【野餐隨行】大埔商場便攜素食便當/一口雲吞蝦籽麵元洲仔全海景公園Chill住歎咖啡

提到大埔野餐地，唔少人第一時間都會諗起大埔海濱公園，但事實上大埔海濱公園重有一個小公園，空間相對小，人流亦較少，但多數地方都能夠正對全海景觀，係拍拖兩個人更優質嘅野餐地。今次編輯就於大埔市中心帶同3間餐廳嘅食物、飲品到大埔元州仔公園用餐，包括素食便當、人氣蝦籽麵，以及比較鮮為人知嘅咖啡店，3間位置相近，相當方便。

若然你係有留意eatwo文章嘅話，應該會記得大埔元洲仔呢個地方，位置離林村河河口不遠，毗連大埔海濱公園，只係河堤之上嘅小島，目前海陸相連，內有直昇機停機坪、紅樹林，亦有早就被列為法定古蹟嘅前政務司官邸，目前演變為元洲仔自然環境保護研究中心，為世界自然基金會香港分會管理嘅地方，用作推廣環保教育活動。而元洲仔公園就係小島入口，係一個康文署正式公園，基本上就係一個普通香港地嘅小公園，內有基本設施，而公園長廊都可享全海景緻，坐低野餐時都可以特別Chill。

第一間係來自寶湖花園商場嘅全素食餐廳「V.W Vegan Cafe」，室內乾花、木系、黑板，手工肥皂、咖啡豆等小物都令人感覺係一間賣偽文青風嘅純素咖啡店，一端有大面玻璃窗，正對商場二樓，不過其實只係望到出面條路，都真係無乜景觀，玻璃窗反而變得多此一舉。由2020年開業至今，店內一直堅持初心賣素食，甚至以餃子、不可能豬柳漢堡聞名，Menu上嘅菜式以西式、日式為主，都為純素選擇，當中有日式大叔便當$88，英文就以日文寫明為Dessen Bento。講真，純素料理嘅價錢其實有啲貴，編輯估計係賣外觀嘅食店，外賣始終係輸蝕。

便當中都算係少鹽、少油，屬健康選擇，內有麵豉湯、枝豆、關東煮、椰菜花甘筍絲粟米粒蛋餅飯。麵豉湯內有海帶、豆腐，但編輯遇上意外倒瀉咗，只呷一口覺得偏鹹，但都算正常水平，枝豆作前菜都算簡單。白飯份量適中，選用珍珠米，入口煙韌，頂端放上一塊蛋餅，以椰菜花、甘筍絲、粟米粒等煎成，無乜特別，如果要形容，就係正常家庭式水準。至於關東煮就比較突出，湯僅佔三份一至一半，配料充足，內有大根、甘荀、豆腐、海帶結、芋絲、豆卜，湯底清甜，食材能夠吸收湯汁精華，當中大根、豆卜最入味，芋絲亦爽口。

第二間係隱藏於小商場內、大受歡迎嘅人氣蝦籽麵店「暢和麵家」，舊店「和暢」早年已結業，目前呢間係一間由年輕人近年創立嘅食店，雲吞麵、醉雞都係招牌選擇，雲吞蝦籽撈麵$36 就加上幾隻雲吞嘅蝦籽撈麵，呢個價錢都真係好經濟實惠。以前雲吞麵又叫「細蓉」，主要係勞動人士享用嘅下午茶，用作補充體力。「暢和」嘅雲吞比坊間雲吞麵舖細小，餡料就只有指頭般大細，豬肉味重，餡料結實，雲吞皮偏薄，狀似金魚擺尾，基本上係屬於「一口雲吞」，而傳統又的確係一啖一粒雲吞先係正宗。麵條偏幼，就典型雲吞麵舖嘅廣東幼麵，麵條鹼水味唔算重，竹昇麵經竹昇壓製，入口爽口彈牙，麵條微脆，質感係機製唔能夠取代嘅地方。

而撈麵同湯麵分別在於湯另上，若然編輯無記錯，以前傳統麵店嘅撈麵無湯汁，但後來嗰陣有客人反映無湯唔抵食，結果以後啲麵店賣撈麵時，都會另上一碗湯。而呢間麵店嘅湯底係大地魚湯，湯底芳香，大地魚獨有鮮香味的確一飲就清楚，馬上會發現就係傳統麵檔嘅味道。更特別之處係蝦籽撈麵，一份撈麵有大量蝦籽，而蝦籽由自家炒製，非常香口，蝦籽撒於麵條之上，粒粒乾身而鬆散，帶有鹹香，每條麵條都有蝦籽鮮香味，但若然大量吸入都會濁親。

第三間則位處街市、商場對面嘅咖啡店「refresh!」，分類寫澳洲菜，主打都係茶飲、朱古力、奶昔、果汁、咖啡，小食有牛角包、三文治、風車包、意大利包、鬆餅或多士。今次就挑選一杯海鹽焦糖鮮奶咖啡，熱飲$38、凍飲$42至$46，咖啡無少冰嘅情況下，冰度唔高，唔會有太多冰溝淡本身咖啡味，鮮奶咖啡混有海鹽、焦糖，海鹽較重，焦糖較少，咖啡味濃，略有層次，入口似烘焙過嘅咖啡豆。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 元洲仔公園離寶湖花園約15至20分鐘步程，喺大埔海濱公園對面。

❷ V.W Vegan Cafe 平日優惠加$25可配飲品，繁忙時間用餐時間90分鐘，Lingduck外賣平啲。

❸ 暢和麵家外賣加$1，更有人手製辣椒油可供售賣。

❹ refresh! 可自己帶杯，奶類可轉脫脂奶$4或燕麥奶$6，食物加飲品減$6。