【2021賞花地圖】荔枝角公園首種富士櫻 6棵櫻花樹矗立園內同場加映有紫花風鈴木

[sig_post_pv label=”瀏覽：”]

最近氣溫愈趨溫暖，意味又係賞櫻季節，既然無得旅行，就只能於本地賞櫻啦！今年美孚荔枝角公園第一次種植櫻花，園內有6棵最新種植嘅富士櫻，另有特別嘅紫花風鈴木，目前各種花卉都已經逐漸開花，情侶們兩個人拍拖賞花謹記要抓緊時間呀！

鐘花櫻桃同富士櫻係本地最常見嘅櫻花，適逢春季，又係賞櫻季節！今年荔枝角公園亦首次種植咗6棵富士櫻，最新櫻花樹矗立公園內，近日逐漸開花，唔少惜花之人都聞風而至。

富士櫻原本生長於富士山、箱根近邊或山麓，大多來自日本南部亞熱帶，所以亦被稱為富士櫻或箱根櫻，櫻花花朵細小，顏色偏向粉紅色，比鐘花櫻桃淺色，又叫豆櫻，一般花期為3至4月，現時氣溫和暖，富士櫻於2月下旬已開花。

雖有6棵櫻花，對比日韓櫻花差天共地，同本地其他櫻花相比亦較為失色，但櫻花綻放時亦不失美態。幾棵櫻花樹生長於弧形小路旁邊，未有花海感覺，樹身比較高，使用相機長鏡頭拍攝會比較理想。

唔少人都已經去咗南昌公園睇黃花風鈴木，亦有唔少人追睇紅花風鈴木，但荔枝角公園重有一種紫花風鈴木呀！紫花風鈴木花期亦係春季，花期一般為12月至2月，但2月下旬仍然綻放，花瓣燦爛而低調。

紫花風鈴木原產自巴西，其他地方如墨西哥、巴拉圭、玻利維亞、阿根廷或中國華南地區都可以見到，最常見係台灣，而紫花風鈴木樹身高約10米，樹幹直長而多分枝。花形同黃花風鈴木、紅花風鈴木一樣，狀似風鈴或漏斗，向下開，有軟毛，邊緣有皺，顏色為粉紫色至紫藍色，色調同偏向淡色嘅紅花風鈴木極相似，容易混淆。若未能分辨，不妨睇睇綠葉，紫花風鈴木綠葉呈鋸齒形，而紅花風鈴木綠葉就比較平滑。

E.A.Tips :

(1) 櫻花位置靠近荔枝角公園第三期入口，於寶輪街進入，向中心方向前行1至2分鐘會見到6棵櫻花樹。

(2) 紫花風鈴木位置則靠近美孚新邨第一期，唔需要上斜，風鈴木只種於路口處。

(3) 公園為公眾地方，請保持安靜。

(4) 謹記自己垃圾自己帶走，或扔於園內垃圾桶內，勿隨便丟地上。

(5) 留意櫻花嘅花期，一般只得一至兩星期，公園首年種植櫻花，比其他地方比較少同好快殘。