重陽去拜山!上水出發經沙嶺公墓直闖麥景陶碉堡 圓嶺仔一河之隔眺羅湖口岸

重陽去拜山!上水出發經沙嶺公墓直闖麥景陶碉堡 圓嶺仔一河之隔眺羅湖口岸

重陽節來臨,拜山掃墓係好正常嘅事,香港墳場都係容許公眾進入,當中沙嶺公墓就係其一,如果大家有時間,不妨前往拜祭無名無姓嘅死者,對於生死問題,可能會另有一番體會。而穿過墓園,可以直達一座殖民時代建設嘅歷史建築物,於沙嶺道走到盡頭,就會見到位於南坑嘅麥景陶碉堡,呢道都算係拍拖兩個人另類嘅路線。

好多人會覺得行墳場係好「大吉利是」,直接啲就係「唔老黎」,但走過墳場,你先會明白生與死只係一牆之隔,若懂得充當生死教育課,其實都唔係咩壞事。

於文錦渡路羅湖站落車後,前行至沙嶺遊樂場,轉上羅湖道就會見到沙嶺墳場,全名叫沙嶺潮州墳場。沙嶺墳場又叫做沙嶺公墓,靠近文錦渡路、羅湖管制站,建於1950年代,本身為邊境禁區,需要禁區紙先可以通行,但由2016年起,大多邊境地方已經解禁,多個地方都能夠容許公眾進入,包括沙嶺公墓。

相對於平常城中其他政府墳場,最大特色係專門擺放所有無人認領嘅屍體,而死者都係獄中嘅在囚人士。只要細心一睇,會發現每一個死者嘅墓碑都係無名無姓,只有編號,就恍如獄中囚犯嘅編號,而呢組號碼又或者會係下葬嘅年份及月份,故一般人未能確實判斷長埋黃土嘅逝者為何人,呢啲或者就叫做無主孤魂,令人唏噓。

該墳場分為棺木段、骨灰段,編輯向墳場附近工作嘅人查詢,前段一批又一批置於青蔥山頭嘅小石碑係好耐以前嘅逝者,既無名無姓,亦只有號碼,死咗都只係淨返無名無姓嘅白骨。如若逝者於棺木段埋葬7年,就會起出再進行火葬,移至骨灰區,同樣以年份嚟劃分,但同一年份有可能埋葬於同一墓碑內。

到沙嶺墳場拜祭嘅人唔算多,只見樹影婆娑,以及蚊子,但始終有唔少有心人。如果想搵比較近嘅年份,就要一直向前步行至迴旋處。以2019年嘅死者為例,當日就見到該年死者墳前有鮮花,可見不久之前仍然有有心人同編輯一樣前往拜祭,可以選擇獻花,亦可以鞠躬,甚至簡單向亡者致哀,都係一種表達方式。

穿過沙嶺墳場之後,可以直抵沙嶺道,轉上山坡,會先經過地盤,直行到底就會見到本地其中一座麥景陶碉堡,步程只係5至10分鐘。近年,有指會被發展成沙嶺超級殯葬城,已沙嶺墳場與麥景陶碉堡之間嘅就係建築地盤。

碉堡離深圳羅湖口岸極接近,週圍亦可眺望羅湖區一帶。不過,呢座麥景陶碉堡係假日限定,因為只有地盤唔開工嘅情況下,先可以步行進入。

呢座麥景陶碉堡亦即係南坑警崗,靠近打鼓嶺,就位處沙嶺墳場背後嘅一座小山丘,海拔高約51米,週圍全為鐵絲網,鐵絲網上更有刺人嘅芒刺。身處圓嶺仔,可見碉堡附近連綿山坡皆有高低起伏,一端可回望新屋嶺、文錦渡,北面邊境則可眺望深圳羅湖一帶,以深圳河分隔,一河之隔即為對岸高樓大廈,南坑麥景陶碉堡離深圳河(第三期)擴闊工程補償保護區不遠。

如果有留意eatwo介紹嘅讀者,應該對麥景陶碉堡唔陌生,本地現時有7座麥景陶碉堡,全部麥景陶碉堡原本都位於邊境禁區內,但現時已悉數被剔出禁區範圍,而編輯已經去咗超過一半。麥景陶碉堡本身就係英屬香港時期嘅建築,曾經係皇家香港警察警崗,以作監視對岸形勢,現時為香港二級歷史建築物。7座麥景陶碉堡基本設計一式一樣,頂端都係以八邊形或圓形設計,以綠色為主調,內有生活區、水塔、機房等,牆身更有效防彈,目前全被鐵絲網環繞。

E.A.Tips :

❶ 南坑麥景陶碉堡需要經過地盤,星期日假期日子無開工先有機會可以走入去,平時地盤開工就可能禁止進入。

❷ 沙嶺公墓係安葬逝世嘅在囚人士,容許公眾入園。

❸ 巴士路線73K或小巴路線59K都可以直接從上水到達文錦渡路,而沙嶺道就近尾站落車,但唔好過新屋嶺。

❹ 進入墳場地方謹記要保持安靜。

❺ 避免黃昏或夜晚進入墳場,要預早日光時間離開。

❻ 墳場前段係比較早期嘅死者,而想拜祭近年嘅死者可以稍移玉步去後段,一直前行至盡頭迴旋處就會見到較新嘅年份。

❼ 經過沙嶺公墓,可以直出沙嶺道,左面上山方向會經過地盤,前行到盡頭就會到達麥景陶碉堡。

❽ 碉堡週圍無圍欄,要小心安全,必須量力而為。

❾ 沙嶺道沿途無遮掩,最好先做足防曬措施。

EATWO
Miss A

沙嶺墳場

禁區羅湖路
06:30–19:30

南坑麥景陶碉堡

圓嶺仔

 

南坑麥景陶碉堡

圓嶺仔