屯門山旮旯高人氣拉麵店去3次先食到？花華和食屋極濃厚蟹湯／清甜貝湯竟有原隻貴妃蚌！

雖然香港愈來愈多小店結業，但有啲小店依然頗具人氣，E.A.Two於屯門就發現一間本土拉麵店，實地去咗3次，先可以入場，原來呢間拉麵店想要拍拖兩個人去都唔簡單！

位於屯門嘅「花華和食屋」，街外人可能聽都未聽過，但附近街坊就應該頗為熟悉。該店係來自於2017年開業嘅《米芝蓮》餐廳「Involtini Italian Cuisine」同2020年開業嘅餐廳「JEP」，3間老細都係同一人。E.A.Two曾經多次前往呢間拉麵店，第一次係14:00，乜都無晒，而且準備收舖；第二次係13:00，拉麵售罄，只係淨返甜品；第三次係12:30，門口有條人龍排隊入場，等咗15分鐘，方才可以正式入場，好彩嘅係各款拉麵仍然都有得食。

該店寫明拉麵售完即止，而且不設訂位，門口依然有客人等候，不過除咗頭1個鐘有人排隊，其實之後就無咩人排隊，就好似青衣嘅「木屋拉麵」。而呢間屯門拉麵店就以蟹湯拉麵為主，重有每日自家製高加水麵，剛才提過店內都有甜品選擇，例如日式芭菲同刨冰。

店內最具人氣嘅係濃厚蟹湯拉麵$100、干貝蟹白湯拉麵$110、柚子胡椒煮干清湯拉麵$100、煮干雞醬油拉麵8.0$118﹐當日食咗30分鐘左右，就聽到1號同2號已經賣晒。濃厚蟹湯拉麵係新鮮製蟹湯，包含有自家製醬油，有蟹肉、蟹膏、火炙叉燒、味玉、紫菜、蔥粒；干貝蟹白湯拉麵分別係多咗干貝，再打泡成蟹白湯，配料就多咗松葉蟹肉、火炙蟹膏。

唔單止蟹湯濃郁，有啲鮮蟹膏味，鹹度適中，似蟹湯同雞湯味混合嘅感覺，聽聞靈感就係來自於先前餐廳嘅意大利菜式，即係蟹膏risotto。而且拉麵擺盤都好靚，麵條擺位係標準順住放落去，唔係隨意擺放，係齊整嘅感覺。拉麵質感係偏九州風格，因為麵條係比較淡同幼細軟身。蟹湯嘅叉燒係厚切兼火炙，比較香口，鹹香味重。

其他選擇重有柚子胡椒煮干清湯拉麵、煮干雞醬油拉麵8.0都係採用自家製33%中加水白麵，前者配搭煮干湯，加上鯖魚干檸皮煉油提香，配有柚子胡椒同白醬油、黑椒粒，同時有叉燒同雞胸肉；後者就係改良醬油，都係魚干味同雞油配搭，有叉燒同牛肝菌豬肉雲吞。

期間限定不時都有唔同選擇，當時E.A.Two就有鹽味貝湯拉麵$135，湯頭係慢火熬煮貝出汁，湯頭特別清澈，內有蜆肉、帶子，配有慢煮叉燒、貴妃蚌、帶子、味玉、蔥，有加入鹽醬。最意外係碗內真係有隻貴妃蚌，湯底同貴妃蚌入口都好鮮甜。而呢款嘅叉燒就係薄切兼慢煮，比較軟嫩。

小食有炸雞皮餃子$58、柚子南蠻雞$36、山椒shakeshake唐揚雞塊$30、唐揚雞塊$28、牛肉可樂餅$20、明太子牛肉可樂餅$35，甜品都係成日有唔同選擇，例如白露清柚芭菲$92，其餘甜品有最受歡迎嘅琥珀之森$92，重有抺茶之物語$92。山椒shakeshake唐揚雞塊又幾驚喜，雖然個底都係正常唐揚雞，但佢炸功又幾好，而調味料又幾配合，麻中有辣，麻味餘韻都幾強，最意外係擺盤真係好四正，無諗過4件炸雞嘅九唔搭八嘅造型，都可以砌到咁齊整，top shot望落去會更清楚。