新蒲崗濃姐加持、米線生力軍成排隊店！秋拾小食完勝米線﹕蝦多士／八味豆腐／炭燒豬頸肉／脆炸韭菜餃

雖然近年有唔少食肆相繼結業，但香港依然有小店靜靜雞開業，其中位於新蒲崗嘅「秋拾米線」轉瞬成為一間拍拖兩個人嘅排隊米線，到底有咩咁巴閉？有讀者向E.A.Two透露，該店曾經由同區嘅「濃姐茶餐廳」認證及推介，即管去試一試呢間米線生力軍！

「秋拾米線」於2023年9月先至正式開業，主打米線，不時需要排隊，連門外近停車位一隅都劃起排隊路線，顯然平時都係需要排隊等候入座。而室內座位並唔多，人少亦需要搭檯，而且座位都係比較狹窄，同茶餐廳相近。

該店主打米線基本上有5款可以選擇，包括招牌魚腐米線$50、慢煮豬軟骨米線$50、秋拾撈豆花米線$40、炭燒豬頸肉米線$56、自選配搭米線$37，湯底更特別註明無添加味精，認真有自信！第一步先揀邊款米線；第二步揀要咩粉麵，原來當中重有款係通心米線，只需加$1；第三步揀湯底，但就只有招牌豬骨湯底、秘製酸辣湯底，米線湯底含有芽菜、韭菜、腐竹、豆卜、翡翠苗；第四步加餸菜；第五步加小食同飲品。

招牌魚腐米線$50 內有自家製新鮮魚肉、魚腐，湯底就係秘制酸辣醬、無味精豬骨湯底，含有芽菜、韭菜、花生、雲耳、芫茜、炸醬、酸菜，當中自家新鮮鯪魚肉同魚腐都係驚喜，既吸附湯汁，亦充滿魚香。豬骨湯本身鮮甜，唔同係豬骨再加雞骨湯熬煮？湯底添加酸辣湯後，帶有酸酸辣辣感，據悉係一種秘製酸辣醬同豬骨湯混合，至少唔會飲到涸喉同口渴，但就有不外如是感覺，整體唔係太特別。另外，今次添加墨魚春卷$8，都幾大條，入口彈牙有咬口，有墨魚質感。

秋拾豆花撈米線$55 等候時間較其他米線長，因為較花功夫，下層係撈有醬汁嘅米線，並無湯底；上層則為潔白如雪嘅豆花，令米線添上層次，入口清甜。該款米線係小店招牌之作，米線內其實同樣含有豆花、炸醬、酸菜、辣醬、花生、芫茜。豆花上面係炸醬肉碎，好彩無將豆花同炸醬肉碎撈勻，否則以為自己食緊四川麻婆豆腐撈米線！至於米線，第一啖入口香口，不過就算選最少辣，最後都一樣係愈食愈辣！

雖然米線係好多人大讚嘅選擇，但E.A.Two認為該店米線係名過於實，反而其小食先係別樹一格嘅意外驚喜！店內小食唔算少，有蝦多士、八味豆腐、炭燒豬頸肉、脆炸韭菜餃，留意到每一檯都會點至少一款小食，絕對唔輸蝕於米線！今次編輯就選擇自家製手作蝦多士$24、炭燒原塊豬頸肉$48，蝦多士真係有大大隻蝦平躺脆炸多士之上，蝦肉爽口，恍惚黏附住多士，兩者並無分離。蝦多士好香口，麵包外脆內軟，雖然帶有油膩感，但旁邊奉上芥末醬，可以減低返脆炸嘅油膩。