信和隔離！旺角樓上咖啡店舖滿土耳其民族風Halı 摩洛哥彩繪玻璃吊燈搶眼任打卡

旺角信和中心隔離又有一間以土耳其民族風為主題嘅咖啡店，室內外裝潢充滿異國情調，包含毛毯、玻璃吊燈等，又係一間讓少女任意打卡嘅Cafe，帶有幾分波西米亞風情，上年尾開業至今仍然受歡迎，食物既有一般Cafe會有嘅蛋糕、小食，亦有酒吧必備嘅Cocktail，當作一個本地偽旅行亦未嘗不可。

門口可見一整面馬賽克牆，全店舖滿土耳其風格毛毯Halı，中央更有大型摩洛哥風格彩繪玻璃吊燈，燈光柔和而浪漫，色彩鮮艷奪目，卡位中間有流蘇式棉繩掛簾，營造異國風感覺，兩旁更特別設有唔俾進食嘅打卡位，包括吊椅、窗邊座位，內有大量民族風咕𠱸、地毯，連窗花圖騰都有中東風格。但相對深水埗Lonely Paisley，欠缺門口一排Tapchan嘅震攝感。不過，以食物質素嚟講，就比Lonely Paisley優勝，尤其係小食，甚有驚喜。

延伸閱讀﹕深水埗異國風Tapchan大毛毯進餐實試土耳其知名甜品+伊朗青檸玫瑰水

呢間樓上咖啡店將Cafe、Bar二合為一，如果點選花茶，更會被端上民族風茶具，悠閒地歎返個下午茶，而Cocktail、Shisha亦有特色，不過不勝酒力兼拒絕煙酒嘅編輯只係照舊點選咗咖啡。Coffee Tonic $60 有咖啡味，氣泡平衡咖啡味，Tonic水天然苦味唔太重，唔會太蓋過咖啡香，亦中和苦澀味；而Dirty $58 則照舊將咖啡倒入牛奶內，熱咖啡、凍牛奶混合起來更有層次。

小食當中有香炸魷魚鬚$58，不單熱焫焫上枱，炸得脆卜卜，而且添加紫菜粒，啖啖有紫菜鹹香，炸粉調味不俗，每條都幾大條，雖然近$60，但質素比以前酒樓食到嘅更好。

甜品方面有Egg Rolls，即係千層蛋糕卷，亦為人氣之選，為與IG網店xlxlxlxl聯乘之作，等同上水咖啡店ATMA與觀塘小茶室想爺爺了聯乘一樣，將咖啡、蛋糕兩者二合為一。千層卷口味眾多，當中以濃香焙茶味Egg Roll $62 為例，層層堆疊質感狀似千層蛋糕，Crepe餅皮、忌廉梅花間竹填滿每一層，餅皮偏薄，柔滑忌廉配上焙茶味後略帶茶香，感覺唔太甜膩，質感亦Creamy，略嫌蛋糕較細，茶味唔夠重。

延伸閱讀﹕必試燒腩仔Bagel！上水圍村精品咖啡店ATMA避世週末歎咖啡感受悠閒氣氛

延伸閱讀﹕清一色現泡茶唔賣咖啡！觀塘廠遊迷你日系茶室週末與情人榻榻米放空茗茶

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 位置靠近信和中心，位於創興對面。

❷ 必須Book位，可以打電話或IG預訂。

❸ 會收加一服務費。

❹ 水煙客可有120分鐘用餐時間，而非水煙客則有90分鐘用餐時間。

❶ 謹記保持座位乾淨，全場都以毛氈舖蓋，若有污漬或殘渣，會被收取$500清潔費。

❷ 入門前要撳鐘，入門後要除鞋。

❸ 留意每位最低消費為$100，拍拖兩個人就$200。

❹ 可以於衣架自取披肩影吓相。