曼谷唯一KFC賣啤酒炸雞！The Parq店歎酒／任飲汽水、留意泰國禁酒日子！

泰國KFC一般都無乜太大特別嘅地方，勉強就係可以任飲汽水，今次E.A.Two發現一間非常獨特嘅曼谷KFC分店，唔單止有任斟汽水，更有得炸雞配啤酒，係全曼谷唯一有啤酒嘅分店，想拍拖兩個人去食炸雞、飲啤酒，即睇分店地址同啤酒供應時間！

位於MRT線中段嘅「The PARQ」，係曼谷市其中一個時尚商場，可以從MRT「Khlong Toei站」或「Queen Sirikit National Convention Centre站」前往，因為該商場座落於兩個車站之間。「The PARQ」商場同一般曼谷商場無乜太大分別，但當中就有間非常特別嘅KFC分店。該KFC分店喺商場地舖，甫踏入商場大門口就會見到，從停車場入口進入會比較接近。

該KFC分店同其他店基本無異，都係有一般炸雞套餐，唔單止有得任斟汽水，指定時間內更可以配搭啤酒。該KFC分店係全泰國唯一有啤酒飲嘅KFC，唔輸蝕於韓式炸雞配啤酒。你有無諗過可以食住KFC炸雞飲啤酒呢？

泰國KFC炸雞大小唔算好大，只屬正常size，味道亦唔算特別香口惹味，但都係外脆內嫩。普通炸雞套餐由89泰銖起，正常兩隻炸雞嘅套餐則為109泰銖，而炸雞盒套餐就賣159泰銖。只不過同香港、台灣比較起嚟，就係每間都有可以任限暢飲任斟嘅汽水機，Pepsi可樂、雪碧、橙汁、Lemonade、檸檬茶等，完全係無限續杯！

值得留意嘅係，該KFC分店係全曼谷唯一有得飲啤酒嘅一間，去其他分店係無得飲啤酒。該店只係於指定時間先會有啤酒提供，包括中午3小時、傍晚至凌晨7小時。雖然我哋校啱晒時間前往，但當日就未能配搭啤酒，因為撞正泰王節日，所有餐廳都唔賣得酒。故此，如果讀者想去試KFC炸雞配啤酒，既有要留供應時間，亦必須要注意泰國禁酒日子！

呢間KFC嘅啤酒炸雞套餐至少有4款，可以配搭2隻炸雞、2隻雞翼、薯條、炸雞粒、汽水等，價格由20至178泰銖不等。店內嘅啤酒係以知名嘅泰國象啤為主，細心留意會發現雪櫃內全部都係罐裝啤酒，而呢種啤酒於泰國便利店都可以自己買得到，只不過最後會倒入酒吧都會見到嘅啤酒機內，等客人買完炸雞之後，自行用該店提供嘅空杯斟出嚟。

據悉，泰國象啤同KFC聯乘係由於2017年時興起韓式炸雞配啤酒，於是泰象啤母公司ThaiBev就打算收購泰國KFC，包括全國240間分店。只不過，目前最奇怪係只有「The PARQ」嘅KFC分店可以一嘗炸雞配啤酒。

如果想喺曼谷飲啤酒，必須要留意禁酒日子！當地由2008年起已實施《酒精管制法》，每日只有兩個時段可以賣酒，包括11:00至14:00、17:00至00:00，只有酒吧可以豁免賣到凌晨02:00。另外，泰國係一個知名佛教國家，有好多節日都唔可以賣酒，尤其係一堆泰王節日就更加係禁止賣酒，包括萬佛節、三寶佛節、佛誕節（衛塞節）、守夏節、解夏節等。一旦違反禁酒令，隨時會判1萬泰銖以下罰款，甚至處以6個月徒刑！

今次E.A.Two特別搜尋一堆泰國禁酒節日，以下嘅日子要留意係唔會有酒賣，做足功課就唔會好似我哋咁白行一趟！

1. 2025年2月12日（萬佛節）
2. 2025年5月9日（春耕節）
3. 2025年5月11日（佛誕節禁酒日）
4. 2025年5月10日至12日（佛誕節假期）
5. 2025年7月10日（三寶佛節）
6. 2025年7月11日（守夏節）
7. 2025年10月7日（解夏節）