【澳門自助餐】旅遊塔下CP值高Buffet！皇家葡萄餚葡國菜餐廳最平僅$190！一票歎自助餐兼上360度觀景台！

平價自助餐到底係咪真係無好嘢？事實上，貴嘢都未必一定係好，平嘢隨時有更高水準。今次E.A.Two去澳門歎自助餐，入面竟然真係葡國菜式，而非平時大部份都混合西式選擇！若拍拖兩個人前往，唔單止人均僅$190，而且可以順道上行至頂樓旅遊塔觀景台360度睇風景，一票通行！

一票通行﹕「皇家葡萄餚」自助餐

座落「澳門旅遊塔」底嘅「皇家葡萄餚」，係當地嘅葡國菜餐廳，亦係少有真係主打葡國菜嘅自助餐！自助餐提供午市同晚市，以Lunch Buffet為例，主要分為兩個時段，分別係中午12點同下午3點，每段有2.5小時。如果以正價計算，平日人均為HKD208，而週末假期人均則為HKD298。不過，今次E.A.Two事前於KKDAY預訂優惠套票，最終人均僅需HKD190！

總數每人HKD200有找，呢個價錢唔單止有葡國菜自助餐，更包含「澳門旅遊塔」觀景台入場券，實試過真係可以一票通行，無需額外收費！自助餐人均由HKD208至298不等，但KKDAY預訂座位兼購票，人均就只係HKD190。以觀景層單次入場門票計算，人均需要MOP208，但今次食埋Buffet都唔使呢個價位，CP值高！

「皇家葡萄餚」主打嘅係葡式料理，英文係「Tromba Rija」，創於1966年，真係葡萄牙餐廳，室內目前依然係滲出葡萄牙建築特色。該店於2014年底於「旅遊塔」下開業，為亞洲分店，而名稱係來自創辦人嘅家族姓氏「Real」，葡文意指「皇家」。而入面葡國美食菜式選擇又真係九成都係含有葡國菜食材。雖然食物選擇唔算多，但E.A.Two就覺得剛剛好，無乜多餘嘅選擇，而又恰到好處，絕對係貴精不貴多，設計菜式嘅大廚應記一功！

餐廳座位並唔算多，大概得150個，一隅設有落地大窗，外面係一個平台，可以徒步出去。位置可外望南灣海景，「西灣大橋」就近在咫尺，更可眺望氹仔風景。不過，當日窗外有工程進行中，若然坐窗邊，其實只係睇到一堆沙泥，因為工人做緊工程。

甫入座，侍應就放上一款葡萄牙軟麵包，再配搭無鹽奶油，另外每人都有一杯混合檸檬茶。麵包大小就同小學生塊臉差唔多，撕開可以每人兩嚿。雖然表面烤得比較乾硬，更灑由麵粉，但撕開後就發現內裏係頗為鬆軟。麵包必須配上奶油，否則其實無咩味，好似食白麵包咁。而檸檬茶亦有驚喜，入口滲出檸檬香，亦有紅茶味，難得係無冰粒都冰涼。

既然係全自助餐模式，當然要走出去攞嘢食，大多數菜式同葡國菜有關，好多都係採用葡國食材，無咩海鮮、魚生、凍盤等西方菜式。當中，沙律菜款式堅有誠意，沙律款式眾多，而且每一款都唔係隨便撈埋就算，好少見到沙律吧位置有咁多款獨特沙律菜。除咗可以自製沙律、精選雜菜沙律，更有開心果羊芝士車厘茄沙律、蘆筍藜麥沙律、紅米沙律配蝦仁及西芹、牛油果羊芝士紫沙律、芝麻菜配火腿蕃茄及核桃、北非米杏仁沙律配葡萄乾羊芝士及蔥等，睇嚟不時會有變化，因為餐牌比現場更多選擇，其他選擇應該重有紅菜頭沙律配香橙及羊芝士、吞拿魚沙律伴眉豆蕃茜及洋蔥、雞心豆牛油果紫洋蔥沙律、豬耳件芫荽及甜椒、三文魚意粉沙律等。最難得嘅地方，係每一款沙律唔單止賣相精緻，而且都係入得口，配搭適宜，好fresh。

餐牌上有薯茸青菜湯、南瓜湯、花椰菜馬鈴薯湯，但當日就只有薯茸青菜湯，湯汁濃稠，唔係液體狀，配料不少。而芝士都係幾有驚喜嘅選擇，比如橄欖油醃芝士、芝士島牛奶芝士，入口好重芝士香，竟然唔會好膩。

馬介休係非常為人熟悉嘅葡萄牙食材，該店就有多款馬介休菜式，例如焗馬介休配薯仔雞蛋、燒原條馬介休、炸馬介休伴蕃茜，而當日就只見到有馬介休球、香蒜橄欖油煮馬介休。好少馬介休球嘅魚肉量同薯仔量比例適中，魚肉絲絲纖維明顯，而馬介休又唔會太油或太鹹。當馬介休魚肉浸於香蒜橄欖油內，魚肉滿滿蒜香同橄欖油香氣，入口只係微鹹，肉質竟然唔會好嚡口，原來幻滑橄欖油浸住係可以保持魚肉質感。

