【曼谷私房景點】近大金佛！隱藏當地人水上市場極少遊客的河畔餐廳／藝術之家｜Khlong Bang Luang Floating Market

曼谷熱門水上市場眾多，唔少水上市場都受到香港人歡迎，今次E.A.Two編輯為大家推介一個適合拍拖兩個人前往，而鮮為人知嘅曼谷水上市場。該水上市場距離近月曼谷新地標大金佛不遠，為少數外國遊客前往嘅水上市場，聚集當地眾多年輕藝術家，當中不得不提河畔餐廳。即睇呢個MRT延長線可以到達嘅全新曼谷水上市場路線及交通！

丹嫩莎朵水上市場、安帕瓦水上市場、空叻瑪榮水上市場都係香港人認知嘅曼谷水上市場，而你又有無聽過「Khlong Bang Luang Floating Market」呢個水上市場呢？「Khlong Bang Luang Floating Market」最大賣點就係「Artist House」，既有一間又一間藝術家小屋，亦有機會睇到免費泰國傳統木偶戲演出，市集上更有河畔餐廳及紀念品店。

「Khlong Bang Luang Floating Market」其實距離MRT延長線嘅車站有一小段距離，但至少係可以步行而至，但偏偏比較少香港人得知。據現場所見，藝術之家及餐廳裏最多嘅參觀者，反而係外國人。

踏入隱藏於曼谷一隅嘅水上市場，車船均可抵達，亦可徒步而至。離入口不遠處，正正係一間河畔餐廳，入座大多數為當地學生或外國人，並無見到有亞洲遊客。

餐廳大多數餐點價格低廉，大概200至300泰銖就有一碟泰國菜式。以脆皮燒腩仔為例，價格為200泰銖；冬蔭功則為300泰銖；而比較多人揀嘅泰式炒飯就只係賣100泰銖！飲品方面，啤酒由50至100泰銖不等，而泰國椰青極平，一大個只係50泰銖，簡單嚟講，折合港幣基本上只需約12元。

店內最佳用餐座位必然係靠近河畔嘅餐檯，不過坐低時就要特別小心，私人小物唔好靠近檯邊或座椅旁邊，以免不小心跌落河中。用餐時，可以同時享受河畔景色，更可以見到有其他遊客乘搭觀光船嘅情景。

餐廳菜式份量不少，兩個人share都好足夠，重點係惹味而價格親民。當中，泰式炒飯雖然只係大概港幣25元，但就好夠鑊氣，配料適中，比香港50元嘅炒飯更出色。而燒腩仔夠香脆，冬蔭功亦酸辣得宜，小小一碗都好足料。

於水上市場河畔餐廳用餐後，不妨於週邊閒逛。穿過小橋後，你自然會發現呢個水上市場嘅獨有特色，就係藝術感極重！小木橋已由各種小物舖砌並重新設計，另一端更有一間間由水上船屋蛻變而成嘅藝術小屋。走過各小木屋時，謹記留意好幾間「Artist House」都係需要除鞋先可以進入。室內有唔少當地學生，佢哋於當中進行創作或繪畫，文青味比香港啲一式一樣市集更高，所以有部份小屋門口會堆滿一雙雙鞋子。

此外，其他小木屋同樣係舊式地板設計，更有當地手工精品及紀念品售賣。不過，現場就無乜旅客推廣活動，環境氣氛寧靜，相對其他熱門水上市場來說，係比較chill。小巷盡頭位置更可見一間古廟，據悉有逾百年歷史，位置近該水上市場嘅停車場，人流較少。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭MRT至「Bang Phai 站」，於4號出口出閘，向Phet Kasem 路走向20 巷，穿過寺廟後，向河邊走，再沿河邊走向小橋就會見到﹐水上市場與MRT站距離有約15分鐘步程。

❷ 水上市場離水門寺不遠，不過都要徒步約30分鐘。

❸ Artist House 2點會有木偶表演，但星期三表演會休息。

❹

EATWO

Miss A

曼谷Klong Bang Luang Floating Market 箜邦龍水上市場／Artist's House 藝術之家 (Baan Silapin)

Soi Wat Thong Sala Ngarm, Phasi Charoen（泰文地址﹕315 วัดทองศาลางามซ.เพชรเกษม 28 ถ.เพชรเกษมแขวงคูหาสวรรค์เขตภาษีเจริญกรุงเทพ 10160 ／309 ซอย เพชรเกษม 28 28 ถนนเพชรเกษม แขวง คูหาสวรรค์ เขตภาษีเจริญ กรุงเทพมหานคร 10160）
星期一、二10:00－18:00；星期三、五09:00－18:00；星期六、日09:00－19:00（木偶表演時間14:00／星期三休息）

隱身中央圖書館背後！Dream浪漫西餐廳「世一」焦糖燉蛋／風乾黃油雞／紅菜頭刈包