實試大城一日遊包車體驗！曼谷近郊打卡超靚安娜教堂／藍色咖啡！歷史古城探索邦巴茵夏宮／瑪哈泰寺、暢遊水上市場＋皇家象園

去曼谷旅遊，多數於曼谷市中心逗留，或者到距離市區有啲遠嘅cafe打卡，更多係同時前往芭堤雅、蘇梅等地。今次編輯就往較鮮為人知嘅曼谷近郊大城府走，帶大家探索拍拖兩個人邦巴茵夏宮、安娜教堂、樹中佛，暢遊不一樣嘅水上市場及大象園。從曼谷到大城，僅需約1至1.5小時車程，兩者相距大概不足100公里。

關於曼谷大城 Ayutthaya

大城（ Ayutthaya ）為曼谷近郊一個城府，比南下芭堤雅更近曼谷市中心，只要1小時車程即可以抵達。大城並非與芭堤雅、蘇梅等以陽光與海灘聞名，反而有雕刻般嘅歷史古蹟，包括皇宮、寺廟、佛像等，精緻之餘亦不失莊嚴典雅，有如泰版小吳哥窟，係一座歷史古城。

大城府係泰國第二個首都，亦係舊暹羅首都，歷史可追塑至1350年至1767年，大城王國（Ayutthaya Kingdom）又叫阿瑜陀耶皇朝，屹今有超過650年歷史。各種建築都係佛教顛峰作品，同時亦於早期接觸西方文明。雖然唔少建築物被緬甸軍攻陷破壞，但亦有好多大城舊建築及佛像依舊保留，見證住大城府輝煌時期至皇室逐漸衰弱嘅情況。

位於昭披耶東岸嘅大城府，位於三河交匯處，有唔少超靚宮殿、佛寺，現時成為豐富歷史遺跡，係遊客必去觀光景點。而於 1991 年 12 月 13 日起，大城更加被聯合國教科文組織（ Unesco ）評為世界級保護古蹟。

E.A.Two 大城包車一日遊行程

Bang Pa-In Royal Palace（邦巴茵夏宮）
Wat Niwet Thammaprawat（安娜教堂）
大城水上市場（可按喜愛轉為Talad Kung 大城蝦市場）
Wat Maha That（瑪哈泰寺）（有時間可加插Wat Chaiwatthanaram 柴瓦塔那蘭寺）
Elephant Village／Elephant Camp（皇家象園）
Baan Kao Nhom（16:00後可以考慮轉Bang Ian Night Market 大城夜市）
Train Night Market Ratchada 拉差達火車夜市（建議現時轉為JODD FAIRS 喬德夜市）

大城景點入場費一覽

邦芭茵夏宮 100泰銖
大城水上市場 200泰銖（連船費）
瑪哈泰寺 50泰銖
皇家象園 200至500泰銖（騎大象）
安娜教堂吊車 10泰銖

Bang Pa-In Royal Palace／邦巴茵夏宮／พระราชวังบางปะอิน

泰國曼谷固然以大皇宮最為人熟悉，而大城府內嘅「邦巴茵夏宮」不僅係當地泰王夏天避暑行宮，更加係泰國5大行宮中最大一座！進入「邦巴茵夏宮」，只需要付100泰銖入場費，有需要可以於門外租借衣服，每件計50泰銖，加上每件50泰銖按金就得。遊覽大城「邦巴茵夏宮」可以了解泰國五世皇歷史，該夏日行宮可追塑至17世紀時期，曾於19世紀重建，屹今有超過150年歷史。

「邦巴茵夏宮」正對「安娜教堂」，由於拉瑪四世曾推行西化改革，故夏日行宮建築揉合維多利亞式、哥德式及中式設計，風格多元。所以，「邦巴茵夏宮」與曼谷市中心大皇宮有與別不同風格，難怪被稱為泰國最美行宮，絕對係IG網美打卡地！

Phra Thinang Warophat Phiman別墅呈米黃色，一般用作舉行典禮用途，但通常都唔會開放公眾參觀。戶外有湖水亭，室內有清式傢俱及陳設，甚至有中式宮殿、歐式皇宮，更有泰式涼亭、歐式石橋、樓台亭榭，以及清幽又唯美嘅大花園，畫面華麗，不能錯過。園區內有建議參觀路線，亦有介紹景點歷史及特色，可以依林蔭步道走，河岸景色優美，徒步可以遊走整個「邦巴茵夏宮」。

