【曼谷美食】Siam街頭打卡粉紅Cafe＋泰菜老店 6大美食必揀雞蛋糕／斑蘭椰子撻／奶茶／芒果甜品

Siam係曼谷旅遊必去嘅地方，Siam街頭既眾多美食，亦可拍拖兩個人慢慢逛街，幾條街道有如東京原宿竹下通、台北西門町、香港西洋菜南街，都係當地人同遊客喜愛到嘅熱門地方。既然係逛街好地方，美食點亦係不可或缺嘅因素，Siam街頭小店不少，今次就先講吓其中6間食肆，一方面可以打卡，另一方面可以醫吓肚，值得一試。

The Cassette Coffee Bar

喜愛到外地找尋粉紅色打卡位嘅你，到泰國曼谷必然要到Siam街頭呢間粉紅咖啡店！「The Cassette Coffee Bar」距離BTS Siam站只有約3分鐘步程，不足300米，交通便捷。咖啡店外觀上以浪漫公主風嘅玫瑰粉紅為主調，用色搶眼，而且設計時尚中帶有復古感，更成為唔少網紅打卡必訪之處，網美必拍！店內基本提供咖啡及輕食為主，價格至少100至200泰銖，折合港幣大概21至43元。

Machi Machi CenterPoint Siam Square

而「Machi Machi 」於台北都有分店，但香港就無。該店係一間手搖茶飲店，吸引唔少文青幫襯，適合於Siam街頭行到攰時，坐低飲杯嘢抖一抖。一杯Pekoe Jasmine Green Tea約$70，方便解渴。

Inter Restaurants Since 1981

另一間係於曼谷開業有逾40年嘅「Inter Restaurants Since 1981」，顧名思議於1981年開業，主打平價泰式料理，距離BTS Siam站只有3至4分鐘步程，正對Siam Square One商場。小店門口經常大排長龍，建議傍晚6點前入座。店內用餐人均基本上大概150至200泰銖有交易，就可以品嚐一頓地道泰國菜，包括有炸雞翼、炸雞皮、冬蔭功、泰式炒河、泰式奶茶等，折合港幣只係32至43元。

Mil toast house th

而「Mil toast house th」就係一間麵包店，環境帶有韓式風格。店內其實以自家製蓬鬆麵包為主打，麵包做法係蒸，就係蒸麵包及手撕吐司，口感柔軟而有咬口，每款麵包可配搭唔同配料或醬料，麵包設計頗為美觀，亦係一間打卡麵包店！

Mango Tango

到泰國曼谷旅遊，芒果甜品絕對必食之選，距離BTS Siam站不遠嘅「Mango Tango，就係以芒果甜品為主打。該店官網口氣甚大，寫有「Think of mango, think of Mango Tango.」，據聞於泰國名聲幾大，亦受到當地年輕人歡迎。小店鄰近Siam Square，同樣地理位置優越，店內不僅有芒果糯米飯，亦有芒果沙冰、芒果蘆薈等，每份價錢大概135至150泰銖，折合港幣約29至32元，走過Siam街頭不妨一試。

Siam Pandan

重有一間係主打斑蘭葉糕點嘅「Siam Pandan」，該店於曼谷Siam街頭已經有超過30年歷史，係知名小食店之一，人氣十足。多款斑蘭葉糕點都係現點現做，以斑蘭雞蛋糕、斑蘭椰子撻、斑蘭蛋卷最受歡迎，青青綠綠糕點香氣滿滿，每啖一粒，質感鬆軟，唔會太甜膩，每份大概30至40泰銖，折合港幣只需6.5至8元；而斑蘭糕則賣50泰銖，每盒有8粒，折合港幣都只係10元左右！