尖沙嘴厚福街元祖沾麵飲茶要加錢沾湯竟遲5分鐘先上？

尖沙嘴美食選擇不少，厚福街就已經有幾間，E.A.Two其實都未完全食過晒全條街嗰幾間本土小店，不過就發覺整條街嘅餐廳價格都係偏高。上次我哋食過日式丼飯，今次就去埋對面食沾麵，除咗典型魚介湯，竟然有芝士湯、蟹粉湯，既有豚骨叉燒，亦有龍蝦、海膽、炸蠔等。感覺絕對唔係專業日式沾麵店，比較似港式沾麵，即管入去試一試。

位於厚福街中央位置嘅「元祖沾麵專門店」，地方唔算太大，大概有廿零個座位。沾麵選擇眾多，令人花多眼亂，感覺就似遷就港人嘅沾麵店，為花心、容易轉軚兼容易食厭嘅香港人提供好多選擇。包括有豚肉魚介沾麵、濃厚豚骨叉燒拉麵、元祖終極龍蝦沾麵、特製赤蝦沾麵、黑蒜豚骨叉燒拉麵、和風炸蠔沾麵等，有啲奢華感。最特別係芝士系列，有極上芝士海膽沾麵、極上芝士蟹皇沾麵、極上RACLETTE芝士龍蝦沾麵、極上芝士蟹黃沾麵。

店內獨有嘅選擇頗多，其中黃金蟹粉沾麵$78，加$20蟹粉大盛，麵條份量好多，旁邊有半隻半熟蛋，但就係筍絲。蟹粉似沾醬，以小碗盛載，另有一小碟蟹醋，配埋係有啲似食蟹，但係似蟹味薯片嗰種蟹味。蟹醬鹹度、濃度高，略有蟹味，食完好膩，一小碟蟹醬剛好可以沾完所有麵條，計到盡。

另外，特製八代海赤海老沾麵$102，價錢頗高，內有半隻半熟蛋、紫菜、幾片炙燒叉燒。平常食沾麵，一般都係麵條同沾湯一齊上檯；但呢間小店沾湯比麵條遲約5分鐘先上檯，反而令我哋頗疑惑，即係客人要望住碗麵條，等埋沾麵先食得。講真，寧願等埋一齊先上檯。日式叉燒偏薄，沾湯以熱石鍋盛載，可以保溫，雖然要等候幾耐，但熱到出煙。沾汁質感濃稠，內有芝士味，但芝士味搶過本身蝦湯嘅沾汁味，係咪芝士迷先會鍾意？沾湯內有叉燒肉粒、筍絲，份量不算少。沾湯濃稠，係有掛湯力嘅，只係麵條多。平常食沾麵通常有湯汁剩餘，今次沾麵沾到零湯汁剩低，亦無得加湯，又係計到盡。

事實上，並唔係話真係好差，但就唔想食多次。編輯真係忍唔住要批評嘅地方，只係飲茶都要另外收錢，呢點係同一般拉麵店同沾麵店唔同嘅地方。雖然寫住係宇治抺茶，但抺茶粉未溶得晒，杯底有粉狀，只係refill時係加茶，而且唔係太熱嘅茶，容易入口。始終覺得拉麵店或沾麵店都唔應該加錢，講真，寧願飲冰水。除咗抺茶要加錢，重有收加一，結果埋單竟然超過$200！大佬，呢個價⋯不如食其他。