齊柏林熱狗涉足兩餸飯再賣牛肉飯實試2層高牛丼家新店試業最平$100／5碗！

「齊柏林熱狗店」為人所共知嘅小吃店，賣熱狗賣到成為本土連鎖式小店，之前就曾經涉足兩餸飯行列，推出「齊記美食」，今年7月就再下一城，趁日本直營松屋未到港前，搶先加入牛肉飯行列。縱然香港人無咗「加藤屋」，但就多返一間「牛丼家」，新店試業期$100/5碗套票，即係旺角區最平竟然都有$20／碗牛肉飯，即刻拍拖兩個人去試一試！

齊字頭副線「牛丼家GYUDONYA」於今年7月12日方才正式登陸旺角區，選址距離旺角中心只有約1分鐘步程，交通便捷，逛街亦方便。大門口有電梯，亦可走樓梯，室內樓高2層，可以先喺1樓點餐，再選擇座位，1樓及2樓都可以隨便坐。值得留意嘅係，部份檯櫈似打邊爐檯，睇嚟遲啲可能會有一人火鍋選擇！

日式牛肉飯一直由「松屋」、「すき家 Sukiya」及「吉野家」平分市場，更被稱為「牛丼御三家」。港版「吉野家」唔關我哋事，「すき家 Sukiya」亦於近年進駐香港，更開設多間分店，連「松屋」都準備於今年夏季插旗佐敦。至於本土牛丼呢？大受港人歡迎嘅「加藤屋Katoya」於今年初已經全線結業，好彩「牛丼家GYUDONYA」於今個月正式補上，為香港人提供一個平靚正日式牛肉飯專門店。

必食之選有招牌當家牛丼及牛魔王飯，同樣分3個Size，當家牛丼即係牛肉飯，$26/S Size、$29/M Size、$48/L Size；而牛魔王飯即和牛漢堡扒，$38/S Size、$42/M Size、$62/L Size。S Size少過M Size未夠一半，但份量比較適合真係細食嘅朋友。兩種牛肉飯重分4款口味，包括加入溫泉蛋、香蔥、咖喱、雙重芝士，另有豚肉丼、鰻魚丼、雞肉丼可以選擇，通通只係親民價錢。

以賣相嚟講，當家牛丼比較美觀，的確神還原「吉野家」牛丼，牛肉、炒香過嘅洋蔥份量適中，連白飯都滲滿牛肉汁，油香十足，如果同樣有得自己再加牛肉汁就更好。不過，和牛漢堡扒丼賣相頗差勁，漢堡扒煎到又黑又燶，差啲想要直接退貨。漢堡丼同牛丼唔同，只係純白飯加幾片酸薑片，但漢堡扒配搭酸甜醬汁，好配合。其實漢堡扒本身質感唔差，而且有肉感同牛脂香，只係煎得比較差，方丈份人比較小氣，講完。

不過，套餐先有嘢飲，加$10配青菜、加$15公魚仔、加$20炸雞，炸雞就一般般啦，公魚仔較少見，略有驚喜。飲品方面，有冰紅茶、白桃汁、味噌湯、罐裝汽水可擇。「牛丼家」最大優點係唔會好似以前某牛丼連鎖專門店咁樣樣嘢油淰淰，食完隻手黐𥹉𥹉，食個牛丼都要洗手，講明先，呢幾年無食過嗰間香港牛丼，日本版就無呢個問題。