【澳門景點】澳門八號M8毗連議事亭前地、正對新中央酒店！商場樓高9層、Sky8觀景台俯舊城區／天台壁畫！

澳門市區有唔少景點，近月知名地標「議事亭前地」旁邊就有個新商場開幕，頂樓天台更加係一個可以免費進入嘅觀景台！中層有個露台可以俯視隔離天台壁畫，但電梯唔能夠直達，到底點上去？呢度值唔值拍拖兩個人上去呢？

「M8澳門八號」係一個毗鄰「議事亭前地」嘅新式商場，從小路上行就會抵達，商場建築簇新，同週邊嘅古樸建築呈現強烈對比。事實上，商場於上年9月底先正式試業，座落於被聯合國教科文組織評為世界文化遺產嘅澳門歷史城區，而且係核心地帶。

該商場叫「M8」，而「M」字就代表「Macau」，「8」字就係澳門8%原始土地嘅100米內有8個世界遺產景點，包括有旁邊嘅「議事亭前地」、「仁慈堂大樓」、「市政廳大樓」，以及「主教座堂」、「大堂前地」、「玫瑰堂」、「板樟堂」、「盧家大屋」。雖然週邊都係歷史建築，但呢座商場就非常新簇，顯得格格不入。

室內有過百間國際品牌同當地品牌店舖，亦有多間餐廳進駐，但整體都係感覺比較高檔，餐廳亦無咩特別，當中有泰式、韓式，連港式都有，就係無葡式，其實都係無咩吸引力。

相信最特別嘅應該係開放公眾嘅商場天台，搭電梯上頂層5樓之後，就可以轉去樓梯方向，上行一層就可以到達天台位置。天台一端正對「新中央酒店」，對比該酒店嘅360度天台觀景台，呢邊天台就稍為遜色。「M8」商場頂層叫「M8 Sky」，天台地方不大，基本上只係得90度左右嘅風景。

天台其實只係得6樓左右嘅高度，所以隔離有啲樓比商場更高。不過，天台都勉強可以睇到樓下嘅知名景點，包括剛才提到嘅8個景點。如果黃昏時間前往會比較適合，呢個天台算係方便嘅賞景地。

折返樓下商場，下行樓梯會見到一個戶外平台，旁邊大廈天台就有一幅澳門最大嘅屋頂壁畫，配合黃昏日落風景就比較好。細心啲睇，樓下唔單止係舊城景點，其實呢幢大廈就係旁邊嘅「仁慈堂」舊樓天台！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 任何電梯都上唔到天台，必須上到頂樓，最後要行樓梯先上到sky8天台。

❷ 頂樓落樓梯會見到下面另一個戶外平台，可以俯視旁邊天台壁畫。

❸ 黃昏時間前往會最好，因為週邊其實比較多樓景，而天台都唔算好高，只係一個免費觀景台。

❹ 門口對面係「大堂街秘方炸雞」。

EATWO

Miss A