(BB級行山推介) 全港 10個 市區後花園

BB級行山推介! 嚴選全港12個市區後花園 眺夕陽少人流夠僻靜

[sig_post_pv label=”瀏覽:”]





疫情期間,唔少香港人都選擇上山抖抖氣,熱門山峰往往被擠得水洩不通,而事實上香港景點比比皆是,要行山、要影相,又何必擠上同一座山呢?港、九、新界市區內,其實都隱藏唔少靚景小山,環境舒適,風景優美,黃昏可以瞰夕陽靚景,堪稱市區後花園,亦屬懶人行山之地,今次記者就為大家選出全港12個難度只係BB級,海拔由40米至300米高,而又值得兩個人拍拖遊覽嘅市區小山丘啦!

(1)尖沙嘴訊號山

尖沙嘴屬熱鬧市區之一,熙熙攘攘,好不熱鬧,而訊號山就係尖沙嘴內一個後花園,小山丘僅高40米,可近距離望維多利亞港,曾屬海角地貌,故被稱為黑頭角。訊號山內有一座充滿歷史價值嘅紅磚塔,位處訊號山花園,被稱為訊號塔,由皇家香港天文台興建,以愛德華巴洛克風格建築設計,內有旋轉樓梯,訊號塔曾為維港船隻每日報時,打風時甚至於旁邊掛起風球訊號。

延伸閱讀﹕愛德華風格文青後花園 走訪尖沙嘴紅磚塔望維港

(2)深水埗嘉頓山

講到最深入民心嘅小山丘,一定係深水埗嘅嘉頓山,呢個係唯一人流比較多嘅小山。靠近美荷樓嘅嘉頓山,位處深水埗同石硤尾之間,因小山徑靠近山腳嘉頓麵包廠房,所以約定俗成叫嘉頓山。小山丘僅高90米,只需走上一道樓梯,即可到達山頂位。從嘉頓山俯首深水埗市景,重有舊式公屋同唐樓景,非常有本土特色。黃昏時可望日落景,到咗夜晚又可以睇夜景,西至大埔道,北至澤安邨,景色一覽無遺。

延伸閱讀﹕全港最易行嘅山 深水埗嘉頓山連睇日落兼夜景

(3)樂富格仔山

而位於樂富嘅格仔山,僅高98米,靠近九龍仔,山頂處可180度望九龍塘至九龍城市景,日光或夜景亦不俗。格仔山本來係舊啟德機場13跑道降落航道必經之地,被髹上紅白格仔圖案以作導航,不過後來已髹上灰色兼種樹。內有樂富配水庫休憩花園,包含大草地,沿休憩花園旁邊小路,即可直上山頂位,景觀雖然開揚,不過鐵絲網已倒下,背後係無遮擋邊緣位,比較危險。

延伸閱讀﹕樂富格仔山極速登頂 高空俯瞰九龍仔一帶市景

(4)何文田紅燈山

靠近何文田嘅紅燈山,稍有上斜,但路段輕鬆,只有其中一邊上山有微微天梯感,路段狹窄,小山丘僅有約106米高。山上曾經設有燈塔,夜晚有閃閃紅光,所以叫紅燈山,但只限舊啟德機場年代。山頂處有一個大草地,而且有10人足球場,從一面可俯視土瓜灣、何文田新舊樓房,亦可遙望獅子山、九龍灣海景,甚至舊機場跑道。不過,紅燈山未必適合睇日落,因為被附近樓宇完全遮蔽,反而適合睇日出。

延伸閱讀﹕避山上人群! 反其道而行登市區山 15分鐘到紅燈山山頂

(5)鴨脷洲小玉桂山

位處港島南區嘅小玉桂山,相比真玉桂山更容易登頂,路段清晰,全由石屎路舖砌,最高點僅有143米,無需要太多體力,連接利東邨至海怡半島同鴨脷洲邨。從山頂俯視,可瞰180度海灣,更可望到海洋公園機動遊戲,眺望東博寮海峽、鴨脷洲大橋、連島沙洲鴨脷排,甚至南丫島三支煙囪。山頂有幾處分岔路,不過除咗上山、落山路,其他都只係圍住玉桂山而行,黃昏時份可以望望夕陽景觀,一旁更有一個小型「停機坪」,可以影吓相。

延伸閱讀﹕小玉桂山連接利東海怡 15分鐘輕鬆登頂環瞰180度海灣

(6)將軍澳鴨仔山

將軍澳嘅鴨仔山被稱為港版少女峰,靠近坑口至寶林,只係附近居民嘅晨運路線。鴨仔山橫跨坑口村至魷魚灣,後來鴨頭、鴨頸被移平,變成屋邨帶,小山高約152米,唔使30分鐘已經直達山頂,亦係Hea遊好去處,整個鴨仔山路段基本只有石屎路同樓梯,輕鬆易行,人流亦同樣唔多,最啱散步。從鴨仔山觀望,東至銀線灣、清水灣一帶,甚至可遠眺牛尾洲、吊鐘洲,至於近望則可見香港科技大學南邊大樓、邵氏片場。