Wat Niwet Thammaprawat／安娜教堂／尼維塔瑪帕萬寺／วัดนิเวศธรรมประวัติราชวรวิหาร

想要從「邦巴茵夏宮」前往對面嘅「安娜教堂」，需要跨河先可以抵達。要穿過小河，就要乘搭特定小型吊車，每人10泰銖即可上車。以小型吊車渡河，有如香港南生圍街渡，無論距離定價錢亦無異，都係好短距離，每台吊車可以坐6至8人。整台吊車結構簡單，只需45秒就能過河，但價錢以比例計，隨時貴過正常搭車！

「安娜教堂」又名「尼維塔瑪帕萬寺」，位於昭披耶河上一個小孤島內，島上並無車輛，只有該程街渡能到達教堂。出入「安娜教堂」亦必須依賴「和尚吊車」，即係由和尚駕駛嘅小型吊車。據悉，電影《安娜與國王》亦於「尼維塔瑪帕萬寺」拍攝，所以呢座教堂就被稱為「安娜教堂」。而寺廟本身係供奉釋迦牟尼佛，並非耶穌，只不過外觀似足西式教堂，同時係全泰國首座西式佛寺。

雖然被稱為教堂，但其實係一座哥德式佛寺，建於1878年，即拉瑪五世時期。寺廟可以更了解泰國五世皇歷史，走完「邦巴茵夏宮」後，不妨過河參觀埋「安娜教堂」。而教堂同夏宮一樣，都係受西方文化影響，設計上參照西方教堂，最終結合哥德式風格，相對其他佛寺嚟講，設計尤其獨特。

教堂旁為僧人居所，附近建築都似乎受西方文化影響，充滿歐式風格。而「安娜教堂」與西方教堂基本無異，同樣樓底極高，擁有哥德式尖形拱門、黑白大理石地板，以及水晶吊燈、歐陸式彩繪玻璃，將寺廟變成教堂模式，西化得徹底，都算係全泰國、甚至全球都係獨一無二，打卡必訪！

Wat Niwet Thammaprawat／安娜教堂／尼維塔瑪帕萬寺／วัดนิเวศธรรมประวัติราชวรวิหาร

Ban Len, Bang Pa-in District, Phra Nakhon Si Ayutthaya, Thailand（泰文地址﹕วัดนิเวศธรรมประวัติราชวรวิหาร, ตำบลบ้านเลน อำเภอบางปะอิน จังหวัดพระนครศรีอยุธยา, 13160 Thailand）
08:00－16:30
+66 35 262 139
http://www.watniwet.com/

Ayutthaya Floating Market／大城水上市場／ตลาดน้ำอโยธยา

去曼谷旅遊，水上市場絕對不能或缺，前往大城府一帶，亦可以去吓「大城水上市場」或以出產新鮮大頭蝦聞名嘅「大城蝦市場」。今次編輯先去「大城水上市場」，不僅可以遊船，探索美食及手工藝品，更有傳統舞蹈及泰拳表演等可以觀賞。若要逛完整個水上市場，至少預計需要1小時。

「大城水上市場」於2010年才開幕，內有超過200間商店，係全國最大水上市場。而水上市場人均入場費為200泰銖，票價包含一次遊船體驗。依賴遊船可以穿梭水上市場，從河面環瞰水上市場風光，古色古香，步調悠閒。週邊都係傳統泰國小食、手工藝品店，當中更有傳統泰國服裝店，更可以租借泰服打卡。

遊覽水上市場時，不妨留意一下當中隨時有傳統舞蹈、泰拳表演等節目，多數係不定期演出，每日大概只有3至4場，演員會穿著泰國士兵等服飾表演，比以往曼谷市中心睇人妖騷更獨特。該表演約於朝早11點至下晝5點期間演出，演員們穿著嘅係大城皇朝時期傳統服飾，舞台中上演嘅係古裝戰爭。遊船後湊巧有表演嘅話，上看台睇睇免費表演，令行程更精彩。

而水上市場有不少特色小吃，河道旁有一間泰式餐廳，檯櫈皆設於河邊，果然係水上用餐，風味十足。地道菜式眾多，包括有菠蘿炒飯、泰式豬頸肉、青木瓜沙律、泰式魚餅，以及原個椰青等。

Wat Maha That／瑪哈泰寺／วัดมหาธาตุ

大城府有一個必看景點，被稱為「樹中佛」，即佛像頭部生長於樹幹中，由於佛像藏於榕樹內嘅景象非常獨特，故成為當地IG打卡點。呢個「樹中佛」位處「瑪哈泰寺」中嘅菩提樹之下，而「瑪哈泰寺」整個空間更有如越南吳哥窟！

