深水埗黃竹街2間小食店僅幾步之遙即試黑椒牛漢堡Crossover和牛牛丸

深水埗本土食店固然眾多，當中黃竹街有2間小食店相距僅幾步之遙，但一間門庭若市，而另一間則少見人龍，但其實2間都係平民小食店。大多數人只會拍拖兩個人選擇熱門食店，到底質素係咪差好遠？編輯今次就一次過買晒2間，即管睇吓質素係咪真係有分別。

正對長沙灣道楓樹街遊樂場嘅添福小食，係一間受到大眾歡迎嘅熱門店之一，上年中更殺入荔枝角開分店，繼續以港式漢堡包為主打，同時有炸物及港式小食，吸引唔少上班族、學生哥支持。

當中，招牌之作係添福巨無霸$28，麵包為普通芝麻軟包，漢堡包內有生菜、蕃茄、半溶芝士、漢堡扒，入口好似有少少千島醬，漢堡扒肉質似乎係手打漢堡，表面好似好薄身，但咬開發現漢堡牛肉都算幾厚身，而且肉質細嫩，有少少牛筋位，肉感淋身，入口肉汁豐腴，有牛味之餘亦甚Juicy，啖啖略帶幾分牛脂香，生菜、蕃茄則可減低肥膩感，同時增添爽脆感。

另有黑椒牛肉漢堡$23，的確比港版金拱門抵食，重點同添福巨無霸一樣係手打牛肉質感，而非連鎖店嘅牛肉。不過，漢堡牛肉加添黑椒，令味道過於香濃，黑椒味蓋過一切，只係茄汁化解半溶芝士嘅膩感，加添多少少洋蔥粒可能會較好。不過，外賣漢堡包最大問題在於美觀度，只要漢堡包一旦包上紙張，隨即會變形，如果漢堡包轉用紙盒包裝，保存時間可較長，美觀度會相對提升，只不過成本有機會較高。

而離添福漢堡只有一道行人過路燈距離嘅，係另一間小食店混醬坊，同樣以港式小食為主打，最出色嘅小食亦係同牛扯上關係，不過就唔係牛肉漢堡，而係比牛丸更特別嘅和牛牛丸，將兩者Crossover，反而係幾有驚喜。

老實講，混醬坊其他小食如混醬三寶都唔算特別，當中滷水小食如雞翼尖$15、雞髀$16、豬耳$15 更加係不值一提，滷水料質素麻麻，選材亦好一般。不過，當中和牛牛丸$30/6粒就係附近幾個區內非常出色嘅牛丸，編輯話嘅。

和牛牛丸係一種日式混港式風格嘅牛丸，粒粒呈乒乓波狀，大小相近，有少少脂肪粒突出，牛丸模樣似Covid-19。牛丸同坊間牛筋丸味道大有分別，牛丸有好重牛脂香，油香十足，質感爽口彈牙，唔似平常牛筋丸有嘅筋膜質感，亦非免治牛感覺。牛丸粒粒有濃厚牛味，而且帶有甘香味，入口爆汁，絕對食完一粒想食第二粒。6粒牛丸連湯上，湯底以生菜絲墊底，亦有蒜粒，略有鮮甜，但同時帶有鹹味，不過不失。