【花蓮美食】花蓮最高人氣黎明紅茶／公正包子店／廟口紅茶！打卡台式馬卡龍、鋼管紅茶、小籠包

講到花蓮最高人氣嘅小吃店，絕對不得不提以下呢3間，有2間毗連對方，另外1間亦只係一兩個街口外，情侶拍拖兩個人去花蓮可以一次過去晒3間。無論係古早味香醇紅茶，抑或係小籠包，甚至係打卡必備嘅台式馬卡龍，都係獨特選擇，一支細紅茶原來比平常多幾倍！

黎明紅茶

「黎明紅茶」係花蓮市老店之一，營業至今已有超過50年，歷史悠久。該店本來就係在地人從小食到大嘅早餐店，提供傳統早餐。雖然已經紅透半邊天，連外國遊客都慕名而至，但原來現時該店唔單止賣早餐，重由早餐賣到晚餐！

所謂「黎明來到……」，梗係要搵吓「黎明」啦！「黎明紅茶」位置同「公正包子」同「廟口紅茶」相距不遠，只需走一至兩個街口就會見到其位於轉角處。該店位於南京街、忠孝街交界，從古色古香建築物外表，可見該店充滿歷史痕跡，上邊以交叉三角窗設計，復古味濃厚。

店內座位區就設有長形板櫈，檯檯櫈櫈設於騎樓底，同一磚一瓦一樣，難掩古舊味道。除咗主打紅茶，該店餐點亦有杏仁茶、花生湯、沙拉麵包、烤吐司，唔少得台式馬卡龍，蛋餅、漢堡、炒蛋等，款式眾多，似乎頗為豐富，當中九層塔蛋餅係比較受歡迎，有興趣可以試試。

而「黎明紅茶」最大特色嘅地方，固然係紅茶，畢竟係花蓮4大紅茶店之一！一支紅茶賣TWD25至35，果然係古早味香醇紅茶。據悉，該店以古法製作，選用鶴岡茶葉，既有茶香，入口亦順口，不過味道有啲奇異，並非平常飲到嘅紅茶味。

餐牌上嘅「咖啡西點」，其實就係「台式馬卡龍」，包含有原味、草莓、咖啡，每件TWD20。西式馬卡龍向來係港女喜愛嘅甜點，雖然甜度頗高，但打卡度亦高。花蓮「黎明紅茶」嘅「台式馬卡龍」同一般西式馬卡龍形狀唔同，由平時見到嘅圓形，改為長條形，但同樣展示圓角，屬一款巨大版馬卡龍。「台式馬卡龍」入口同西式馬卡龍一樣係偏甜，不過「台式馬卡龍」甜膩度就無西式咁高，又或者可能係餅底亦較西式厚身，緩解咗奶油內餡嘅甜膩感。

公正包子

另一間係座落仁愛街嘅「公正包子」，從「黎明紅茶」走到該店只係2分鐘步程，該店位置近「花蓮城隍廟」，位於轉角處，由早餐時段營業至晚餐時段。該店座位區係設於室內，不過只係得一隅幾張檯櫈，所以大部份人都係外帶。

「公正包子」係花蓮一間人氣美食，至今營業已有超過40年，同樣係歷史悠久。所謂嘅「包子」，其實即係店內餐牌寫嘅「小籠包」，而呢款「小籠包」，又唔同中式上海菜館見到嘅「小籠包」。

小籠包每個TWD5、蒸餃每個TWD35、湯餃每個TWD5，重有酸辣湯、肉焿湯、肉焿麵等，飲品方面亦有紅茶、豆漿、奶茶，任君選擇，大概就係選用薄利多銷嘅經營模式。該店既保留傳統口味，同時亦顧及大眾口味，難怪唔單止全台灣知名度高，連外地遊客都識得去食。

今次並無於該店購買小籠包，皆因E.A.Two入住嘅飯店有「公正包子」直送小籠包，飯店自助早餐已經食過啦！小籠包就好似平常港式酒樓食嘅雞包仔嘅造型，但每一口都令人回味。麵包皮偏厚實，質感香軟，咬下之後帶有微甜感，內餡又充滿肉香，更有少少湯汁。每個折合港幣只係約1蚊，買4個都係TWD20，喺香港可能連1個都買唔到，果然CP值高！