【野餐隨行】筲箕灣道2間餐廳毗連炸雞店電車站直闖大浪灣泳灘沖浪勝地野餐

夏天既然接近尾聲，當然要抓緊尾巴，多啲到沙灘遊玩啦！雖然沙灘上有小食亭，但要飽肚少少嘅話，不妨於筲箕灣買啲嘢食，筲箕灣道就有幾間小店，有2間餐廳靠近炸雞店，亦毗連電車站，再到大浪灣沙灘野餐，然後直接落水玩，於沙灘迆足一日，兩個人拍拖都可以好簡單。

大浪灣位置靠近石澳半島，海灣為香港島東南面，背靠砵甸乍山，缺點係並非黃昏日落好去處，但沙灘向來以大浪聞名，適合滑浪，故大浪灣向來係一個沖浪勝地，感覺係一個充滿熱血之地，亦有人到大浪灣露營。

（1）東橋餐廳

筲箕灣道其中一間餐廳開業十幾年，以日式、港式為主，有啲似港式茶餐廳，午餐有焗飯、拉麵、日式咖哩、日式定食、日式小食，外面玻璃窗透視幾款菜式，有如日本鐵路便當般可從玻璃窗選擇，但小店大概只係裝飾品，餐牌內都有唔少款式可擇，例如有七味炸雞拉麵、日式餃子意粉、芥末牛脷串燒等，款款都算係街坊價嘅簡單日式美食。

和風定食系列有照燒雞扒定食，包括餐湯、熱飲，可揀羅宋湯、忌廉湯或麵豉湯，當然麵豉湯會比較配合日式定食。小店最大優點係一份外賣定食原價$58，外賣卻平$2，最後只需$56，毋須加$2之餘，更自動減$2，外賣比堂食優勝都算少見，尊重外賣人士嘅餐廳係特別值得支持。

如果係茶記模式，紅白湯都感覺伏伏哋，倒不如點一款配合定食嘅麵豉湯，麵豉湯為海帶豆腐湯，都算正常水準。而定食盒分隔白飯、主食、前菜，前菜既有沙律菜，亦有螺肉，而照燒雞扒不過不失，燒汁較稠身，雞扒唔算嫩，但又未至於嚡。

原來小店曾被黑白淡奶公司頒發「全城我最喜愛港式奶茶茶餐廳」，睇嚟奶茶先係店內嘅重點，但點解睇落似賣日本嘢呢？

（2）龍豬餐廳

另一間位處東橋餐廳斜對面嘅係龍豬餐廳，靠近良心炸雞店，係一間更明顯嘅茶餐廳，荐式都係以港式為主，尤其係港式碟頭飯、炒粉麵等，室內都係典型港式茶記模式，餐點重點就係快靚正，唔會等太耐。

每份快餐包括中例湯，基本上都係中規中矩，例湯係冬瓜湯，內含有冬瓜肉，湯水清甜，就普通住家湯感覺。

星洲炒米$62 可見炒粉麵水準都算唔錯，炒得乾身，內有2件蝦球，蝦肉都算爽口，星洲炒米有鑊氣，配料正常足料，不過不失。

大浪灣本身係港島徑嘅終點站，可以從小西灣步行至大浪灣。沙灘沙粒幼細，踏上沙灘時會感覺到沙粒幼滑，陽光充足，不時有微風吹拂，有機會嘅話可以一邊睇人沖浪，另一邊眺望海浪拍岸，都算舒服。而大浪灣泳灘一端可見港島徑內嘅遠古時代石刻，係香港其中一個碩果僅存嘅石刻，本來係沿海居民用作出海保平安嘅祈福之物，每個石刻都屬香港法定古蹟。

而大浪灣泳灘泳灘長度只有86米，面積不大，但海水亦算清澈，水質一直被環境保護署環保署環境保護互動中心評為2級嘅一般水平，間中會到達良好水平，多數喺1至2級徘徊。以今年6至8月計算，泳灘水質正處於一般至良好水平，所以都可以放心落水。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 兩間餐廳都毗連電車路，幾乎對面嚟。

❷ 東橋餐廳午市時間為11:00至17:45，下午茶為14:30至17:45，下午茶比較偏向港式小食。

❸ 東橋餐廳學生一律減$2。

❹ 東橋餐廳凍飲全部少甜。

❺ 龍豬餐廳午餐供應時間為11:00起，下午茶時間為14:00至17:30。

❻ 龍豬餐廳可用八達通，而東橋餐廳則只限現金。

❼ 筲箕灣巴士總站乘搭巴士路線9號，又或者對面乘搭紅Van，大浪灣站落車就得，車程約10分鐘，都可以到達大浪灣沙灘。

❽ 大浪灣沙灘設有快餐亭、燒烤爐，基本更衣室、淋浴設備、洗手間設備，因為係康文署正式泳灘。

❾ 沙灘救生員當值時間為09:00至18:00。

❿ 東橋餐廳外賣減$2，龍豬餐廳外賣加$1。

⓫ 到沙灘謹記要做足防曬措施。

EATWO

Miss A