溫度只持續幾日,天氣提早回暖,唔少春季花卉亦提早開花。未到3月,今年已經可以見到唔少花卉燦爛盛開,木棉花就係其中之一。而石崗軍營對出嘅木棉樹更加係高聳入雲,一朵朵木棉花掛於樹上,仰天樹頂係紅棉,俯首地上亦係紅綿,木棉花不時會掉落馬路邊,一棵棵木棉樹更並列荃錦公路兩側,都算係一道木棉夾道,極壯觀!



元朗錦田石崗村嘅紅棉往往係必去嘅賞花熱點之一,而沿路走到雷公田村入口,走到燒烤區內可清靜地欣賞一朵朵大紅花。木棉被稱為紅棉或英雄樹,有花無葉,火紅色木棉花鮮艷奪目,一般花形偏大,有五瓣花冠,每朵甚有重量,2月下旬已經逐漸燦爛盛開。

石崗軍營係香港軍營,為駐港解放軍用地,曾於英殖時期為英軍使用,而沿路向雷公田方向嘅路都係軍營宿舍嚟,門口目前有幾個軍人駐守站崗,千祈唔好胡亂闖入影花呀!


E.A.Tips :

(1) 乘搭巴士路線64K,64S,251A 或小巴路線72,72M,於上村公園落車,公園對面為八鄉上村村公所,由錦上路轉入錦田公路,再由迴旋處轉入荃錦公路,沿路亦有巴士路線51可以到達,車費為$8.9,兩旁有一棵又一棵木棉樹列隊歡迎。步行約10至15分鐘可到達雷公田入口,再步行約5至10分鐘,則可到達一個又一個燒烤場,裏面亦有木棉花盛開。

(2) 荃錦公路兩旁為石崗軍營,謹記唔好胡亂闖入,以免犯法,甚至有機會被送中。

(3) 新界錦田石崗村位置喺林錦公路、荃錦公路交界,南面為雷公田。

(4) 如果乘搭64K往大埔方向,謹記去到上村甫落車前,要到再次拍八達通卡,以獲得回贈差額,皆因係分段收費,車費為$5.8,否則要繳付全程$8.4車資。

(5) 附近為解放軍軍營,謹記賞花打卡要保持安靜。

(6) 記得自己垃圾自己帶走。

(7) 木棉花數量極多,可以隨意砌出自己喜愛嘅形狀。


(8) 石崗村同石崗軍營係兩個地方嚟,距離有2公里,謹記位置係靠近上村公園、荃錦公路,唔好去錯地方。


石崗村

新界錦田石崗
24hours

雷公田

大欖
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈【2021賞花地圖】紅棉列隊石崗軍營兩側 雷公田村賞火紅木棉花極清靜〉中有 1 則留言

留言功能已關閉。