大埔 慈山寺

入場有限制!大埔慈山寺偽旅行驚現仿日本神社御手洗 必睇全球第2高巨型純白觀音像

[sig_post_pv label=””] 個人瀏覽過





提到大埔大美督,大多數人只會諗到踩單車入水壩,而最近龍尾灘開放,縱然灘上出現海膽,仍吸引唔少人慕名而至,以至龍尾灘附近更擁擠,但其實大埔汀角路重有其他免費地方值得拍拖兩個人遊覽,當中山上就有一座以修行為主嘅寺院,毋須攀山涉水,不單融合中日式設計,更有高聳入雲觀音像,入面亦遍佈影相位,甚至神還原日本神社御手洗!

延伸閱讀﹕香火鼎盛背後藏亭台樓閣 黃大仙從心苑城中仿古園林

呢處大埔秘地係鄰近大埔洞梓嘅慈山寺,背靠八仙嶺山腳而未到大美督船灣淡水湖,逾10年來以「淨」、「慈」、「行」為宗旨,由香港首富李嘉誠先生斥資興建兼負責日常經費,以弘揚佛法兼淨化心靈。慈山寺內可俯瞰大美督風景,眺望船灣淡水湖、大美督水壩,甚至馬屎洲、科學園、馬鞍山方向盡收眼底,寺內集山水靈氣、日月精華於一身,大自然景觀一覽無遺,可同時淨化眼球同心靈。

寺院建築設計甚為低調,只採用原木建造,棕柱、瓦頂用色都配合天然環境,每一處都精緻而樸實,令寺殿、僧寮、觀音像更突出,莊嚴氣氛中帶有祥和感,同時慈山寺位處山上,環境清幽,令人豁然開朗。慈山寺有如隱藏森林嘅佛寺,聯想到四個大字「上善若水」,加上陽光寧舍猛烈,更有「靜修」修行氣氛。

慈山寺分3個區域,包括主殿區、觀音聖像區、博物館區,主殿內氣氛莊嚴肅穆,踏入「解門」後見到第一個大殿彌勒殿,其中就有四大天王,即四大金剛,中央則有彌勒佛,兩旁有18座佛像,殿外有鐘鼓樓、鐘樓、地藏殿。入面大庭院有「大雄寶殿」,建築參照唐代佛寺設計,正前方則有一座青銅燈籠,仿日本奈良東大寺,而殿內就有供奉釋迦牟尼、藥師佛、阿彌陀佛,背後有仿敦煌石窟壁畫、《心經》。但編輯覺得山門兩側迴廊反而有如日本京都,而一邊有唔對外開放嘅「藏經閣」,穿越「大雄寶殿」後會見到「寶殿」後花園。

兜個圈折返原地,向純白觀音像方向走,會見到「藏經閣」另一邊有「普門」、「洛伽池」,隔離就有兩邊「供水」之處,皆因此處係以奉水取代其他供奉物品,只需取一個水缽,然後到取水池勺水,再雙手拎住水缽,一步一步走向觀音聖像方向,恭敬地將水倒入千處應中,以澆水方式供奉,沿途可見一棵棵古羅漢松。供水之處有如日本神社嘅「御手洗」,但位置唔係用作洗手,只係寺廟唔燒香,以「供水」方式祈福,潔淨身心。



正前方嘅巨型純白觀音像為由青銅、合金打造嘅如意輪觀音像,左手持有淨瓶,用作施灑淨水,右手則手持一串如意寶珠。慈山寺觀音像有足足25層樓高,大概係76米,比香港天壇大佛還要高,係全球第2高嘅觀音像,僅次於108米高嘅海南南山海上觀音聖像。值得一提,素白觀音聖像附近非常清靜,由低點仰視觀音聖像更高聳入雲,加上觀音聖像旁有大量蟲鳴叫聲,環境相當舒服。

慈山寺觀音聖像底部有於2019年先開放嘅佛教藝術博物館,係慈山寺唯一有冷氣嘅地方,館內遍佈珍藏佛像、經文等,歷史悠久,相當有觀賞價值。當中有一座幾特別嘅佛塔,由斯里蘭卡國王送贈,從窗口可見佛塔旁邊有好多珍寶、晶石、經書,據工作人員所講,經書係代表智慧,而佛塔上亦有一條白色哈達,類似西藏哈達,而白色代表純潔、善良,藍色則代表男仔、天空,綠色代表女仔、海洋,至於黃色就有尊貴意思。離開博物館,可以沿斜路走上純白觀音聖像方向,再環繞聖像走一圈,然後折返供水位置。