好多菜式只係於餐牌有，但午市就見唔到蹤影，估計係晚市先會出現，包括有烤乳豬、迷迭香烤羊腿、葡式焗鴨飯、烤竹筴魚仔、檸檬霹靂醬蝦仁、煙三文魚薄餅、青口配芫荽及波椒、吞拿魚沙律醬醺雞蛋、檸汁芫荽煮蜆、牛肉豬肉碌結、炒椰菜煙肉炆豬柳、蒜香燒鹹鱈魚配新薯、蕃茄辣椒汁炆雞腎、煙燻紅甜椒炆雞、燒嫩羊仔肉配新薯、黑椒迷迭香烤西冷扒、霹靂醬檸檬燒雞、薯仔燴羊、海鱸魚柳芫荽飯、自製醃洋蔥牛肉串燒、燒豬腩肉、油條等。

當日午市選擇重有燒沙甸魚、紅油炆牛肉伴甘筍及青豆、香腸雞蛋酥、黃薑肉碎包、薯蓉燴豬肉、炆黑毛豬面頰肉配薯茸、燴海鮮飯等，鹹點中真係無邊款係令人覺得中伏，呢方面甚至真係幾精彩。當中重有兩款特別菜式，分別擺放近廚房窗口，包括波椒白酒煮青口、辣椒汁烤雞，兩者都夠惹味，醬汁調配料調校適中，烤雞嫩滑之餘亦唔會好辣。不過葡國雞或非洲雞好似唔係來自葡萄牙，而係澳葡菜，簡單嚟講就係Fusion菜。

鹹點精彩程度的確要豎起手指公讚好，令甜點比較遜色。餐牌上有唔少甜點，例如砵酒燴梨、栗子朱古力撻等係未見蹤影。當日就見到有芝士肉桂焗蛋白、朱古力慕斯、焗蛋白配吉士及肉桂、蛋黃糖漿烤杏仁、楓核桃芝士蛋糕、朱古力車厘子軟蛋糕卷、葡式蛋撻、朱古力brownie、反轉菠蘿蛋糕、芒果青檸啫喱、桑子布甸、麵包布甸，水果就有西瓜、蜜瓜、菠蘿可以選擇。甜點其實無特別印象深刻，美中不足係葡撻唔夠熱力，擺到涼晒，如果擺放保溫嘅地方就會更好。當中，芝士肉桂焗蛋白、麵包布甸就比較穩陣。

侍應服務態度真心要讚賞，唔單止殷勤，食物好快就補給咗，全部無限量供應，而且收碟收得好快，攞完嘢食之後，舊碟於徵求同意下已經被收走。飲料方面，除咗一開波嘅檸檬茶，一隅有茶水同咖啡機，包含有黑白咖啡、cappuccino、espresso，亦有柑橘蜜味綠茶、港式奶茶、熱茶可以選擇，都係無限量供應。

一票通行﹕澳門旅遊塔

歎完自助餐，走出餐廳折返入口方向，自然會見到一部自助取票機。打開返KKDAY事前嘅憑票證明QR Code，按指示就可以直接取票，完成步驟後，部機就會吐出「澳門旅遊塔」入場券，整個過程都唔需要額外再付款。自助餐廳雖然位於大樓地面，觀景台就位處58樓、61樓，只要乘搭電梯，就可以直接登上「澳門旅遊塔」觀景台。

「澳門旅遊塔」有約338米高，係澳門知名地標同觀光塔，其實比巴黎「艾菲爾鐵塔」、澳洲Sydney「AMP Tower」、奧克蘭「Sky Tower」等更高！先登上58樓，呢一層依然係室內空間，但走一個圈，就已經可以360度環瞰澳門全景！呢一層樓四面八方都係落地大玻璃窗，景觀係比較遼闊同清晰，摩天大樓、葡式建築物、海岸線皆一覽無遺，只係需要隔住玻璃觀望。

從58樓觀景台處抬頭，會發現上一層樓就係大型旋轉餐廳，同樣可以享有澳門360度全景！而58樓層數嘅觀光廊唔單止可以前後左右環瞰全澳門景色，亦可眺望珠海，甚至回望香港大嶼山風景，日夜景皆適宜。另外，58樓更可以睇電視直播，望到上層準備跳Bungee Jump嘅情況，當時有咩人要跳笨豬跳都一清二楚。

而繼續上行至61樓，就係一個戶外觀景台，離地有223米高！呢個位置亦係各式活動嘅入口處，例如係跳笨豬跳、高飛跳、空中漫步、百步登天，不過全部都要額外付費參與。自問無膽匪類，所以我哋只係於觀景台賞景，同埋食花生睇人跳Bungee。而61樓觀景台有一部份其實被外面平台遮擋景觀，只有一半位置可以隔玻璃窗完全下瞰澳門風景。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線5AX、9A、10A、18、18B、23、26、32，可以直達「澳門旅遊塔站」。

❷ 該餐廳位於地面一層。buffet有午市同晚市，星期一休息。自助餐供應時間為﹕中午12:00-15:00、下午茶15:00-18:00、夜晚18:00-22:00。

❸ 如果於kkday或klook預訂咗觀景台門票，只要於地面一層或地牢入口嘅自助販賣機取票就得。

❹ 自助餐謹記事前要預訂座位。午市平日人均$208，週末假期就係$298，3至11歲小朋友分別係$118、$168；晚市平日同假日同價，人均$368，小朋友就需$208，設有加一服務費。加錢可以任飲汽水、果汁、餐酒或啤酒。