赤柱出發經舂坎角往淺水灣南灣尋同志沙灘+一級水質泳灘

港島南區水質優良嘅沙灘比比皆是，但要挑選人流較少嘅沙灘就比較困難，大多數人都會選擇赤柱沙灘或淺水灣泳灘，其實行完些少會發現附近有兩個人流相對較稀少嘅沙灘，其中一個係聚集同志拍拖Sweet Sweet嘅沙灘，另一個則被評為一級水質嘅泳灘，值得兩個人去曬吓太陽兼玩吓水。

由淺水灣泳灘起步，當然係最自然而然、最方便嘅路線，直接沿南灣道即可前往中灣泳灘、南灣泳灣。至於由赤柱出發，路段就比較複雜而沉悶，則可以由美利樓起步，穿過赤柱馬坑公園，往舂坎角泳灘方向走，於迴旋處向上行，沿舂磡角道走到盡頭，直到赤柱峽道，轉入淺水灣道、赫蘭道，於淺水灣道花園背後樓梯向下行，經小山路直落南灣道，位置約到達淺水灣泳灘至南灣嘅一半路程。

到達中灣之前，會見到一個不知名泳灘，並非如中灣、南灣一樣為康文署正式泳灘，而且從俯視角度可見泳灘似石灘多於沙灘。而前行則為中灣泳灘，環境寧靜，亮麗非常，可回望淺水灣泳灘，中灣最為人熟悉嘅特點係屬於本地同志朋友嘅沙灘，係一個男男蒲點，亦係一個同志日光浴場，被指為同志天體泳灘。

經過日版、港版《大叔的愛》，本地人對同志戀情接受到大增，相信大家唔會再對男男有奇異目光。中灣現場所見各男士身材健美，古銅式肌膚甚吸引目光，唔少男士都手牽著手，互相依偎，比普遍異性戀情侶更甜蜜，編輯私心認為係一個腐女最佳位置。

中灣泳灘嘅水質唔算太好，反而南灣泳灘地理位置上更優越，自成一隅，據《香港泳灘水質2020年報》所見，南灣泳灘被評為一級泳灘，水質方面更為良好級別，但人流相對較少，上年度平日僅有約100幾人，而假日亦只有約400幾人，不足500人。

南灣為臨海地段，附近皆為高尚住宅區，背靠青翠山巒，靠近為舂坎角西北面，早年大富翁遊戲當中，南灣六係最昂貴嘅兩大地皮之一。而南灣泳灘因交通不便而可達到唔高，以致每日到訪人次較淺水灣少，不過環境比淺水灣清靜得多，黃昏其更享日落靚景！雖然沙粒並非幼細，但可以靜下來享受陽光與海灘，遠離繁囂，相當幽靜，悠閒感爆燈。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 前往南灣可以於中環交易廣場乘搭6, 6X,63，又或260特快路線，時間上比較快，同樣可前往赤柱，於淺水灣海灘落車，由淺水灣步行至南灣約需20至30分鐘腳程。另外，巴士亦會經過赫蘭道，此處落車後，可沿山路直抵南灣道。

❷ 到達南灣之前，會經過中灣。

❸ 南灣公廁對出有停車位，可供泊車，不過唔算太多，但以人數嚟講停車格數量尚算係足夠水平。

❹ 南灣內有燒烤區、小食亭、更衣室、沖身設備、浮台、防鯊網。

❺ 中灣泳灘、南灣泳灘、淺水灣泳灘、舂坎角泳灘於冬季都會暫停救生服務，而浮台亦會暫時移走作保養維修。

❻ 到沙灘遊玩謹記做足防曬措施。

❼ 由赤柱步行至南灣，需時45分鐘至1小時步程。

❶ 留意南灣泳灘沖身設備、更衣室雖然靠近沙灘，但洗手間則需要步行折返停車場方向。

EATWO

Miss A

【區區有小店2024】美孚6間尚存本土餐廳推介！限定栗子露／平民居酒屋／台式車輪餅｜美孚美食推薦2024