E.A.Tips :

(1) 由大埔墟小巴總站乘搭20B,前往洞梓方向,落車位置為洞梓路、普門路交界,沿洞梓路前行,然後轉入普門路,上山走約10分鐘,大概係800米,即到達慈山寺門口,每班車相隔約10至20分鐘,車費約$7.3,車程約20至30分鐘。而落車後亦可穿過村屋折徑,於普門路會合。而20C則同樣於䃟頭角落車,沿洞梓路轉入普門路上慈山寺,每班車相隔4至10分鐘,車費為$7.7。至於20T則可以直接上慈山寺門外,只於星期一至五提供服務,但大埔小巴總站班次只限09:15、09:45、13:15、13:45,而慈山寺門外班次則有11:30、12:00、12:30、13:00、13:30、15:30、16:00、16:30、17:00,車費為$7.3。

(2) 離開慈山寺後,如要折返大埔市中心方向,唔太建議乘搭小巴路線,皆因人數眾多,等候時間較長,建議沿洞梓路前行約5分鐘,於汀角路乘搭巴士路線75K,車費約$5.8,車程約20至30分鐘,又或者72C,73P,74E,75P,275R,全部都可以往返大埔方向,而且班次更密。至於乘搭的士來往大埔小巴總站至慈山寺,車費大概係$70。

(3) 進入慈山寺前,必須預先登記,參學過程採取「先到先得」方式,名額絕對係一個難求,尤其係週末,每日朝早8點開放全新名額,不過間中可以碰碰運氣睇有無人臨時取消預約騰空位置出嚟。一個人可申請與1至5人同時入內,一般可預早一個月登記參學,但留意個人預約每日只有400個名額,而每次最多6人入寺,登記時間有 09:30、10:00、 10:30、 13:30、 14:00、14:30,每半小時至1小時一個Round,登記後1小時內會收到電郵,登記無得轉讓,入場後可自由參觀,但17:00就必須離開。如果想參學時少啲人,就最好揀最早嘅時段,因為入場時間有限制,但逗留時間無限制。

(4) 入寺時需要出示確認電郵同身分證明文件,門口保安會確認身分同人數,而參學時間有30分鐘遲到寬限,入寺時必須佩帶參學證。

(5) 洞梓靠近大埔汀角、船灣,慈山寺可環瞰全海景。

(6) 慈山寺為佛門清靜地,踏入慈山寺後,謹記遵守寺院規則,要輕聲細語,勿大聲說話,同時必須穿著莊重服裝,必須係有袖上衣、長褲、七分裙或七分褲,唔可以無袖上衣或短裙短褲,進入殿堂亦需要除帽。

(7) 需要做足防曬措施,同時預備充足糧水,而寺內亦嚴禁吸煙,謹記自己垃圾自己帶走。

(8) 慈山寺為清修道場,道場莊嚴,必須注意進入任合殿堂係嚴禁拍攝或攝錄,唔好觸摸佛像、法器或植物,但殿外就可以自由拍攝。

(9) 慈山寺以修行、靜心為主,以供水取代燒香、供果、冥鏹,唔好帶上香燭。

(10) 上山前記得留意天氣狀況。

(11) 寺院嚴禁攜帶寵物入內,除咗導盲犬,亦無寄存服務,但進入博物館時就需要將隨身行李放入Locker。

(12) 寺內有停車場,大概有約100個私家車停車位,但必須於登記時預先提供車牌,未經授權停泊於寺內係會被上鎖。現場所見唔少車輛停泊於普門路,但就被抄牌,需要俾$320罰單,所以揸車嘅話最好都係登記參學時預先申請。

(13) 部份活動如抄經、行禪、善生坊餐飲服務則因疫情已暫停,目前只有供水體驗。

(14) 慈山寺內有唔少地方係唔准進入,見到遊客止步嘅地方就唔好繼續前行啦。


(15) 佛教藝術博物館需要輪流入場,而且有分段。


慈山寺

香港新界大埔普門路88號
09:30 – 17:00
2123 8666

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!