落機無需搭地鐵！香港機場巴士路線直出市區車費更低？即睇港九新界E車、A車、N車攻略！

無論係旅客搭飛機嚟香港旅遊，抑或香港人由外地返香港，由香港國際機場出發前往市區，好多人都會選擇乘搭地鐵。不過，其實香港機場有大量巴士路線可以選擇，唔單止可以直出市區，而車費隨時更低，甚至全天候都有車往返機場，拍拖兩個人由機場去市區都好方便。到或巴士路線中嘅E車、A車、N車有咩分別呢？即睇香港機場巴士路線攻略！

由機場出市區，的而且確可以經港鐵機場快綫，可以由機場站直達東涌線嘅「青衣站」、「九龍站」、「香港站」。如果係機場去中環，即「香港站」，車程大概需要24分鐘；前往「九龍站」同「青衣站」就分別係22分鐘、14分鐘左右。而以成人使用八達通計算，單單去「青衣站」就需要HKD65，去「九龍站」則要HKD100，而去「香港站」更需要HKD150。即使購買機場快綫優惠車票，2人行計算最平係去「青衣站」，需要HKD100，人均係HKD50；而去「九龍站」就要HKD150，去「香港站」則需要HKD170。以上車費只限前往上述3個車站，並未計算前往旅客或港人需要抵達嘅車站。

若然經常乘搭早機或夜機嘅讀者，經機場快綫出市區，更必須要留意早班車同尾班車時間。來往機場最早近06:00列車先有班次，而最夜來往「香港站」、「九龍站」、「青衣站」嘅列車班次只係去到00:48、00:52、00:59。故此，無論車費定時間，我哋都唔太建議乘搭港鐵來往機場，除非真係遇上好趕時間或者無得揀嘅情況。

若需要來往香港國際機場，E.A.Two會偏好選擇乘搭巴士路線，既可以一程直達機場，車費亦好多時都比較便宜。雖然時間有機會長少少，但實際上都唔係話長得好誇張，通常只係視乎架車中途會經邊條路線同所停站點。而機場巴士路線嘅優點係有比較多嘅行李空間，可以於專用行李架擺放行李，上層更有直播CCTV監視下層行李情況，以免被人誤取或偷走行李。雖則E.A.Two近年通常乘搭廉航，好少再使用行李架，但見好多人擺行李時唔多唔少都有啲自私性格，例如將自己嘅行李打橫平放，而非豎起，令其他人難以再擺放行李。希望大家將心比己，將行李豎起，唔好平放，等其他人都可以擺放得到行李箱。一人行一步，減少爭拗。

香港嘅巴士路線到底如何乘搭呢？搭巴士記得預備好八達通卡，否則就需要入現金，不設找續；目前亦可以直接使用感應式支付功能嘅VISA、Master或銀聯信用卡，甚至以Apply Pay、 Google Pay、Samsung Pay付款都得。而搭E車、A車定N車去機場最好？朝早或夜晚點去機場、又點由機場返市區呢？以下為E.A.Two簡單寫寫3種車嘅分別﹕

E車﹕正常時間行駛，價錢最平，車程較長，班次最多，站點較多
A車﹕正常時間行駛，價錢較E車貴，但較N車平，車程最短，站點可能較少
N車﹕於凌晨前後至清晨前行駛，價錢最貴，班次最少，車程可能最長

香港嘅巴士路線主要係來自九巴龍運巴士同城巴，要乘搭香港巴士路線，記得要下車九巴App（iPhone、Samsung）、城巴App（iPhone、Samsung）。除咗E車、A車、N車，其實重有S車，例如S1、S56就係可以來往東涌嘅巴士路線。

來往機場嘅巴士路線除咗以英文字母區分之外，重有後面嘅數字，每個號碼都代表來往唔同區域。比如10至17號就係來往港島區路線，20至29號就係來往九龍至將軍澳路線，而31至34、36至38就係新界西區路線，至於35就係離島區至梅窩路線，41至47則為新界東路線。如果想去油尖旺，應該乘搭A21、E21、N21，E車最平只係HKD14.5，A車最貴HKD34.6，N車都係HKD32.1；就算A車嘅車程大概係50至80分鐘；如果想去中上環、銅鑼灣，可以乘搭A11、E11、N11，E車最平HKD21.7，A車最貴HKD41.9，N車則為HKD32.1。基本上，所有巴士路線人均都唔使機場快綫嘅HKD50，又唔使轉車，舒舒服服直接坐到目的地。