【鎌倉一日遊】鎌倉小町通最強炸雞／牛肉餅／四色糰子！宇賀福神社洗錢專用？鶴岡八幡宮＋源氏山公園櫻花勝地

鎌倉一帶係東京近郊知名景點，從東京市區前往「鎌倉駅」，車程僅約1小時，而車站附近嘅「鎌倉小町通」則為拍拖兩個人掃街好地方。鎌倉山上同上下各有櫻花勝地，小食街盡頭有座大神社，山頂上面重有一座洗錢專用嘅神社，到底係咪真係一個動作就可以增加財運呢？

鎌倉景點（1）﹕鎌倉小町通

由「鎌倉駅」徒步至「鎌倉小町通」，只需1分鐘，呢條時尚商店街店舖應有盡有，美食眾多，包括紀念品店、時裝店、精品店、生活雜貨店等。呢條街係古城中嘅時尚商店街，全長大概有600米左右，係遊客聚集嘅地方，人聲鼎沸，穿梭其間不難感受到街道之間嘅熱鬧氣氛。

「鎌倉小町通」內有多間小食店，今次E.A.Two就選擇幾間小食，好多都係頗具人氣嘅小吃店。講到最為人熟悉嘅小食店莫過於「さくらの夢見屋小町通り本店」，該店以日式糰子為主打，比較受當地年輕人歡近。當中，有好多唔同款式糰子可以選擇﹐當中有其他地方比較少見嘅四色糰子。呢支四色糰子只係290円，所謂四色就係櫻花味、毛豆味、栗子味、抺茶味，果然係打卡必備！

商店街內有唔少值得一試嘅小食，包括600至700円嘅鎌倉得獎炸雞，香脆肉嫩嘅即叫即做炸雞，真係「鎌倉小町通」必食選擇！而附近又有間售賣牛肉餅專門店，炸牛肉餅每件大概只係250至350円，同樣係外脆內軟，難怪門口不時有當地年輕人幫襯。

鎌倉景點（2）﹕鶴岡八幡宮

商店街盡頭可以直接徒步至建於1063年嘅「鶴岡八幡宮」，係日本三大八幡宮之一，聽聞係來自於武士家第源氏首領源賴義。門口有座巨型朱紅色鳥居，背後古色古香，好有古都風情，而大鳥居作用就係阻隔人同神嘅交界。據了解，呢座神社係係供奉住日本戰神八幡神，係鎌倉知名神社，同樣吸引眾多遊客進入參觀。如果係櫻花季前往，則可以打卡神社「參拜之道」內嘅櫻花景色，據悉當中有近1000棵櫻花樹！

鎌倉景點（3）﹕源氏山公園

另一個鎌倉賞櫻景點就係比較鮮為人知嘅「源氏山公園」，海拔有約93米高，距離「鎌倉駅」有約25分鐘步程。該公園位置比較偏僻，所以係較少遊客前往，櫻花季節山頭會出現一棵棵櫻花，包括染井吉野櫻等。不過，當日前往公園就只有少數櫻花盛開，皆因只係初櫻綻放嘅時候。呢個地方同樣來自於武士家第源氏首領源賴義，據悉當時源氏追討敵人時，曾經於山頭高舉旗幟。

鎌倉景點（4）﹕錢洗弁財天宇賀福神社

而「源氏山公園」下方有一座神社，叫「錢洗弁財天宇賀福神社」，據悉參拜時一個動作可以提升財運，到底係真定假呢？神社同樣係同源氏有關，係來自於源賴朝做將軍之前嘅一個夢，大概係供奉西北之地湧出嘅泉水，以達到天下太平。而呢座神社就係由源賴朝建造，其後一個「洗錢」動作，竟然成為民間信奉嘅信仰。

呢座神社內有個洞窟，入面湧出嘅泉水既係聖水，又叫做錢洗水。只要於神社辦事處畀100円，每組有3支蠟燭、香炷組，連同一個小竹籃，就可以試吓呢個方法。當日就見到唔少參拜嘅人做同一個動作，都係將錢放喺竹篩內，然後用水杓舀3次水落啲錢度。原來將錢清洗之後，等抺乾之後就可以保留起嚟，但最好都係用咗啲錢佢。據悉，呢個參拜方法可以令人財源滾滾來，原來可以財運亨通，難怪於當地頗具人氣。