元朗錦田路邊大排檔藏公園街市旁超高水準街坊醉雞麵/海南雞飯回頭率高

提到大排檔，今時今日本地大多已經轉變為紳士淑女都可以優雅地坐低食飯嘅地方，價錢較高昂，但事實上有水準嘅大排檔一般係路邊地踎位置，元朗錦田美食眾多，偏偏就有一間街坊大排檔躲藏於路邊，不單屬街坊價錢，而且有料到，連一杯檸茶都有水準，不過如果拍拖兩個人想去食個飯，就要注意營業時間啦！

大牌檔風味隨年月逐漸消失，如同本土文化，位處錦田街市旁邊嘅路邊大排檔，靠近公園同錦田公路，基本上只於午市營業，雖然有碟頭飯，菜式上有別於正宗大排檔有嘅鑊氣小炒，大多係茶記餐單，再Crossover少少西式美食，如同西式大排檔，有別於中式大排檔，看似伏伏哋，但水準上卻意外地高。

出餐速度其實唔慢，當中有假日之選海南雞飯$47，抬頭一望牌匾就會知道係招牌之一，而且係限量出品，太晏去食分分鐘會賣晒。碟上有一大勺黃薑飯，份量充足，而雞肉份量反而唔算多，當日2點左右到達，雞骨比雞肉多，果然雞飯係限量，應驗和你Pay網上評價愈遲愈無得食好嘢。不過，無論黃薑飯、雞肉定3款醬汁，味道上都係不輸外邊嘅海南雞飯。

編輯最推介嘅菜式反而唔係雞飯，而係路邊精選醉雞麵$47，醉雞、湯麵分開上枱，湯麵湯底清澈，略帶甘甜，幼麵淥得剛好，保持麵底本身彈牙度。細心留意一下，醉雞亦係受客人歡迎嘅隱藏版菜式，雞肉入口嫩滑，而且有彈性，酒香四溢，唔會有酒嘅苦澀味，令醉雞入口甘甜，係回頭率極高嘅菜式。

人均不需$50就可以飽肚，即使只係一杯加$5嘅凍檸茶亦唔簡單，紅茶味濃郁，檸檬亦有適當酸澀味，就算已經加冰，亦唔會好似香港咁被溝淡。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 位置靠近錦田街市，隔離係錦田公園，毋須走入去街市，因為喺錦田公路隔離。

❷ 如果由錦田紅磚屋方向步行而至，向錦田公路行，但走出錦田壁畫村後唔使轉右，於錦田街市巴士站過對面馬路，向左手邊行就會見錦田公園。

❸ 每杯飲品基本只加$5。

❹ 大排檔有醉雞賣，基本上每隻$240，需要Whatsapp預訂。

❺ 店主講到明即叫即製，人手有限，請勿催促。

EATWO

Miss A