「瑪哈泰寺」早於1374年建成，合共有198座佛塔，座落大城歷史公園，於1991年被列為世界遺產「阿瑜陀耶古城」項目之一。「瑪哈泰寺」亦係最早期嘅高棉式佛塔，現時塔頂由橢圓變尖細，殿內仍有特色支撐石柱。不過，由於大城府曾經被緬甸軍破壞，寺廟及佛像一度被紮燒，所以「瑪哈泰寺」目前亦只係遺留斷垣殘壁，以及基底遺跡，已經少有完整佛像。

寺中最特別之處係佛殿面前嘅「樹中佛像」，係泰國七大奇觀之一，近年成為大城府必到打卡熱點。樹中藏有佛像到底係咩因由呢？據悉，當日緬甸軍於戰爭期間，將該佛寺中嘅佛像斬首，而佛像頭部則滾到無花果樹下。經過多年後，佛像頭被樹幹及樹根包裹，令其依賴樹木生長，最終處於樹幹中，形成天然「樹中佛」景象。

現時，「樹中佛像」依然保持臉容祥和，閉目從容，帶上「蒙羅麗莎」般嘅微笑，感覺安祥而沉穩，相當平靜。而唔少當地人仍將呢座「樹中佛像」視為神聖之物。至於背後碩果僅存嘅高聳佛塔，以紅磚堆疊成寶塔，則望落稍有歪歪斜斜。

Elephant Village／皇家象園／วังช้างแลเพนียด、Elephant Camp／皇家象營／หมู่บ้านช้างเพนียดหลวง

去大城一日遊，除咗睇古蹟、走水上市場等景點，重有2個不得不到嘅地方。該2個地方都係同大象有關，一個叫「Elephant Village」，即「皇家象園」，另一個則叫「Elephant Camp」，即「皇家象營」。上述兩個大象觀光景點皆位於大城府內，能餵大象、騎大象，而兩個大象園區於位置上又有咩分別？

簡單來說，「Elephant Village」係鄰近「大城水上市場」，而「Elephant Camp」則靠近一堆古蹟群。由於時間關係，編輯只於其中一個落車睇大象，另一個則只於車上觀望大象。以「Elephant Camp」為例，可以選擇餵大象或騎大象。如果係餵大象，每10泰銖可以取得20kg食材。而若然係騎大象，每500泰銖可以騎25分鐘，每400泰銖可以騎15分鐘，而最平就係每200泰銖可騎7分鐘。

無論餵大象或騎大象，都可以與大象影吓相，兩邊都有工作人員看管，故亦算安全。不過，若為大象好，唔太建議騎大象，餵吓大象咪算囉！

Baan Kao Nhom

於結束大城一日遊行程之前，不妨去大城咖啡店歎返個下午茶，是次schedule最後前往「Baan Kao Nhom」，門口寫明「Traditional Thai Dessert Cafe」。

「Baan Kao Nhom」距離大城古蹟群不算太遠，店舖以咖啡及泰式傳統點心與甜點為主打，內外裝潢帶上清新感。該店為自助式，於Google評分上獲得4.2分，成績似乎不俗，店內吸引唔少當地人前往。

甫踏入店內，週邊多款色彩繽紛甜點已映入眼簾，甜點感覺傳統。而店內裝修亦採復古設計，門面雖然以清新綠色為主調，但內裏就採用紅磚設計牆身，為一室帶上懷舊感，配合傳統泰式甜點及咖啡，而大部份甜點都係採用椰漿、糯米等材料製成，亦有部份係來自水果等等。

除咗甜點，咖啡都蠻特別，其中有Espresso Butterfly Pea 85泰銖、Butterfly Pea Ice Cream with Thong-Muan 95泰銖，亦即係蝶豆花咖啡及粒粒蝶豆花雪糕。不過，蝶豆花其實味道唔太搶，亦唔會帶上太多甜膩感，反而只係用嚟為飲料及甜點調色之用。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 當日於KLOOK預訂包車，由曼谷市中心直達大城府，可以酒店點對點接送。一架車可載1至5位乘客，每10小時3000泰銖連司機，折合人均一日約為港幣385元。

❷ 如果超時，會以每小時計350泰銖，包含燃油費、公路費、停車場、車上保險及7%消費稅。

❸ 包車費用同景點入場費無關，景點入場費並唔包括在內。參觀寺廟時，謹記要注意衣著，唔好穿著太性感，唔好著短褲或短裙，最好係長褲、長袖衫，甚至帶備頸巾或圍巾，因為需要遮住肩膀，同時唔好穿著露趾鞋。

❹ 當日泰國旅行社牌照號碼11/08722﹕Tara Group Co.,Ltd.，建議包車前先查詢清楚，確保安全。