「天空之城」觀星台對上！西貢水浪窩營地空間十足市中心隱藏港島區邊寧頓街T形街牌？

西貢營地有好多，熱門與冷門都有，今次走到可以從西貢市中心或沙田出發嘅水浪窩營地，其實該營地雖然要向上走，但交通方便，環境不俗，地方唔細，而且仍然有草地，都算係適合拍拖兩個人前往嘅香港營地。另一方面，靠近西貢市中心位置竟然隱藏咗一個T形街牌，但呢個T字街牌本身竟然係位於港島區，到底點解呢？

從沙田或西貢市中心出發，於水浪窩站落車，經過水浪窩觀星台入口及停車位，一直前行至麥理浩徑第三段、第四段交匯處，於第四段上行約15至20分鐘，即可抵達水浪窩營地。

於西沙路上行，依循麥理浩徑第四段走，先走過一小段山路，然後就會到達瀝青路，只需要於分岔路口轉左上行，中途會經過一個直昇機停機坪，沿途路段並非平整，反而有部份係凹凸不平，所以拖車有無著數就由讀者自行決定。

雖然表面睇落路程唔長，但其實都需要上行約15至20分鐘上坡路段，水浪窩營地於漁護署官方公佈資料為小型營地，但其實相對其他被稱為小型嘅營地嚟講，營地地方偌大，相當空曠。

水浪窩營地屬馬鞍山郊野公園範圍內，營地為梯田設計嘅山腰平地，露營場內最大特色嘅地方相信係以一塊塊大石嵌成嘅天然枱櫈，加上營地內仍然有青綠草地，絕對大自然味十足！

營地有基本設備，除咗天然設計嘅枱櫈，亦包括燒烤爐、3個旱廁、垃圾箱，而麥理浩徑沿途本來有溪澗水源，但以2023年3月實地查看嚟講，則未有水源供應，所以需要從營地折返剛才麥理浩徑第3段及第四後分岔路口，即西沙路燒烤區5號場標準洗手間。該洗手間既有洗滌處，對出亦有垃圾箱，更分別有免費及付費加水站。

水浪窩營地內有唔少營位，若以燒烤爐及枱櫈計算，有逾10個營位，而營地面積寬廣，雖然有部份位置有天然屏障分隔，但其實有一大片草地可供使用。而從營地草地顏色嚟睇，部份營位可能經常有人紮營，但有一大片草地綠草如茵，仍舊維持青翠碧綠，估計平常未必好多人前往露營。

其實，水浪窩營地有一個賞景位，位置可回望企嶺下海方向，天氣晴朗時景色不俗。而若想望更廣闊景色，就需要沿麥理浩徑第四段繼續上行至馬鞍山或彎曲山，不過露營應該係Chill，走第四段至山頂位未免太辛勞。若想離開營地走走，又唔想走太遠，可以上行約50分鐘經黃竹洋至一樹洞，或者下行15分鐘至有「天空之城」稱號嘅水浪窩觀星台，甚至下行至企嶺下老圍、企嶺下新圍堤壩，不過就可能需要走45分鐘至1小時。

水浪窩營地交通方便，步行易達，而設備亦算齊全，所以都係一個適合新手露營嘅地方；另外，雖然營地係地方空曠，但其實並非小朋友放電好去處，因為營位係梯田狀，有一級級天然樓梯，而一端賞景位更似懸崖，小朋友跑跑跳跳可能會比較危險，似乎唔太合適家庭客，所以其實唔算係一個適合親子露營嘅地方。

要前往水浪窩，除咗從西沙路步行至營地，亦可以揸車從西貢市中心前往，於大網仔路轉入竹洋路，經過一堆好少真香港人買得起嘅豪宅，然後轉上山寮上路，大概走2.2公里車程，即10分鐘左右，即達麥理浩徑第四段路口大閘，位置可見一個木造涼亭。

落車後，穿過大閘，向企嶺下林道方向下行，約10分鐘步程即達營地範圍。要注意麥理浩徑第四段此路段可能有馬騮出沒，一方面要小心身上嘅膠袋會被搶走，另一方面唔好對馬騮有任何挑釁或攻擊行為。

於西貢市中心至水浪窩營地，若非夠細心，大概亦唔會估到當中隱藏咗一個殖民時代嘅T形街牌，位置係中途沙角尾路沙角尾村，到底舊街牌躲藏於何處？

原來該T形街牌被貼於其中一間屋牆壁上，直入不足分鐘即達，向路口小屋一望，T字街牌自然映入眼簾。牆壁上嘅T形街牌寫有「邊寧頓街」及其英文「Pennington Street」，但其實邊寧頓街位處港島區，何以會身在西貢？

邊寧頓街為銅鑼灣區內其中一條馬路，靠近利園二期、隆堡柏寧頓酒店、富豪香港酒店等建築物，穿過禮頓道、恩平兗、加路連山道一帶

相信有留意開eatwo嘅讀者即使無特別注意T形街牌，亦會有所了解，T形街牌本身就係經歷香港時代變遷之物，係殖民時代嘅文化產物，現時只有不足100塊T形街牌遺留。政府對舊式T形街牌一直未見任何保育及活化，以致多數T形街牌都被消失，部份被拆除，部份被燻黑，部份被盜取，部份已褪色，部份被轉換成外牆顏色，總之變化五花百門，就係並無受到保育。