【上集】2024搶先直擊！馬灣舊村翻新變彩色小屋？古樸村莊改造文化藝術村一條路線睇埋歷史遺跡馬灣舊校／芳園書室

自從馬灣舊村封閉後，值得前往嘅馬灣影相熱點又少一個。不過據消息指，馬灣公園二期活化計劃已經竣工，E.A.Two編輯特意親身前往馬灣觀察，發覺原先嘅古樸舊村，已經翻新得七七八八。現場可見，昔日打卡味濃嘅廢棄舊村，已經變成一排排新穎彩色小屋，據悉為配合全新文化藝術村計劃，故有此設計。到底將舊村活化是好是壞，彩色小屋定復古舊村更可以吸引遊客呢？確實要拭目以待。

編輯曾屢次到訪馬灣舊村，廢棄村落中復古味濃﹐為真實廢墟地。一磚一瓦，一草一木，連同牆上舊招牌，以至牆壁及舊電線，都話俾我哋知，當中有唔少歷史故事。而馬灣舊村內，更有一塊九龍關舊界碑石，寫有「九龍關」三字，沿自於清朝光緒年間，早就被列為三級歷史建築。

延伸閱讀﹕馬灣舊村丟空多年零發展廢棄村落探險頹廢風滿滿

據悉，馬灣公園二期活化計劃已完成，包括馬灣舊村範圍。從現場可見，座落馬灣大街上、毗連馬灣碼頭嘅馬灣舊村，數十間舊村屋搖身變成一列彩色小屋！消息指，有關方面有意發展成一個藝術文化村，媲美意大利五漁村，加強保育之餘，再加上導賞團及附近開放民宿，變成全新旅遊景點。

不過發展商將舊物煥然一新，到底是好是壞？事實上，馬灣舊村本來就已經係旅客熱門目的地，正因為舊村夠舊，吸引唔少攝影發燒友及網紅前往打卡。舊村本身為古樸村莊，最有歷史價值就係其舊貌。香港與澳門好多嘢大致相同，但最大分別就係在於「保留」二字﹐而遊客到訪都係想睇該地獨有嘅歷史建築。

澳門之所以旅遊業興旺，就係識得將舊物保育，破爛就由佢繼續破爛，唔會隨便喺歷史遺跡上加加減減，通常只係加上遊徑。而香港每次都只係將舊物拆除，一係重新興建，二係重新髹返靚佢或砌返好佢。其實，歷史味道有時就係在於不完美，髹上其他色彩，仍然係一座歷史建築嘛？

睇返香港，馬灣舊村能夠保存嘅只係勉強得「九龍關」石碑，附近嘅「梅蔚石刻」同天后古廟，因為保佑水上人嘅天后古廟唔係可以隨便拆走，而石碑亦係歷史建築物。其他建築呢，一律重新翻新，舊村內嘅村屋髹上七色顏料，色彩斑爛，甚至有壁畫。而部份海邊棚屋，都已經被夷為平地，變成沙灘。就咁睇，除咗海邊天后古廟，依然有昔日漁民情懷嘅地方，似乎所餘無幾。

從馬灣舊村旁邊小路向上走，可以前往一端嘅「馬灣公園古蹟館」，以及另一端嘅「芳園書室」。而古蹟館前身其實係「馬灣芳園公立學校」，由廢棄舊校演變而成，從內到外基本保留，室內變成展覽館，介紹馬灣歷史，內含5000年前新石器時代嘅陶器碎片等出土文物及雕塑，一旁更保留唐代灰窰、清代磚窰。

而「芳園書室」同樣獲得保留，室內亦變成一個小型博物館，建築物由20世紀嘅「陳氏書齋」屹立至今，馬灣學生曾於50年代由「芳園書室」移到新校「馬灣芳園公立學校」。所以「芳園書室」係「大芳園」，而「馬灣芳園公立學校」就被稱作「小芳園」。「芳園書室」以中式折衷主義為主，上有露台，週邊有幾何紋飾通花圍欄，旁邊有麻石牆及平屋屋頂。

延伸閱讀﹕【下集】直擊馬灣舊村8大僅存完整保留打卡位！2025年翻新完畢正式開放、全變空盪盪彩色小屋？

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 馬灣舊村現時依然封閉，不過從馬灣大街可以近距離見到翻新狀況，小路可以通往古蹟館及另一邊芳園書室。

❷ 古蹟館同芳園書室現時已經開放，皆為室內空間。不過前者未有冷氣間，而後者就有冷氣開放。

❸ 現時馬灣舊村仍然封閉，所以大家只可以喺外面觀望，唔可以進入，唔好以身試法，安全最重要。

❹ 馬灣有一條全新巴士路線連接九龍區，路線為230R，來往馬灣珀欣路至地鐵九龍站，途經南昌站，價格只係$14.7，不單平啲，而且車程較快，比原先來往馬灣至葵芳嘅巴士路線更抵搭！

❺

❻

❼