本地有好多值得一遊嘅景點，大隱隱於朝，中隱隱於市，小隱隱於野，唔少好地方隱藏咗喺城市中嘅角落。好多人會去熱門景點影相，我哋反而會多啲探索吓各個稍為秘密嘅地方影吓相，即使係熱門景點，都有其冷門地方。
【#異國風沙灘】雲吞麵、魚蛋麵、牛腩麵等潮州粉麵通常都係平價食品，有啲人會定義為頹食，通常係想慳錢，又或者一個人唔知食乜好，就會選擇求其食碗粉麵。但若然拍拖兩個人想食飯有啲質素，可以在地點上入手，只要選擇一個靚景地，再加上自備少量餐具，甚至用餐架生，都一樣可以變成一個屬於自己嘅街邊食堂。而編輯今次就選擇從東涌買兩碗粉麵，到大嶼山塘福泳灘，沙灘多數為外藉人士，環境清靜而舒服，係一個能好好享受嘅用餐同迆嘅地方。
【#打卡點之下】中環大館同藝穗會係中區眾所週知嘅地方，兩者都位處中環鬧市，向來係拍拖兩個人攝影好去處，既然熱門到咁，相信都唔需要多講兩者嘅歷史，編輯反而想提及被普遍人忽略嘅細微之處。大館、藝穗會分別係香港法定古蹟、香港一級歷史建築物，既屬戰前建築，亦係殖民時代嘅建築物，故兩者大樓牆壁上都能夠清晰見到T形街牌仍舊存在，其中一幢更擁有4個僅存舊街牌呢！
【#鬧市尋寶】香港街道與街牌歷史只有少數人會專門研究，其實街牌的確係值得深入了解嘅歷史產物，尤其以殖民時代建設嘅T形街牌，以T字形金屬設計，造型獨特，而且能夠長久保存，經歷百年都仍舊堅固如新。不過，呢種T形街牌已經愈趨減少，今次編輯走訪旺角鬧市，發現區內剩低嘅T形街牌，只係得返3個，如果走過旺角鬧市，不妨留意吓呢幾個碩果僅存嘅香港舊街牌啦！
【#假日探索】重陽節來臨，拜山掃墓係好正常嘅事，香港墳場都係容許公眾進入，當中沙嶺公墓就係其一，如果大家有時間，不妨前往拜祭無名無姓嘅死者，對於生死問題，可能會另有一番體會。而穿過墓園，可以直達一座殖民時代建設嘅歷史建築物，於沙嶺道走到盡頭，就會見到位於南坑嘅麥景陶碉堡，呢道都算係拍拖兩個人另類嘅路線。
【#沙灘野餐】夏天既然接近尾聲，當然要抓緊尾巴，多啲到沙灘遊玩啦！雖然沙灘上有小食亭，但要飽肚少少嘅話，不妨於筲箕灣買啲嘢食，筲箕灣道就有幾間小店，有2間餐廳靠近炸雞店，亦毗連電車站，再到大浪灣沙灘野餐，然後直接落水玩，於沙灘迆足一日，兩個人拍拖都可以好簡單。
【#大埔一隅】提到大埔野餐地，唔少人第一時間都會諗起大埔海濱公園，但事實上大埔海濱公園重有一個小公園，空間相對小，人流亦較少，但多數地方都能夠正對全海景觀，係拍拖兩個人更優質嘅野餐地。今次編輯就於大埔市中心帶同3間餐廳嘅食物、飲品到大埔元州仔公園用餐，包括素食便當、人氣蝦籽麵，以及比較鮮為人知嘅咖啡店，3間位置相近，相當方便。
【#殖民電話亭】香港僅餘嘅殖民歷史痕跡少之又少，除咗皇冠郵筒、T形街牌，皇冠電話亭都係值得拍拖兩個人去影吓相留念嘅地方。如果有留意eatwo嘅讀者，應該會記得編輯曾經講過仍舊保存皇冠電話亭嘅新田加州花園，今次就講埋另一個擁有皇冠電話亭嘅地方。
【#邊境路線】天水圍米埔濕地係眾所週知嘅地方，只不過唔係一般人能夠隨便進入嘅地方，其實米埔旁邊亦有一個值得拍拖兩個人前往參觀嘅好地方。從地圖上可見，尖鼻咀毗鄰米埔濕地，整道海邊步道能眺望北方，海面水平如鏡，內有一個只需5分鐘步程就能登頂嘅超矮小山峰，不遠處更有一個非常適合觀賞夕陽西下靚景嘅蠍殼田，景色比流浮山更壯觀，兩端可以來往天水圍至元朗。
【#舊時代建築】香港歷史建築物向來係值得拍拖兩個人深入探索，其實好多歷史古蹟都係隱藏於身邊，當中尖沙嘴鬧市就有一座歷史悠久嘅建築物，設計獨特，只係位處彌敦道一隅，即使走過彌敦道，好多人都可能未必會留意到呢座建於維多利亞時代嘅建築物，都可算係大隱隱於市。
【#全新屋邨】皇后山邨於近月剛剛正式入伙，位置為著名嘅舊皇后山軍營之地，毗連建築設計獨特嘅皇后山印度廟，編輯曾經帶大家探視過印度廟環境，今次就從皇后山邨另一個角度再次探索，發現屋邨內可以輕鬆直視印度廟，而印度廟入口至今愈趨明顯，不過如果想拍拖兩個人上行探索就要自己諗辦法啦！
