觀塘東廣場隱藏有趣自助販賣機！9cake港式玩味生日快樂插牌$40起可愛連登豬／Pepe公仔、幸福御守／型男世一任揀

觀塘東廣場一直以來都聚集幾間值得支持嘅香港小店，雖然而家數量逐漸減少，但都有唔少過3間可以拍拖兩個人選擇。今次再前往東廣場，發現一隅竟然隱藏一部有趣嘅自動販賣機，賣嘅並唔係嘢食，反而只係售賣各式款式獨特嘅生日蛋糕插牌，另一半或朋友生日不妨俾個驚喜對方！

香港人鍾意去日本，喺日本各城市隨處可見各式各樣自助販賣機，好多都好有趣。但而家香港都一樣有有趣嘅自助販賣機，喺觀塘東廣場一隅嘅自助販賣機，賣嘅唔係汽水飲品，又或者小食，反而係清一色售賣生日蛋糕插牌，最平$40／個。

呢部自助販賣機來自於葵涌廣場人氣店「鳩戟／9cake」，該店以梳乎厘班戟為人熟悉，相信唔少人都有試過。而觀塘東廣場一個角落嘅自助販賣機，旁邊寫有「hk9cake」，同時寫有「9caketopper」嘅名稱。據悉，「9caketopper」係一間福牌專賣店，專門售賣生日蛋糕插牌，網站上價格由$30起，不過大多數都同呢部自助販賣機價格相近。該網站除咗有「一生平安」掛牌，亦有「齊上齊落」、「女皇萬歲」、「加油」等插牌。最特別嘅插牌，大概係男團Mirror各成員嘅門貼或門掛牌，只不過價錢就比一般插牌高。

言歸正傳，自助販賣機又有咩選擇呢？以唔同款式嘅「Happy Birthday」佔最多，另有「福」字、「幸福」御守、「平安」字、「我哋真係好L鍾意香港」、「型男世一」，另有啤啤熊公仔，以及可愛嘅Pepe、連登豬公仔等插牌。從販賣機上可見，每個插牌價位維持於$40至$68，比一般買生日蛋糕加個牌係貴，但就可以選擇喜愛嘅款式。