驚現外賣版Omakase？上水超抵食日式定食店款款外賣限定專用碗放有蝦茶碗蒸便攜又「靚仔」

離上水廣場只有5分鐘步程，就可以到達上水食街，幾條街道內有多間平民小店，價錢經濟實惠，當中有一間係好值得拍拖兩個人去食，不單水準不俗，而且尊重外賣人士，單單門口就能夠見到好多款菜式選擇都係只限外賣，連茶碗蒸外賣都有得保持「靚仔」！

編輯曾經去過好幾間本地主打日本菜嘅小店，發現茶碗蒸係最麻煩嘅一款菜式，要不整個茶碗蒸蛋就被反轉缺乏賣相，要不就直頭唔願意供應，外賣定食無茶碗蒸蛋都試過。今次上水呢間小店既尊重外賣人士，連茶碗蒸蛋都有專用碗，而且細心啲睇會見到茶碗蒸嘅小碗係屬於7號塑膠，能夠耐高溫，呢種塑膠一般會用於運動水樽或嬰兒奶樽等用途。

小店以「鮨葵」命名，係一間本地典型日式餐廳，室內約有二三十個座位，菜式選擇不少，而價錢都算經濟實惠，一般以日本直送海鮮為主打。不過，大熱天時編輯並無選擇魚生，反而以定食為主。

多款定食款式都包含沙律、味噌湯、甜品，夏天用餐先食清涼開胃嘅麻醬沙律菜，再飲一碗暖笠笠簡單沖水嘅味噌湯，飯後再食甜品，而甜品就係一粒迷你版嘅一口雪米糍。

鰻魚飯定食$94有一條鰻魚平放飯盒表面，係典型本地鰻魚飯，魚肉厚肉，無咩細骨，魚質亦軟嫩。定食另有茶碗蒸蛋，茶碗蒸蛋內不單有鳴門卷、香菇，而且隱藏有隻蝦，蒸蛋超滑溜。由於茶碗蒸係採用合適外賣專用碗盛載，故即使外賣都仍然能夠保持「靚仔」，唔會走樣。

咖哩吉列豬扒定食$44、汁燒雞扒定食$45、關西滑蛋牛肉飯$58 轉定食加$9，款款經濟實惠，全部都包含御飯，御飯就即係日本語煮熟嘅米嘅意思。當中咖哩吉列豬扒好香口，咖哩為微甜嘅日式咖哩，豬扒炸成金黃色，賣相吸睛，炸得乾身，啖啖仍然外脆內軟，唔會太厚粉。

一人前和食便當$88 係一款只限外賣嘅定食便當，甚至以「每日主菜款式略有不同」作招徠，故點餐之前係絕對唔知有咩食，有啲似外賣版Omakase。原來係包括有御飯、茶碗蒸蛋、濃郁入味嘅醬燒豬軟骨、充滿油香嘅香煎三文魚、仍有肉汁嘅芝麻燒雞翼、煙韌可口嘅炸芝士年糕，感覺都算豐富，而且水準不俗。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 午市自取9折、晚市自取85折。

❷ 門口多數餐牌都寫只限外賣。

❸ Openrice亦有幾款套餐，有折扣優惠。

❹ 外賣盒加$1。

❺ 付款方式接受Visa、Master、現金、八達通、AE、Apple Pay、Google Pay、OpenRice Pay、Payme、轉數快。

❻ 堂食有加一服務費。

❼ 外賣有加$1，但至少有9折優惠。