實試官方導賞團！一次參觀尖沙嘴2大法定古蹟、深入了解天文台總部＆前九龍英童學校英式建築！

如果拍拖兩個人喺香港唔知去邊度好，不妨試吓join香港導賞團，對香港地隨時有更深認識，有好多係平時無咩人留意而又鮮為人知。今次E.A.Two就選擇參與尖沙嘴兩個景點嘅導賞團，呢兩個地方唔單止係英式建築物，而且都係一早被列為「香港法定古蹟」，原來每個禮拜只有1日有得導賞團，到底點樣join呢？

導賞服務

今次參與嘅係「前九龍英童學校及香港天文台1883大樓」導賞服務，包括尖沙嘴兩座被「古物古蹟辦事處」評為「香港法定古蹟」嘅建築物，兩座建築物都係維多利亞時代殖民地風格。不過，導賞服務只限每個星期五下晝15:45至17:00或17:15，時間因應當時情況而定。參觀係免費入場，只要先得先得就得，但正常係無咩人會參與。

由於「前九龍英童學校」（即「古物古蹟辦事處」）因進行維修工程，所以目前係禁止進入，故導賞團只會於門外進行。每位參與者都需要珮戴指定導賞團識別證，導賞完結之後歸還就得。導賞團係由義工姐姐帶領，第一站會先於門口講解歷史同特色，真係準備充足。而第二站就會直接上到去平時一般人唔可以隨便進入嘅「香港天文台」，由導賞團義工通知當局工作人員，然後就可以直接進入「天文台」範圍。不過，呢度一樣唔可以隨便亂走，只係可以於外圍參觀，最多都係進入一個展覽室。

前九龍英童學校

有留意E.A.Two嘅讀者，應該對「前九龍英童學校」有一定認識，皆因我哋以前就曾經進入過呢座建築物。不過，現時就未能進入，就算參加導賞團，都只能夠於外圍觀望。不過，導賞團姐姐講解詳細，可以知道一啲網上面未必知道嘅資訊。

延伸閱讀﹕大隱隱於市！尖沙嘴鬧市藏維多利亞時代百年歷史建築物遊走法定古蹟探視紅磚遊廊金字瓦頂

「前九龍英童學校」於1902年建成，座落於九龍尖沙嘴彌敦道，毗連「聖安德烈堂」。呢幢舊校舍由九龍書院變九龍英童學校，再變中央英童學校，係尖沙嘴最古老嘅學校。一度變成街坊福利會，當街坊福利會搬到後面之後，呢度就變成現時嘅「古物古蹟辦事處」。

呢座建築物早於1991年已經被列為「香港法定古蹟」，受到《古物及古蹟條例》保護，所以係絕對不得拆除。建築物採用維多利亞時代建築，入面樓底特高，外面以紅磚設計，設有拱形迴廊、舊式貓梯、牛眼窗等，頂端又有金字瓦頂、雙層屋頂、西式煙囪，係典型殖民時代風格，中間更有當時嘅奠基石，原來入面重有英式壁爐同過百年歷史嘅樓梯。

香港天文台1883大樓

及後，導賞團會上行斜路，直達「香港天文台1883大樓」正門大閘。由義工通知當局工作人員，然後獲得放行，大家就可以直接止行至頂端嘅神秘建築物！

「香港天文台1883大樓」就係目前嘅「香港天文台總部」，由1883年建成，足足有142年樓齡，一直座落於九龍半島尖沙嘴彌敦道之上嘅伊利近山。建築物同樓下嘅「前九龍英童學校」一樣，都係被「古物古蹟辦事處」列為「香港法定古蹟」，但就比前者更早，於1984年已經獲得認可。

原來呢幢建築物於早期係無主樓左邊同右邊嘅建築物，主樓左邊係後期加建，而右邊以天橋連接嘅就係於1983年建成嘅「香港天文台百週年紀念大樓」。至於另一幢獨立嘅純白色建築物，就係天文台台長嘅辦公室同住所，換言之係前台長林超英先生嘅居所，幾個參與者不約而同表示入面應該無冷氣！

主樓建築物以淡黃色為主調，樓高兩層，位置海拔有約32米，頂端其實重有個屋頂，但企下面係難以見到。如果走到天台位置，視野係四面八方無遮擋，可以眺望港九新界嘅高山，連大嶼山都可以睇到﹐畢竟「天文台」建築物嘅作用就係觀測香港氣象。而最特別嘅就係建築物嘅風格，「天文台」大樓建築雕花特別吸睛，除咗地台係光滑雕花紋花崗石，天花線又有幾何圖案，原來係來自於科林斯式建築設計，條柱係長形削邊，見到角位係削過，柱頭、挑擔都係渦卷葉形設計，每一部份都係精雕細啄。

方形建築物外面草坪有唔少儀器，例如風速計、空氣溫度濕度計、地面和地底溫度計、雨量計、暑熱壓力計、微氣候監測站等儀器。走廊內更有一個地震監測室隱藏地下！不過，呢個位置就係嚴禁進入，導賞團義工更提醒要保持清靜。另外，一隅重有1號、3號、8號、9號風球，都係以前颳風來臨時掛喺鐵塔上嘅風球。事實上，以前重有2號風球同5號風球，只係後來取消咗。

至於10號風球，目前就懸掛於歷史資料展覽室天花上。由60至70年代起，颱風來臨時已經唔再依賴「天文台」於鐵塔上懸掛嘅風球，只係由電台、電視台報道風球訊號，結果「天文台」更加被重重圍封兼難以進入窺視。成也科技，敗也科技。展覽室內有好多「天文台」舊時嘅展示品，包括以前用嘅時鐘，亦有其改過9次嘅台徽。另外，重點重有一個「皇家香港天文台（Royal Observatory Hong Kong）」嘅台徽牌，今時今日見到「皇家」真係特別感動。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 導賞團無得網上預約，只有當日先到先得方式參與，只要於星期五15:45去到古物古蹟辦事處側門就得，導賞團時間直到17:00至17:15左右。

❷ 前九龍英童學校即係古物古蹟辦事處，目前係禁止進入。

❸ 天文台一般係禁止進入，目前只限導賞團可以進入參觀，但同時參觀範圍亦只限外圍，唔可以進入內部空間，除咗一個展覽室。

❹ 參觀時記得每個人都要佩戴好識別證。

❺ 記得唔好隨便觸摸展品，眼看手物動。

❻ 參觀時要保持安靜。

❼