元朗信芯園2025年11月最後向日葵花海！預料翌年被收地、太陽花絕跡？即睇最真實交通＋徒步路線！

元朗「信芯園農莊」近年一直係網美喜愛嘅向日葵花海打卡地，每逢夏季都有唔少人慕名而至，爭相追訪一朵又一朵又叫太陽花嘅向日葵。拍拖兩個人前往影相又真係幾浪漫，整個場景猶如台中「中社觀光花市」，其實香港都有能夠媲美外地嘅景點。不過，最近「信芯園」2025年11月嘅太陽花已經到達最後一季，因為預計2026年呢一帶陸續被收地，花海有可能絕跡小磡村。想要睇最後綻放嘅向日葵／太陽花花海，即刻睇以下最真實嘅搭車同徒步路線！

「信芯園農莊」係元朗新田值得支持嘅花農小店，一直屹立有逾40年，多年來一度被逼遷。而最近就去到不得不走嘅地步，因為呢一帶剛好座落新田科技城第二期發展計劃工程範圍內，所以地政總署於2026年開始就會陸續收地，農莊範圍亦需要準備被清拆，就嚟Game Over，故目前太陽花花海已經進入最後倒數。

呢個農莊近年一直係元朗錦田至古洞一帶嘅親子同拍拖好去處，亦都係攝影熱點。就算經歷過一個個颱風、暴雨等惡劣天氣，被一次又一次破壞農地，花田變澤國，但經農莊努力，依然一次又一次成功修復。金黃色太陽花花海依舊壯觀，每個人徒步而至，都願意自動走過賞花行人路。另外，花田內亦擺放咗唔少打卡裝置，同之前去過嘅台中「中社觀光花市」相似，雖然地方無咁大，但明顯用心佈置過。

本身太陽花花季通常係夏季，大概係5至9月。踏入11月，「信芯園農莊」宣佈今次係最後一批太陽花綻放，由11月10起盛放，預計花期只係得10日，換言之大概只係到20日左右，想要睇最後一季盛放嘅向日葵花海記得要把握時機抓緊最後嘅花期時間去睇啦！

雖然「信芯園農莊」係一個網絡人氣打卡點，睇落好似好熱門，亦都有好多平台曾經推介同提及過，但似乎好多人都依然唔知點樣徒步入去農莊入口。以E.A.Two實地印證所得，原來好多人都行錯路，睇唔到「信芯園農莊」入口。事實上，由巴士落車之後，經小路之後再行小路，一直向前行，就可以直達農莊。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 入園人均入場費為$50，保育費計算在內，亦可以另外加購太陽花，每支$40，3支就需$100，盆栽每盆則為$30，$50有兩盆。

❷ 乘搭來往元朗至上水嘅巴士路線76K，於石湖圍站落車，sorry有巴士到嘅地方係盡量唔會教搭小巴。過馬路就有指示牌，一直依指示牌走1分鐘，前面有指示牌寫轉左走小路。走出小路之後，千祈唔好轉右，一來方向錯誤，二來好多大貨車。其實只要一直前行就得，中間有條小溪定小河，鐵樓梯下行徒步一小段路就會到達信芯園農莊。只需要依循路口同沿路嘅殘花行，就可以搵到正確路線，基本上落車行過去5分鐘就到。

❸ 搭車徒步會比較方便，因為停車會比較麻煩，而且無特定車位。信芯園農莊位置係小磡村內。

❹ 園內有蚊蟲，記得預備定防蚊措施，有蚊之餘，入面村內都有大狗。

❺ 切勿擅自採摘向日葵，唔好喺花田內開遮，以免誤掃花朵，場內亦唔俾使用反光板或三腳架，商業攝影需要提前預約。

❻ 着淺色衫褲影相效果會比較搶，而且唔會太熱，而且要着防跣又可以踩泥地嘅鞋。

❼ 朝早同中午去會比較少人，可以拍攝無人畫面，但黃昏時份光線就會更加靚，但人就一定較多。