面積大過維園、前身醉酒灣堆填區！葵涌公園荒廢逾30年終重開！12月中旬起賞藍巴勒海峽、玩大人版滑梯＋巨型韆鞦！

葵芳有一個公園，面積比香港知名嘅維多利亞公園更大，但一直以嚟都被荒廢，甚至荒廢有足足超過30年，之前入去就等如犯法。不過，而家就可以名正言順進入，皆因呢個葵涌公園於2025年12月中旬已經正式開放公眾進入，可以拍拖兩個人賞藍巴勒海峽，更可以玩吓大人版嘅滑梯同韆鞦！

事實上，葵涌公園早於1992年已經落成，前身係醉酒灣堆填區，於80年代已有發展計劃，而呢一帶後來即將落成時曾經有沼氣釋出，所以一直無限期押後開放公園。由落成至今，公園現時已經有約33年歷史。葵涌公園地方偌大，面積有約3.02公頃，比維園更大。

今次E.A.Two從葵芳出發，由葵芳運動場起步，經過消防局，再轉上以舊式無柱式樓梯聞名嘅葵盛游泳池方向。接下來，穿過隔離嘅隧就，就可以去到另一個曾經嘅打卡位，呢個位置亦係《那年盛夏，我們綻放如花》嘅取景地。穿過呢條天橋，就可以去到葵涌公園入口。

依循呢條路走，會先上行到葵涌公園最大嘅空間，即係一片大草地，現時呢片大草地依然被重重封鎖。不過，草地內就人喺度打板球，原來呢片草地一直只係用作租借用途，而且只係畀玩板球，被當作板球場，2018年起就係香港板球中心醉酒灣堆填區臨時板球場，呢個地方曾經被批評變成私人俱樂部。

公園於2025年12月17日正式開放，如果要前往第一期開放空間，就需要依旁邊步行徑走到盡頭，就係公園第一期開放範圍。初段其實同一般公園無乜太大分別，而且開放嘅只係一片極細草地，旁邊有洗手間同330米嘅緩跑徑。而草地旁邊只有一個迷你貨櫃，入面得少少關於醉酒灣堆填區嘅介紹，而外面抬頭就可以眺望大帽山山頂。

繼續前行，就可以去到葵涌公園另一邊入口，即係停車場入口。不過，停車場空間唔大，車位更少，大概只係得15至16個車位，唔少車嚟到都要等候，所以唔太建議自駕前往。

呢個公園範圍毗連停車場，同時都係喺小輪車場旁邊，當日就見到有小比賽，皆因入面有一條350米國際標准小輪車賽道、一條60米小輪車訓練賽道。至於呢個公園，整個空間設計簡潔，恍如一個觀景平台，不過感覺就有啲似火葬場啲戶外平台。最特別之處，就係公園觀景平台，既可以從頂端俯視青衣對出嘅藍巴勒海峽，夕陽西下景觀會更壯觀。

另一方面，觀景平台一帶嘅設施同樣係賣點，如同兩個大人版嘅遊樂設施，包括連接上下兩層嘅5米高滑梯，可以直接由上面瀡到樓下，斜度都算刺激，有啲似泰國曼谷水上樂園啲滑梯。而另一個設施就係正對藍巴勒海峽嘅巨型韆鞦座椅，大人們既可以坐上層斜台睇風景，亦可以坐低下層坐搖搖櫈睇海景。不過，呢幾張櫈非常重，需要頗花力氣先可以搖得郁，同一般公園遊樂場韆鞦唔一樣，恍惚去健身室做Gym，玩完之後好攰，隻腳似去Gym Room操完一樣。

而觀景平台下方就有一部電梯，可以從地下正面直上公園觀景平台。呢部係一部斜行升降機，有啲似澳門大潭山嘅上山電梯，而同類電梯設計喺太古坊商廈同愉景灣豪宅會見到。據悉，乘搭呢部升降機時，可以從電梯內眺望藍巴勒海峽風景，不過當日升降機暫停開放，一開幕三四日已經壞咗，所以我哋就未能乘搭。另外，有人話公園內有好多蚊蟲，但當日可能有人氣，所以蚊蟲就唔多。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 由葵芳運動場或新都會廣場方向徒步上行，大概15至20分鐘都可以到達公園，需要經過消防局、葵盛游泳池、綠色天橋。

❷ 公園目前只係開放第一期，整體面積其實有約 3.02 公頃，但最大面積嘅草地範圍依然封閉。

❸ 公園附設停車場，不過就只係得15至16個位。

❹ 專線小巴404M可以來往葵芳葵喜街至葵涌公園，亦會經過荃灣墳場，徒步3分鐘就到達公園。

❺ 巴士路線42、42A、43、43M、44M、49A、N241會經過葵青路。

❻

❼