赤柱隱藏免費博物館！香港懲教博物館毗連監獄！設10個展覽館＋2個打卡位、最驚喜係邊個？

於2025年11月，有個「香港博物館節」，有超過17個博物館都係免費入場，但就唔包括隱身於赤柱嘅呢個博物館。不過，呢個博物館本身都係免費入場，如果拍拖兩個人於赤柱一帶散步，不妨順路遊覽呢個展覽館。

「香港懲教博物館」隱身於香港島南區赤柱內，毗連「赤柱監獄」、「香港懲教學院」，其實於2002年底已經開放公眾入場，而2009年曾經翻新過，翌年初先正式重開。只不過，呢個博物館一直以來都係比較少人前往，或者係因為靠近監獄，甚至係比較偏僻啦。

香港懲教歷史其實有逾180年，由1920年代開始，原先係叫「監獄署」，後來先叫「懲教署」。換言之，係橫跨殖民地時代，見盡一切香港制度變遷，難得係入面仍然見到ERII標誌嘅珍貴歷史文物。博物館地方不大，而且僅樓高2層，入面只係勉強劃分咗10個展覽室。據悉，整個空間只係得不足500平方米，但室內就有超過600件展品，頂端有座模擬出嚟嘅監獄瞭望塔。

要前往博物館，可以從赤柱市集徒步將8分鐘，或者直接乘搭巴士到「聖士提反書院站」，落車基本上就會到達門口，就喺東頭灣道近盡頭位置。室內地下有4個展覽位，上層有6個展覽位，地下包括刑罰及監禁、監獄歷史及發展、監獄歷史及發展、監獄內貌。上層包括有職員制受徽章及裝備、越南船民、自製武器及違禁品、懲教與國家安全、工業及職業訓練組、本地及海外合作交流。

我哋唔會講邊個區唔好睇，只會講邊個區最引人入勝同最吸引。當中，有一個自製武器及違禁品區，呢區係最精彩！唔單止有舊時囚犯用具，例如收音機，亦由舊時到現在嘅都有DIY，例如吸食鴉片用嘅水煙槍、煙刮，自製麻雀、牌九、紙牌、籌碼、輪盤，自製文具等等。在囚人士嘅手工藝品、自製工具，就好似以前讀書時期於學校自製嘅遊樂設施或工具，原來學校同監獄都有相同之處。

室內主要打卡位有兩個，似乎係想等大家試吓《監獄風雲》，上層有模擬監倉，亦有模擬刑罰場景，但入去扮坐監就有啲大吉利是，想要坐監好容易，講一句嘢保證可以馬上入到去隔離監獄。下層就有個位置模擬拍攝入獄照，上面罪名竟然係寫太靚仔、太靚女、too handsome、too beautiful、too cute，本身都係有啲大吉利是，但個牌又真係帶返少少趣味出嚟嘅，感覺無咁嚴肅。

據悉，博物館外設有一個小型觀景台，可以飽覽大潭灣風景，不過E.A.Two就唔見邊度行過去，估計係從展館最後電梯隔離嘅樓梯上去。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 博物館免費入場。

❷ 乘搭巴士路線6、6X、260，或者綠色專線小巴路線40，都可以直達「聖士提反書院站」，260係會比較快啲，但6、6X就會平少少。

❸ 由博物館折返赤柱市區，腳程只係8分鐘。

❹ 於展館要保持安靜。

❺ 室內有兩個打卡位，臨走可以玩吓。

❻ 前面係樓梯通往上層，後面有電梯通往上層。

❼