旺角鬧市3塊超古老T形街牌探究 快富街/黑布街/奶路臣街成區內碩果僅存舊街道

旺角鬧市3塊超古老T形街牌探究 快富街/黑布街/奶路臣街成區內碩果僅存舊街道

感謝瀏覽我們的網站,很抱歉,由於網站發生故障,本頁文章部分內容暫時未能顯示,我們現正搶修當中,不便之處敬請原諒。

相關內容亦可到我們facebookMEWEYOUTUBE或IG專頁找到。

 

香港街道與街牌歷史只有少數人會專門研究,其實街牌的確係值得深入了解嘅歷史產物,尤其以殖民時代建設嘅T形街牌,以T字形金屬設計,造型獨特,而且能夠長久保存,經歷百年都仍舊堅固如新。不過,呢種T形街牌已經愈趨減少,今次編輯走訪旺角鬧市,發現區內剩低嘅T形街牌,只係得返3個,如果走過旺角鬧市,不妨留意吓呢幾個碩果僅存嘅香港舊街牌啦!

 

香港由1841年正式開埠,形成維多利亞城,T形街牌則源自於19世紀末,係英國殖民時期嘅文化產物之一,街牌最大特色係以鐵框製成,上面街名為字粒式,同時係瓷製字粒,多數都係白底黑字,字粒凸出,鑲嵌上去滿滿凹凸感。

 

而傳統本地英式街牌被設計T字形,以上英下中方式呈現每一道街名,與目前嘅新街牌設計係截然不同,60年代至今嘅新街牌被設計成長方形,而且只係採用不銹鋼片,街名亦變成上中下英,清一色以電腦黑體字印出嚟,只係一塊平過平板電腦嘅平板。1997年以前,街牌不斷改進,由工務司署負責製作及管理,包括街名同街牌,之後交由市政總署管理,最後由地政總署接手。

 

呢種舊式街牌歷史悠久,多數處於戰前舊樓牆壁上,而且係單幢式樓宇,一直屹立不搖見證大半個世紀嘅城市發展同時代變遷,只係現時全港碩果僅存嘅T形街牌只係剩低不足100個,多數都被拆卸,以旺角為例,就只係得返以下3個。

 

(1)快富街

快富街英文為「Fife Street」,名字中「Fife」指嘅係英國蘇格蘭城市「快富」,街道橫跨旺角區內多條主要街道,全長有460米,包含廣東道、洗衣街、新填地街、上海街、砵蘭街、彌敦道、西洋菜南街、通菜街及花園街等。快富街嘅T形街牌位置靠近旺角中心,亦離旺角通宵紅Van小巴站不遠。

 

位處快富街嘅舊式T形街牌,正對花園街街市,近旺角中心,地址係旺角西洋菜南街168號,位於西洋菜南街與快富街之間,只有抬頭一望,先會發現呢幢戰前建築騎樓外牆上嘅T字街牌,街牌情況略帶殘舊,顏色偏黃,但仍然算清晰。街牌之上係住宅,樓下則為商舖,街牌下方可見「海天堂」招牌,由於商舖招牌凸出,故街牌猶如凹陷狀態。

 

(2)黑布街

而黑布街英文只係直譯為「Hak Po Street」,街道僅橫跨豉油街、山東街、奶路臣街、亞皆老街,中段有麥花臣球場,黑布街靠近白布街、染布房街,3條街道都係因為以前街上有染布房。

 

黑布街嘅T形街牌係位於旺角黑布街29號,位於黑布街於山東街之間,對面可見東華三院旺角複合大樓,另一端為麥花臣遊樂場。T字街牌僅置於商舖招牌上方,同快富街相似,只不過招牌唔算凸出,街牌未有感覺被凹入,而黑布街街牌甚至係凸出,相對快富街較簇新同明顯。

 

(3)奶路臣街

至於奶路臣街,英文則為「Nelson Street」,只係橫跨砵蘭街至西洋菜南街,全長有1.15公里,靠迎朗豪坊,不過該街道為旺角街市嘅一部份。奶路臣街同快富街一樣,都係同英國有關,只不過奶路臣街唔係來自城市,而係源自於姓名,因為街道名係同英國著名海軍統帥「Horatio Nelson」,「Nelson」中文則譯作「奶路臣」。

 

第三個旺角鬧市區內嘅T形街牌,係最難以拍攝嘅一個,因為街牌位處旺角街市內,街舖擺檔極多,人流更多,編輯僅為街牌留影亦被人眼超超,或者誤以為係食環之類人士。即使處於轉角位明顯當眼處,位於奶路臣街與地士道街之間嘅樂園大廈牆壁上,但T字街牌係3個旺角街牌當中最殘破不堪嘅一個,生鏽程度係最嚴重,基本上已經貌似被損毀,無咗一截,變成「一字」街牌,只係勉強見到奶路臣街英文街名。



事實上,旺角鬧市本身係唔只3個T形街牌,只係目前為止多數街牌已經被無固消失,而且係不翼而飛,呢種充滿歷史價值嘅舊街牌真係唔值得保育咩?



一直以來,唔少保育團體都促請當局加強舊街牌保育工作,但一直只聞樓梯響,政府依舊未有留低充滿保育價值嘅街牌,香港人嘅集體回憶只能藏於腦海內,就算目堵香港消失當中,也都有心無力。




E.A.Tips :

❶ 切勿塗污或破壞街牌。

❷ 快富街街牌位置近旺角中心及街市。

❸ 黑布街街牌位置近麥花臣。

❹ 奶路臣街街牌位置近旺角街市、朗豪坊。

EATWO
Miss A

快富街

旺角

黑布街

旺角

奶路臣街

旺角