延伸閱讀﹕晨運路線 直上鴨仔山山頂

(7)觀塘沈雲山

位處觀塘嘅沈雲山,係觀塘居民嘅後花園,靠近佐敦谷公園,約有177米高,其實即係觀塘上配水庫遊樂場。山頂景觀開揚,東至順天邨、大上托,南至樂華邨、牛頭角,西至佐敦谷、獅子山,北至順利邨、飛鵝山,可由九龍灣行到觀塘。沈雲山有幾條路都可以直達,內有超大草地、緩跑徑,從頂點可睇日落,相信亦可睇日出,兩邊總算無遮擋。而盡頭更有一間藍白色小屋,屬一個被認為係防空洞嘅地方,帶有幾分神秘感。

延伸閱讀﹕輕鬆上山抖抖氣 「觀塘後花園」沈雲山必影神秘打卡位

(8)九龍灣平山

九龍灣市區背後隱藏一座平山,所望嘅景觀,貌似九龍灣版嘉頓山,平山高約188米,記者親自數過其中一邊上山有624級樓梯。平山西面曾經有石礦場,係採掘花崗石嘅地方,丟空後開闢成住宅區,現時俯視可望舊香港公屋,而小山丘就被削成懸崖狀。從低點仰視,樓梯直長而稍為陡峭,但事實上唔算辛苦,行樓梯時不妨轉頭望望風景,直視可望獅子山側面輪廓,環瞰東九龍一帶,黃昏時睇夕陽靚景,夜晚亦可睇市區市景,秋冬時有少量芒草,另一邊甚至直達佐敦谷公園方向。

延伸閱讀﹕九龍灣版嘉頓山 624級直長階梯望獅子山 快閃登平山睇芒草

(9)柴灣西灣山

柴灣北配水庫遊樂場背後隱密小徑可延伸至柴灣西灣山,而水務署柴灣北二號抽水站旁邊樓梯亦直接連接西灣炮台晨運徑,兩條小路都可以直通西灣山上嘅西灣炮台。西灣山海拔約197米,遍佈林蔭,遠離繁囂,景觀遼闊,亦可算係柴灣區內嘅市區後花園。附近鯉魚門公園及渡假村曾經係英軍鯉魚門軍營,而西灣山山上有炮台、堡壘、軍火庫等防禦軍事遺跡,可以從西灣山觀賞炮台遺址,但山上堡壘已改為電視發射站。另外,西灣山屬睇日出、日落嘅好地方,而北炮台更可眺九龍灣至東龍島方向景觀,視野廣闊。

延伸閱讀﹕柴灣西灣山270度瞰海景賞日落 2條秘道闖炮台窺探戰時遺跡

(10)青衣青欣山

位於青衣嘅青欣山,即係沿青衣自然徑而行嘅青衣後花園,由長宏邨行到青衣西面,可近距離觀望青馬大橋、汀九橋,日落時份會更醉人,觀景亭亦可望葵涌、荃灣同青衣一帶市景。青欣山基本只係長3.5公里,高約219米,俯視青衣市景之餘,亦眺望藍巴勒海峽、馬灣海峽海景,亦可算係輕鬆郊遊嘅好地方。

延伸閱讀﹕青衣輕鬆上山 飽覽青馬大橋景

(11)屯門皇帝巖

屯門嘅皇帝巖,靠近龍鼓灘沙灘,只需從北朗村走到60、70年代建築房屋,於附近山腳小山徑走上山,即可飽覽龍鼓灘全景,俯首有幾分似日本鄉村感覺,雖然未知皇帝巖海拔幾多米,但由皇帝巖前行至龍鼓灘以東嘅花香爐頂,亦只係310米高,估計皇帝巖低於300米高。前行至花香爐頂需要行山路,但若只行皇帝巖,路段全為石屎樓梯,即使唔繼續前行,皇帝巖頂端平台亦甚舒服,清風送爽,直視青山發電廠煙囪之餘,亦可望菠蘿山,更可望龍鼓灘上嘅夕陽靚景。

延伸閱讀﹕屯門隱密小路登頂望青山「孖煙囪」 龍鼓灘皇帝巖俯首日式景象

(12)灣仔荷蘭徑

唯一位處港島區嘅荷蘭徑,屬灣仔後花園,對比市區石屎森林,都算係隱密山林小徑,高約298米,可從香港仔水塘、灣仔峽道走入半山荷蘭徑。入口有小風車模型為標記,穿梭叢林,既有幾分探險感,亦有仙境感覺,遍佈翠綠植物、樹藤,環境清靜,路段平坦,所需時間僅約30分鐘,可以直達馬己仙峽配水庫遊樂場。荷蘭徑原為荷蘭船公司海員日常往返半山居所至灣仔公司之路,從荷蘭徑可俯視中區灣仔至中環景色,行到末端更可飽覽香港夜景。

延伸閱讀﹕半山荷蘭徑穿梭叢林仙境 直通馬己仙峽配水庫 高空俯瞰港島中區夜景

E.A.Tips﹕

(1)雖然大部分路段係石屎路,但部份路段為山路,要留意個人安全。

(2)謹記愛護環境,自己垃圾自己帶走

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!